1 Petrus 4

Jadi, kerna Kristus nge muderite secara bedeni, kam pé turah mungueten dirimu urum pikiren si lagu noya. Sebeb jema si nge muderite secara bedeni, nge teduh bebuet dosa.

2 Kati waktu si taring enti igunen kam kin mubueten kenak ni manusie, tetapé munurut kenak ni Allah.

3 Sebeb nge delé waktu igunen kam kin mubueten kenak ni jema si gere mubetihi Allah, kam nge murip wan bebagé hewe nepsu, pencabulen, kemabuken, pesta pora, pejamuen minum den penyemahen berhala si ikoai.

4 Sebeb oya pakea hèran bahwa kam gere murum urum pakea i wan segele kejahaten si gere mubatas, den pakea mufitnah kam.

5 Tetapé pakea turah munosah petangung jeweben ku Wé si nge sedie muhakimi bèwèné jema si murip den si benasa.

6 Oyale sebebpé Injil nge ikeberen ku jema benasa pé, kati pakea,dis lagu bèwèné jema, ihakimi secara bedeni; tetapé mulalui roh lepas murip munurut kenak ni Allah.

Murip ni jema percaya 4:7-11

7 Peremèhen segele sesanah nge rap, kerna oya kuasaile dirimu den jadile tenang, kati kam lepas bedoà.

8 Tetapé si paling penting, besunguh le mungasihi sara urum si lèn, sebeb kasih munutupi delé dosa.

9 Osanle tumpangen sara urum si lèn urum gere cebebék.

10 Layanile sara urum si lèn, sesué urum karunie si nge iterime tiep jema sebagé penatur si jeroh ari kasih karunie Allah.

11 Ike ara jema si becerak, daténle wé becerak sebagé jema si munyawahen firman Allah; ike ara jema si mulayani, jerohé wé mubuetené urum kekueten si ianugerahen Allah, kati Allah imulienen i wan segele sesanah kerna Yesus Kristus. Wéle si empu kemulieen den kuasa sawah selamaé! Amin.

Muderite sebagé jema percaya      4:12-19

12 Sudere-sudere si kukasihi, entile kam hèran tentang rara sikseen si gèh ku kam sebagé ujien, lagu ara sesanah si luer biese terjadi atas kam.

13 Sebaliké besukacitele sesué urum bagien si iterime kam wan penderiteen Kristus, kati kam pé nguk begalak den besukacite i waktu Wé munyatanen kemulieen-É.

14 Begegalakle kam, ike kam icela kerna geral Kristus, sebeb Roh kemulieen, oyale Roh Allah ara i kam.

15 Entile ara i antara ni kam si muderite sebagè penunuh atawa perusuh atawa penjahat, atawa pengaco.

16 Tetapé ike wé muderite sebagé jema percaya, entile wé kemél melènen kenaké wé mumulienen Allah wan geral Kristus oya.

17 Kerna se ni nge sawah saaté penghakimen imuloi, den i umah Allah kendirile si turah pemulo ihakimi. Den ike penghakimen oya imuloi ari kite, kune jadié urum pakea si gere percaya ku Injil?

18 Den ike

jema benar gere malé iselamaten

hanake si malé terjadi

urum jema fasik den jema bedosa?

19 Kerna oya kenaké pakea si turah muderite kerna kenak ni Allah, munyerahen jiweé ku Pencipte si setie sesire dor bebuet jeroh.