1 Korintus 5

Dosa wan jemaat 5:1-13

Memang ipengé jema bahwa ara dosa pencabulen i antara kam, oyale pencabulen si gere idepeti seger pé i antara bengsa si gere mubetihi Allah oyale bahwa ara jema si murip urum banan ni amaé.

2 Bier pé lagu noya kam somong. Gere ke lebih patut kam besedih den jema si mubueten dosa oya turah ipesiren ari antara ni kam.

3 Sebeb aku, bier pé secara bedeni gere ara murum kam tetapé secara rohani aku ara urum kam, aku - dis lagu waktu aku urum kam nge munetuhen hukumen atas wé, si nge mubueten hal si lagu noya.

4 Waktu kam mukamul, aku mera bebuet seakan aku murum urum kam, urum kuasa Yesus,Tuhente,

5 jema oya turah kite serahen wan geral Tuhen Yesus ku Belis, sehinge tubuhé benasa kati rohé iselamaten i lo Tuhen.

6 Gere patut kam murasa somong. Gere ke betih kam bahwa tikik ragi  mumarinasi seluruh adonen?

7 Tekarenle ragi si tue oya, kati kam mujadi adonen si ayu, sebeb kam memang gere muragi. Sebeb anak bebiri Paskahte pé nge igelih, oyale Kristus.

8 Kerna oya entahle kite munaranen perayaen Paskah nume urum ragi si tue, nume pé urum ragi dosa den kejahaten, tetapé urum ruti si gere muragi, oyale kemurnien den kebenaran.

9 Wan suretku nge kutulisen ku kam, kati kam enti bepong urum jema-jema cabul.

10 Si kumeksud numele urum bèwèné jema cabul secara umum ari denie ni atawa urum bèwèné jema pekelit den penilet atawa urum bèwèné penyemah berhala, kerna ike lagu noya kam turah munaringen denie ni.

11 Tetapé si kutulisen ku kam oyale, kati kam enti bepong urum jema, si bier pé munyebut dirié sudere, sebenaré jema cabul, pekelit, penyemah berhala, tukang fitnah, pemabuk, tukang cilet; urum jema si lagu noya entile kam mangan murum.

12 Sebeb urum kuasa sana ke aku muhakimi pakea, si ara i deret ni jemaat? Nume ke kam muhakimi pakea si ara i wan jemaat?

13 Pakea si ara i deret jemaat malé ihakimi Allah. Jadi, usirle jema si jahat oya ari antara ni kam.