1 Tesalonika 2

Pelayanan Paulus i Tesalonika 2:1-12

Kam kendiri pé memang mubetihi, sudere-sudere bahwa kegèhen ni kami  i antara ni kam gerele sie-sie.

2 Tetapé bier pé kami sebelemé, lagu betih kam, nge ianiaya nye ihine i Pilipi , tapé urum petulungen Allahte, kami mudepet keberanien kin mungeberen Injil Allah kin kam wan pejuangen si beret.

3 Sebeb nasèhat kami gere lahir ari kesesaten atawa ari meksud si gere murni den gere pé isertai tipu daya.

4 Sebaliké, kerna Allah nge muanggap kami layak kin mupercayanen Injil ku kami, kerna oyale kami becerak, nume kin munyenangen manusie melènen kin munyenangen Allah si munguji até kite.

5 Kerna kami gere pernah becerak jeroh pelin - hal oya betih kam - den gere pernah munempui meksud loba si mutuni - Allahle saksi -

6 gere pernah pé kami mungenal pujien ari manusie, ari kam den ari jema lèn pé, bier pé  kami nguk bebuet lagu oya sebagé rasul-rasul Kristus.

7 Tetapé kami bebuet ramah i antara ni kam, dis lagu sara ine mumeralai den murawati anak-anaké.    

8 Betale kami, was kasih sayang si kul kin kam, nume rela mubagi Injil Allah pelin kin kam, tetapé murip kami kendiri pé kin kam, kerna kam nge kami kasihi.

9 Sebeb kam inget ilen, sudere-sudere, usaha urum kejang payah kami. Sesire kami bebuet porak lo kelem, kati enti mujadi beben bagi sahan pé i antara kam, kami mungeberen Injil Allah kin kam.

10 Kam oyale saksi, betapé Allah, kune saléhé adil den gere becacat kami bebuet i antara kam si percaya.

11 Betih kam kune kami, lagu ama tehedep anak-anaké nge munasèhati          kam den mungueten atému sara sara,

12 den muniro urum sunguh, kati kam murip sesué urum kenak ni Allah, si munalu kam ku was kerejeen den kemulieen-É.

Sukacite entap ni jemaat 2:13-20

13 Den kerna oyale kami gere beteduh mungucep sukur ku Allah, sebeb kam nge munerime firman Allah si kami keberen oya, nume sebagé peceraken ni manusie, tetapé sebagé firman Allah den memang sunguh lagu noya,  si bebuet i was kam si percaya pé.

14 Sebeb kam, sudere-sudere, nge mujadi penurut  teleden jemaat-jemaat Allah i Yudea, jemaat-jemaat i was Kristus Yesus, kerna kam pé nge muderite ari pong-pong sebengsa ni kam, segele sesanah si iderite pakea ari urang Yahudi.

15 Bahkan urang Yahudi oya nge mununuh Tuhen Yesus den nabi-nabi den nge munganiaya kami. Hana si bekenak ku Allah gere ipedulinen pakea den bèwèné manusie imusuhi pakea,

16 kerna pakea mera muhalang-halangi kami mungeberen ku bengsa-bengsa lèn keber si mumai keselamaten pakea. Betale pakea dor munamah dosa ni pakea sawah genap jemlahé den se ni bèwèné  murke nge munimpe pakea.

17 Tetapé kami, sudere-sudere, si was waktu si singket mupisah ari kam, gip ari mata, tetapé gere gip ari até, sunguh urum denem si kul, nge berusaha gèh  munentongi kam.

18 Sebeb kami nge beniet gèh ku kam - aku Paulus malahen lebih ari seger -, tetapé Belis murintangi  kami.

19 Sebeb sahan ke pengharapen ni kami atawa sukacite ni kami atawa mahkota kemegahen ni kami i arap ni Yesus Tuhente, i waktu kegehen-É, ike nume kam?

20 Sunguh kamle kemulieen kami den sukacite kami.