1 Korintus 14

Seger mi tentang karunie Roh

14:1-25

Dedikle kasih oya den usahanenle dirimu mudepet karunie-karunie Roh, khususé  karunie kin benubuat.

2 Sahan si becerak urum basa roh, gere becerak ku manusie, tetapé ku Allah. Sebeb gere ara sara jema pé si mungerti basaé; urum Roh wé mungucepen hal-hal si resie.        

3 Tetapé sahan si benubuat, wé becerak ku manusie, wé mubangun, munasèhati den muhibur.

4 Sahan si becerak wan basa roh, wé mubangun dirié kendiri, tetapé sahan si benubuat, wé mubangun Jemaat.

5 Aku mera, kati kam bèwèné becerak wan basa roh, tetapé lebih ari oya, kati kam benubuat. Sebeb jema si benubuat lebih murege bidak jema si becerak wan basa roh, kecuali ike jema wa pé lepas muartinené, sehinge Jemaat lepas ibangun.

6 Jadi, sudere-sudere, ike aku gèh ku kam nye becerak wan basa roh, hana ke paedahé bagi kam, ike aku gere munyawahen ku kam penyataen Allah atawa pemetihen atawa nubuat, atawa penejeren?

7 Hal ini dis lagu perkakas-perkakas si gere bejiwe tapé ara lingé, lagu seruling urum kecapi - kune ke jema nguk mubetihi lagu sana si si iménen seruling atawa kecapi ike roané gere munangkuhen ling si mubèda?

8 Atawa, ike trompet gere munangkuhen ling si jelas, sahan ke si munyiepen dirié kin beperang?

9 Betapé urum kam si becerak urum basa roh: ike kam gere mugunen kata- kata si jelas, kune ke jema lepas mungerti hana si iperin kam. Cerakmu  a  sie-sie pelin iucepen kam i udara .

10 I denie ni ara beta deléwé jenis basa, den sara pé gera ara ling si gere  muarti.

11 Tetapé ike aku gere mungerti basa oya, aku mujadi jema asing bagi wé si mugunené den wé jema asing bagiku.

12 Betapé urum kam: Kam memang berusaha kin mudepet karunie-karunie Roh, tetapé lebih ari oya kenaké kam berusaha mugunené kin mubangun Jemaat.

13 Kerna oya sahan si becerak wan basa roh, wé turah bedoà kati ku wé pé iosanen karunie kin muartinené.

14 Sebeb ike aku bedoà urum basa roh, rohkule  si bedoà, tetapé akal budiku gere turut bedoà.

15 Jadi hana ke si turah kubueten? Aku malé bedoà urum rohku, tetapé aku pé malé bedoà urum akal budiku; aku malé benyanyi urum rohku, tetapé aku pé malé benyanyi urum akal budiku.

16 Sebeb, ike ko mungucep sukur urum rohmu pelin, kune ke jema biese si ara i oné si mumengéé lepas mumerin “amin” atas ucepen sukurmu? pedahal wé gere mungerti sana si icerakan ko?

17 Sebeb bier pé pengucepen sukurmu a olok jeroh, tetapé jema lèn gere ibangun imené.

18 Aku mungucep sukur ku Allah, bahwa aku becerak wan basa roh lebih bidak kam bèwèné.

19 Tetapé waktu Jemaat mukamul aku lebih mera mungucepen lime kata si lepas ipehemi kin munejer jema si lèn, bidak muribu-ribu kata urum basa roh.

20 Sudere-sudere, entile lagu kekanak wan pemikirenmu. Jadile kekanak wan kejahaten, tetapé jema kul wan pemikirenmu!

21 Wan hukum Taurat ara itulisen: “Mulalui jema si becerak basa asing den urum awah jema asing Aku malé becerak ku bengsa ini, tapé bier pé lagu noya pakea gere malé mumengénen Aku,” iperin Tuhen.

22 Kerna oya karunie basa roh oyale tene, nume kin jema berimen, tetapé kin jema si gere berimen; tetapé karunie benubuat oyale tene, nume kin jema si gere berimen, tetapé kin jema si berimen.

23 Jadi, ike seluruh Jemaat murum mukamul den jep jema becerak wan basa roh, renye mayole jema ari deret atawa jema si gere berimen, gere ke pakea melé mumerin bahwa kam gile?

24 Tetapé ike bèwèné tengah benubuat, renye mayole jema si gere berimen atawa jema ayu, wé malé iterangi den iyakinen tentang bèwèné oya,

25 sehinge segele resie si ara i wan atéwé malé mujadi nyata, den wé malé sujut munyemah Allah den mungaku: “Sunguh, Allah ara i lah ni kam.”

Peraturen waktu Jemaat mukamul  14:26-40

26 Jadi kune se ni, sudere-sudere? Waktu kam mukamul, kenaké jep jema mupesemahen sesanah: si sara mazmur, si lèn penejeren, atawa penyataen Allah, atawa karunie basa roh, atawa karunie kin muartinen basa roh, tetapé bèwèné a turah igunen kin mubangun.

27 Ike ara si becerak wan basa roh, daténle roa atawa paling delé tulu jema, den sara sara, turahle ara sara jema si lèn kin muartinené.

28 Ike gere ara jema si muartinené , kenaké pakea ongot pelin wan perkumpulen Jemaat den ku dirié kendiri urum ku Allah pelinle pakea nguk becerak.

29 Tentang si benubuat, sebaiké roa atawa tulu jema i antaraé becerak den si lèn mupetimangen sana si icerakan pakea.

30 Tetapé ike sara jema si kunul i oné mudepet penyataen, si pemulo a turahle ongot.

31 Sebeb kam bèwèné nguk bernubuet sara sara, sehinge kam bèwèné lepas belejer den mudepet kekuaten.

32 Karunie nabi takluk ku nabi-nabi.

33 Sebeb Allah gere mungenaki karu, tetapé demé sejahtera.

34 Dis lagu wan bèwèné Jemaat jema kudus, jema banan turah ongot wan perkumpulen Jemaat. Sebeb pakea gere ienguken kin becerak. Pakea turah munungkuken diri lagu si iperinen hukum Taurat.

35 Ike pakea ménét mubetihi sesanah, jerohé pakea mungunei hal oya ku amané  i umah. Sebeb gerele sopan bagi jema banan becerak wan perkumpulen Jemaat.

36 Ari kam ke asalé firman Allah? Atawa ku kam pelin ke firman Allah oya isawahen?

37 Ike sara jema muanggap dirié nabi atawa jema si mudepet karunie rohani, wé turah seder, bahwa sana si kuperinen ku kam ni oyale perintah Tuhen.

  38 Tetapé ike wé gere mupedulinené, entile kam mupedulinen wé.

39 Kerna oya, sudere-suderengku, usahanenle dirimu kin mudepet karunie kin benubuet den entile mungoai jema si becerak urum basa roh.

40 Tetapé segele sesanah turah ibueten urum sopan den teratur.