1 Petrus 5

Peralaile kawanan bebiri ni Allah 5:1-11

Aku munasèhati penetue si ara i antara kam, aku sebagé pong penetue den saksi penderiteen Kristus si malé munerime bagien wan kemulieen si malé inyatanen puren.

2 Peralaile kawanan bebiri ni Allah si ara i ko, enti urum paksa tapé urum sukarela sesué urum kenak ni Allah, den enti kerna mera mungenal keuntungen, tetapé urum pengabdien diri.

3 Entile ko bebuet seakan ko malé mumerintah atas pakea si ipercayanen ku ko, tetapé kenaké ko mujadi teleden kin kawanan oya.

4 Sehinge ketike Gembala Agung oya gèh, kam malé munerime mahkota kemulieen si gere lepas layu .

5 Betapé kam jema-jema mude taatile jema si tue. Den kam bèwèné, renahenle dirimu sara ku si lèn, sebeb: “Allah munentang jema somong,

tetapé mungasihi jema si renah até.”

6 Kerna oya renahenle dirimu i tuyuh pumu Tuhen si kuet, kati kam iatasen-É i waktué.

7 Serahenle bèwèné macik ni atému ku Wé, sebeb Wé si mumeralai kam.

8 Sederle den bejegele! Lewenmu Belis remalan bekeliling dis lagu kule si mungaum den mungenal jema si lepas idoloté.

9 Lewenle wé urum imen si teguh, sebeb betih kam suderemu i seluruh denie munangung penderiteen si dis.

10 Den Allah asal ni segele kasih karunie, si nge munalu kam wan Kristus ku kemulieen-É si kekal, malé mulengkapi, muneguhen, mungueten den mungokohen kam nge mari kam muderite sekejep waktu.

11 Wé le si empu ni kuasa sawah selamaé! Amin.

Salam 5:12-14

12 Urum perantaraen Silwanus, si kuanggap sebagè sudere si lepas ipercayai, aku munulis urum singket ku kam kin munasèhati den muyakinen kam, bahwa inile kasih karunie si betul-betul ari Allah, sesukle teguh i wasé!

13 Salam ku kam bèwèné ari pongmu si terpilih si i Babilon , den ari Markus pé anakku.

14 Osanle salam sara ku si lèn urum cum si kudus. Damé sejahtera munyertai kam bèwèné si ara i wan Kristus. Amin.