1 Korintus 10

Israel sebagé sara peringeten

10:1-11:1

Aku mera kati kam mubetihi sudere-sudere, bahwa muyang datunte bèwèné nge ara i tuyuh ni emun den bahwa pakea bèwèné nge  muliweti lut.

2 Kin mujadi penunung ni Musa pakea bèwèné nge ibaptis wan emun den wan lut.

3 Pakea bèwèné mangan pemanganan rohani si dis

4 den pakea bèwèné minum minumen rohani si dis, sebeb pakea minum ari atu karang rohani si munurumi  pakea den atu karang a oyale Kristus.

5 Tetapé sunguh pé lagu noya, Allah gere bekenak kin sebagien kul ari pakea, kerna pakea ibenasanen i padang gurun.

6 Bèwèné ini nge terjadi sebagé conto bagi kite kin muperingeti kite, kati enti kite mungenaki hal-hal si jahat lagu si nge ibueten pakea,

7 den kati enti kite mujadi penyemah berhala, dis lagu pepien ari pakea, lagu ara tertulis: “Renye kunulle bengsa wa kin mangan urum minum; renye uetle pakea kin begegure.”

8 Entile kite mubueten pencabulen, lagu si ibueten pepien ari pakea, sehinge i sara lo nge benasa due puluh tige ribu jema.

9 Den entile kite munyubei Tuhen, lagu si ibueten pepien ari pakea, sehinge pakea benasa iteldok lipé.

10 Den entile cebebék, lagu si ibueten pepien ari pakea, sehinge pakea ibenasanen malèkat maut.

11 Bèwèné ini nge munimpe pakea sebagé conto den itulisen kin mujadi peringeten bagi kite si murip i waktu jemen akhir nge sawah.

12 Sebeb oya sahan si mungire bahwa wé sesuk teguh, jege-jegele kati enti wé metuh.

13 Cubeen-cubeen si irasanen kam oyale cubeen si biese, si gere mulebihi kekueten manusie. Sebeb Allah setie den kerna oya Wé gere malé mudaténen kam icubei muliweti kekuetenmu. I waktu kam icubei Wé malé munosanen ku kam jelen tangkuh, kati kam sangup betehen munangungé.

14 Kerna oya sudere-sudere si kukasihi, gipile penyemahen berhala.

15 Aku becerak ku kam sebagé jema si bijaksana. Petimangenle kendiri hana si kuperinen ni.

16 Gere ke cawan si atasé kite mungucep sukur, oyale persekutuen urum rayoh Kristus? Nume ke ruti si kite pecah-pecahen oyale persekutuen urum tubuh Kristus?

17 Kerna ruti oyale sara, jadi kite, seger pé delé, tapé sara tubuh, kerna kite bèwèné mudepet bagien wan ruti si sara oya.

18 Peratinenle bengsa Israel munurut usi: nume ke pakea si mangan sana si ipesemahen mudepet bagien wan pelayanen mesbah?

19 Hana ke si kumeksud urum pecerakan oya? Pesemahen berhala wa muarti ke?

20 Nume! Sana si kumeksud oyale, bahwa pesemahen pakea oyale pesemahen ku roh-roh jahat, nume ku Allah. Den aku gere mera, bahwa kam besekutu urum roh-roh jahat.

21 Kam gere nguk minum ari cawan Tuhen den cawan roh-roh jahat. Kam gere lepas mudepet bagien wan pejamuen Tuhen den wan pejamuen roh-roh jahat pé.

22 Atawa mera ke kite mubangkiten cemburu Tuhen. Lebih kuet ke kite ari Wé?

23 ”Segele sesanah ienguken.” Betul, tetapé gere segele sesanah mupaedah. “Segele sesanah ienguken.” Betul, tetapé gere segele sesanah mubangun.

24 Enti sara jema pé si mungenal kepentingené kendiri, tetapé kenaké jep jema mungenal kepentingen jema lèn.

25 Kam nguk mangan segele sesanah si ijuel i pasar dengké den gere daléh  iperikse kam kerna perasaen até.

26 Kerna: “bumi urum bèwèné isié oyale empu ni Tuhen.”

27 Ike kam iangon jema si gere berimen kin mangan, den kam munerimeé, panganle sanah pé si iedangen kin kam, gere daléh iperikse kam kerna perasaen até.

28 Tetapé ike ara jema mumerin ku kam: “Pemanganan a nge ipesemahen kin berhala,” entile ipangan ko, entap ni jema si mumerinen oya ku ko den kerna kebereten até nurani.

29 Meksudku: Nume kebereten atému kendiri melènen kebereten ate ni jema lèn. Mungkin ara jema si mumerin: “Hana kati kebebasenku turah itentunen kebereten até nurani jema lèn?

30 Ike aku mungucep sukur atas bagienku si kupangan, hana kati jema mumerin jahat tentang aku kerna pemanganan si atasé  aku mungucep sukur?”

31 Aku mujeweb: Ike ko mangan atawa ike ko minum, atawa ike ko mubueten sesanah si lèn, buetenle bèwèné oya kin kemulieen Allah.

32 Entile jema lèn mujadi bedosa kerna pebuetenmu, bier urang Yahudi, bier pé urang Yunani, den bier pé jemaat Allah.

33 Dis lagu aku pé berusaha munyenangen até bèwèné jema wan segele hal, nume kin kepentingen diriku, tetapé kin kepentingen jema delé, kati pakea lepas iselamaten