1 Petrus 3

Murip rawan banan 3:1-7

Betapé kam banan-banan taatle ku rawanmu, kati ike ara i antara pakea si gere taat ku firman oya, pakea  nguk imenangen urum pebueten ni banané tanpa cerak,

2 waktu pakea munèngon, kune murni den salehé murip banané a.

3 Perhiesenmu entile secara lahiriah, enti olok tu murempil wuk, mumaké perhiesen emas atawa mumaké pekayan si belangi.

4 Tetapé perhiesenmu oyale manusie batiniah si tetuni urum perhiesen si gere benasa si asalé  ari roh si lemah lemut den tentram, si olok murege i mata ni Allah.

5 Sebeb lagu noyale caraé banan-banan kudus tengaha besolèk, oyale banan-banan si munobon pengharapané ku Allah; pakea taat ku rawané,

6 dis lagu Sara taat ku Abraham den mugeralié rejeé. Den kamle anak-anaké, ike kam bebuet jeroh den gere terih kin ancamen.

7 Betapé kam rawan-rawan,  muriple bijaksana urum bananmu, sebagé kaum si lebih lemah! Hormatile pakea sebagé pong pewaris ari kasih karunie murip si ayu, kati doàmu enti terhalang.

Kasih den damé 3:8-12

8 Den akhiré, kenaké kam bèwèné sara cerak seperasaen, mungasihi sudere, penyayang den renah até.

9 Den entile mubeles kejahatan urum kejahatan atawa caci maki urum caci maki, tetapé sebaliké, kenaké kam muberkati, kerna kin oyale kam italu, oyale kin mudepet berkat, sebeb:

10 Sahan si mera mungenaki

murip

den mera munèngon lo

 si jeroh,

wé turah mujege dèlahé

terhedep si jahat

den bibiré terhedep

ucepen si ilet.

11 Wé turah mugipi si jahat

den mubueten si jeroh,

wé turah mungenal pedamén

den berusaha

mudepetené.

12 Sebeb mata Tuhen tetuju

ku jema benar,

den kemiring-É muke ku

teniron ni

pakea,

tetapé salak Tuhen munentang

jema si bebuet jahat.

Muderite urum seber 3:13-4:6

13 Den sahan ke si malé bebuet jahat terhedep kam ike kam bebuet jeroh?

14 Tetapé seger pé kam turah muderite kerna kebenaran, kam malé mubahgie. Sebeb oya entile kam terih den gentar ku sahan pé.

15 Tetapé kudusenle Kristus i wan atému sebagé Tuhen! Den siep sediele i segele waktu kin munosah jeweb ku pakea si mungune ku kam tentang pengharapen si ara i kam, tetapé buetenle oya urum lemah lemut den hormat,

16 den urum até nurani si murni, kati pakea si mufitnah kam kerna muripmu si saléh wan Kristus, mujadi kemél kerna fitnahen paké oya.

17 Sebeb lebih jeroh muderite kerna bebuet jeroh, ike hal oya ikenaki Allah, bidak muderite kerna bebuet jahat.

18 Sebeb Kristus pé nge benasa seger kin segele dosante, Wé si benar kin jema-jema si gere benar, kati Wé munemah kite ku Allah; Wé, si nge iunuh wan keadaen-É sebagé manusie, tetapé si nge ibangkiten munurut Roh.

19 I wan Roh oya pé Wé beluh mungeberen Injil ku roh-roh si i wan penjere,

20 oyale ku roh-roh pakea si tengaha i masa  Nuh gere taat ku Allah, ketike Allah tetap munantin urum seber waktu Nuh tengah munyiepen peraué si kul, isihen tikik we, waluh jema, si iselamaten ari banjir si kul oya.

21 Wih oya gamaren ari baptisen sì munyelamaten kam se ni. Baptisen oya nume kin mubersihen kenajisen jasmani, melènen sebagè janyimu ku Allah ari até nurani si jeroh . Baptisen oya munyelamaten kam mulalui kebangkiten Yesus Kristus  ari kematénen,

22 si kunul i semelah kuen Allah, nge mari Wé nik ku serge, nge mari bèwèné malèkat, kuasa den kekueten itakluken ku Wé.