1 Petrus 2

Yesus Kristus atu penjuru 2:1-10

Kerna oya tekarenle bèwèné kejahaten, bèwèné tipu muslihat den bèwèné kemunapekan, kedengkien den fitnah.

2 Den jadile dis lagu bayi si ben lahir, si dor ménét kin wih susu si asli  den si rohani, kati ari oya kam murip den mudepet keselamaten,

3 ike kam betul-betul nge munyecép kejerohen ni Tuhen.

4 Den gèhle ku Wé, atu si murip oya si memang itekar manusie, tetapé si ipilih den ihormati i hedepen ni Allah.

5 Den daténle kam pé ipegunen sebagé atu murip kin pembangunen sara umah rohani, kin sara imamat kudus gune mupesemahen pesemahen rohani si kerna Yesus Kristus bekenak  ku Allah.

6 Sebeb ara tertulis wan Kiteb Suci: “Sesunguhé Aku munobonen

i Sion sara atu si terpilih,

sara atu penjuru

si mal,

den sahan si percaya

ku Wé gere malé

ipekemél.”

7 Kerna oya, bagi kam si percaya, Wé mal, tetapé bagi pakea si gere percaya:

“Atu si nge itekar

tukang bangunen,

nge mujadi atu penjuru,

nge mujadi atu

si munos jema

museltu.

8 Pakea museltu entap Wé, kerna pakea gere taat ku firman Allah; den kin oya pakea pé nge isiepen.

9 Tetapé kamle bengsa si terpilih, imem-imem ni Reje, bengsa si kudus, umat empu ni Allah kendiri, kati kam mungeberen pebueten si kul ari Wé, si nge munalu kam tangkuh ari kegelepen ku terang-É si ajaib: 

10 kam si tengaha nume umet

ni Allah,

tetapé si se ni nge

mujadi umet-É,

si tengaha gere ikasihi

tetapé si se ni nge

mudepet belas kasihen.

Peringeten kati murip sebagé hamba Allah 2:11-17

11 Sudere-sudere si kukasihi, aku munasèhati kam, kati sebagé jema si gèh den peranto kam mugipen diri ari kenak ni usi si bejuang mulewen jiwe.

12 Empuile cara murip si jeroh i lelah bengsa-bengsa si nume Yahudi, kati ike pakea mufitnah kam sebagè jema durhaka, pakea lepas munèngoné ari pebuetenmu si jeroh den mumulienen Allah i lo Wé munentongi pakea.

13 Patuhle kerna Tuhen, ku bèwèné pemerintah i denie ni, ku reje si munamat kekuasaen si paling atas,

14 atawa pé ku wali-wali si iutusé kin munukum jema si bebuet jahat den muhormati jema si bebuat jeroh.

15 Sebeb inile kenak ni Allah, kati urum bebuet jeroh, kam munutup awah ni jema udel was kesomongené.

16 Muriple sebagé jema merdéka den nume lagu pakea si munyalah gunenen kemerdekaen oya kin munutupi kejahaten-kejahaten ni pakea, tetapé muriple sebagé hamba Allah.

17 Hormatile bèwèné jema, kasihile sudere-suderemu, terihle kin Allah, hormatile reje.

Penderiteen Kristus sebagé teleden 2:18-25

18 Kam temuluk-temuluk, taatle kin rejemu urum segele hormat nume ku si jeroh den peramah pelin we, tetapé ku si jahat pé.

19 Sebeb oyale kasih karunie, ike sara jema kerna sadar kin kenak ni Allah munangung penderiteen si gere turah itangungé.

20 Sebeb nguk ke isebut pujien, ike kam muderite kerna kam bebuet dosa? Tetapé ike kam bebuet jeroh den kerna oya kam turah muderite, oyale kasih karunie Allah.

21 Sebeb kin oyale kam italu, kerna Kritus pé nge muderite kin kam, den nge munaringen teleden kin kam, kati kam mununungi jejak-É.

22 Wé gere bebuet dosa, den cerak cogah gere ara wan awah-É.

23 Ketike Wé ihine, Wé gere mubeles urum hineen, ketike Wé muderite, Wé gere munancam,tetapé munyerahené ku Wé si muhakimi urum adil.

24 Wé kendiri nge munarang dosante i wan beden-É i kayu salib, kati kite si nge benasa terhedep dosa, murip kin kebenaran, entap ni luke-luke-È kam nge jeger.

25 Sebeb tengah a kam sesat lagu bebiri, tetapé se ni kam nge ulak ku gembala den pemerala jiwemu.