1 Tesalonika 1

Salam 1:1

Ari Paulus, Silwanus urum Timotius ku jemaat Tesalonika i wan Allah Ama den i wan Tuhen Yesus Kristus. Kasih karunie den damé sejahtera munurumi kam.

Uah pengeberen Paulus 1:2-10

2 Kami sabé mungucep sukur ku Allah kerna bèwèné kam den munyebut kam i wan doa ni kami.

3 Sebeb kami dor muninget buet imen ni kam, usaha kasihmu urum ketekunen pengarapenmu ku Tuhente Yesus Kristus i hedepen Allah den Ama te.

4 Den kami betih, hei sudere-sudere si i kasihi Allah, bahwa Wé nge mumilih kam.

5 Sebeb Injil si kami keberen nume isawahen kin kam urum peceraken pelin, tetapé urum kekueten Roh kudus pé den urum sara kepastien si kuet. Memang betih kam, kune kami bebuet  kin kam.

6 Den kam nge mujadi penurut kami den penurut ni Tuhen; den wan penindasen si beret kam nge munerime firman oya urum sukacite si ibueten Roh Kudus,

7 sehinge kam nge mujadi teleden kin bèwèné jema si percaya i daerah Makedonia den Akhaya.

8 Kerna ari antara ni kam firman Tuhen mulentayon nume  i Makedonia urum Akhaya pelin, tetapé i segele tempat nge tesier keber tentang imenmu ku Allah, sehinge kami gere daléh mumerinen sanah pé tentang hal oya.

9 Sebeb pakea kendiri becerak tentang kami, kune kam munyamut kami den kune kam bebalik ari berhala-berhala ku Allah kin melayani Allah si murip den si benar,

10 den kin munantinen gèh  ni Anak-É ari serge si nge ibangkiten-É ari antara jema benasa, oyale Yesus, si munyelamaten kite ari murke si malé gèh .