1 Petrus 1

Salam 1:1-2

Ari Petrus, rasul Yesus Kristus, ku jema-jema si gèh si tesebar i Pontus, Galatia, Kapadokia, Asia Kucak, den Bitinia,

2 si tepilih sesué urum rencana Allah, Amante, den si ikudusen Roh, kati taat ku Yesus Kristus den munerime sempiren rayoh-E, kireé kasih karunie den damé sejahtera makin mulimpah atas kam.

Pengharapen, imen den kasih 1:3-12

3 Terpujile Ama den Tuhente Yesus Kristus, si kerna rahmat-E si kul nge mujadinen kite ayu ari kerna kebangkiten Yesus Kristus ari antara jema benasa, sehinge kite munerime sara murip si engkip pengharapen,

4 den munerime sara warisen si gere lepas benasa, murni,  den si gere lepas layu , si ikemas i serge kin kam.

5 Oyale kam si iperalai wan kekueten Allah kerna imenmu dang-dang kam munantinen keselamaten si nge siep kin inyatanen i akhir jemen.

6 Begegalakle kerna hal oya, seger pé se ni ini kam sekejep turah besedih ari bebagé ujien.

7 Meksud bèwèné oya, kin mubuktinen kemurnien imenmu - si gip lebih atas nilaié ari emas si fana, si iuji kemurniené urum rara, - sehinge kam mudepet pujien den kemulieen den kehormaten i lo Yesus Kristus munyatanen diri-É.

8 Seger pé kam gere ilen pernah munèngon Wé tapé kam mungasihi-É. Kam  percaya ku Wé bier pé kam se ni gere munèngon-É, den kam olok begegalak kerna sukacite si mulie den si gere tecerakan.

9 Kerna kam nge sawah ku tujuen imenmu, oyale keselamaten jiwemu.

10 Keselamaten oyale si iselidiki den iteliti nabi-nabi si nge benubuat tentang kasih karunie si nge itujunen kin kam.

11 Den pakea muneliti waktu si sihen den si kune si imeksud Roh Kristus si ara i wan pakea, oyale Roh si sebelemé munosah kesaksien tentang segele kesengsaraen Kristus den  tentang segele kemulieen-É, si gèh mari oya.

12 Ku pakea nge inyatanen, bahwa pakea  nume mulayani diri pakea kendiri, tetapé mulayani kam urum segele sesanah si nge ikeberen se ni ku kam urum perantaraen pakea, ari Roh Kudus, si iutus ari serge, munyawahen keber Injil ku kam, oyale hal si ménét ibetihi malèkat-malèkat.

Kekudusen den kasih pesuderen  1:13-25

13 Sebeb oya siepenle akal budimu, jege-jegele den obonenle pengharapenmu seengkipé atas kasih karunie si ianugerahen ku kam i waktu penyataen Yesus Kristus.

14 Muriple sebagé kekanak si taat den enti turuti hewe nepsu  si munguasai kam i waktu keogohenmu.

15 Tetapé kenaké kam mujadi kudus i wan seluruh muripmu dis lagu Wé si kudus, si nge munalu kam,

16 sebeb ara tertulis: “Kudusle kam sebeb Aku kudus.”

17 Den ike kam munyebut-É Ama, oyale Wé si tanpa mumanang rupe muhakimi bèwèné jema munurut bueté, kenaké kam murip wan keterihen selama kam munumpang i denie ni.

18 Sebeb betih kam, bahwa kam nge itebus ari cara muripmu si sie-sie si iwarisi kam ari muyang datumu a nume urum barang si fana, nume urum pirak atawa emas,

19 melènen urum rayoh si mal, oyale rayoh Kristus si dis lagu rayoh anak ni bebiri si gere munoda den gere becacat.

20 Wé nge ipilih sebelem denie ijadinen, tetapé entap kam barole munyatanen diri-É i akhir jemen.

21 Mulalui Wé le kam percaya ku Allah, si nge mubangkiten Wé ari antara jema benasa den si nge mumulienen-É, sehinge imenmu den pengharapenmu tetuju ku Allah.

22 Sebeb kam nge munyucinen dirimu urum ketaaten ku kebenaren, sehinge kam lepas mungamalen kasih pesuderen si tulus ikhlas, kenaké kam besunguh saling mungasihi urum segenap atému.

23 Kerna kam nge ilahiren mien nume ari inih si fana, tetapé ari inih si gere fana, ari firman Allah si murip den si kekal.

24 Sebeb:

“Bèwèné si murip

lagu kerpé

den bèwèné kemuliené

lagu  bunge ni kerpé,

kerpé mujadi layu,

den bungeé pé gugur,

25 tetapé firman Tuhen tetap kin selamaé.”

Inile firman si isawahen Injil ku kam.