1 Korintus 9

Hak den kewajiben rasul

9:1-27

Nume ke aku rasul? Nume ke aku jema bebas? Nume ke aku nge munèngon Yesus Tuhente? Nume ke kam ni oyale uah buetku i was Tuhen?

2 Seger pé kin jema lèn aku numele rasul, tetapé kin kam aku oyale rasul. Sebeb muripmu wan Tuhen oyale meteré  ari kerasulenku.

3 Inile pembelaenku terhedep pakea si mungeritik aku.

4 Gere ke kami munempui hak kin mangan urum minum?

5 Gere ke kami munempui hak kin mumai banan kami si berimen wan pejelenen kami lagu si ibueten rasul-rasul lèn den sudere Tuhen den Kefas?

6 Atawa aku urum Barnabas pelin ke si gere munempui hak kin ibebasen ari buet ni pumu?

7 Sahan ke si pernah turut beperang atas biayaé kendiri? Sahan ke si munyuen empus anggur den gere mumangan uahé? Atawa sahan ke si mumeralai bebiri den gere muminum sesué?

8 Sana si kucerakan ni numele pikiren ni manusie pelin we. Nume ke hukum Taurat pé mumerin lagu noya?

9 Sebeb wan hukum Musa ara itulis: “Entile ko munikot awah ni lemu si tengah bebuet!” Lemu ke si iperatinen Allah?

10 Atawa kite ke si imeksud-É? Betul, kin kitele hal ini itulis. Jema si mubueten umeé turah mubuetené wan pengharapen, den jema si nuling we munuling urum pengharapen  kin mudepet bagiené.

11 Jadi, ike kami nge munyuken inih rohani kin kam, belebihen ke ike kami munuling hasil deniewi ari kam?

12 Ike jema lèn munempui hak kin muharapen hal oya ari kam, gere ke kami munempui hak si lebih kul? Tetapé kami gere mugunen hak oya. Sebaliké kami munangung segele sesanah, kati kami enti munaranen rintangen kin pengeberen Injil Kristus.

13 Gere ke betih kam, bahwa pakea si mulayani wan umah Allah mudepet pemanganan ari umah Allah, den pakea si mulayani i mesbah mudepet bagien ni pakea ari mesbah oya?

14 Betapé Tuhen nge munetapen, bahwa pakea si mungeberen Injil, turah murip ari pengeberen Injil oya.

15 Tetapé aku gere pernah mugunenen sara pé ari hak-hak oya. Aku gere munulis ini kati ku aku pé ibueten lagu noya. Sebeb aku lebih mera maté bidak mosop kemegahenku. Sunguh kemegahenku gere lepas iosopen sahan pé!

16 Sebetulé ike aku mungeberen Injil, gere ara hakku kin mumegahen diri. Sebeb, hal oya seturehé kin aku. Celakale aku ike aku gere mungeberen Injil.

17 Kerna ike aku mubuetené atas kenakku kendiri, memang aku berhak munerime upah. Tetapé kerna aku mubuetené nume munurut kenakku kendiri, pengeberen a oyale tuges si ipercayanen ku aku.

18 Ike lagu noya hana ke upahku? Upahku oyale ini: bahwa aku nguk mungeberen Injil tanpa upah, den bahwa aku gere mugunenen hakku sebagé jema si mungeberen Injil.

19 Sunguh pé aku bebas terhedep bèwèné jema, aku mujadinen diriku hamba ari bèwèné jema, kati aku lepas mumenangen lebih delé jema.

20 Betale  bagi urang Yahudi aku mujadi lagu urang Yahudi, kati aku mumenangen urang-urang Yahudi. Bagi jema si murip i tuyuh hukum Taurat aku mujadi lagu jema si murip i tuyuh hukum Taurat, seger pé aku kendiri gere murip i tuyuh hukum Taurat, kati aku lepas mumenangen pakea si murip i tuyuh hukum Taurat.

21 Bagi jema si gere murip i tuyuh hukum Taurat aku mujadi lagu jema si gere murip i tuyuh hukum Taurat, seger pé aku gere murip i deret hukum Allah, kerna aku murip i tuyuh hukum Kristus, kati aku lepas mumenangen pakea si gere murip i tuyuh hukum Taurat.

22 Bagi jema-jema si lemah aku mujadi lagu jema si lemah, kati aku lepas munyelamaten jema si lemah. Begi bèwèné jema aku nge mujadi segeleé, kati aku selepas mungkin mumenangen pepien ari antara pakea.

23 Segele sesanah ini kubueten kerna Injil, kati aku mudepet bagien i wasé.

24 Gere ke betih kam, bahwa bèwèné jema si tengah musangka was perlombaen, bèwèné turut musangka, tetapé bahwa sara jema we si mudepet hadiah. Kerna oya musangkale sejeroh mungkin, kati kam menang.

25 Jep jema si turut munuet bagin wan petandingen, munguasai dirié wan segele hal. Pakea bebuat lagu noya kin mudepet sara mahkota si fana, tetapé kite kin mudepet sara mahkota si abadi.

26 Kerna oya aku gere musangka tanpa tujuen , den aku numele petinju si asal-asalen mudere.

27 Tetapé aku mulatih tubuhku den munguasaié seluruhé, kati nge mari mungeberen Injil ku jema lèn, enti aku kendiri gere iterime.