1 Tesalonika 3

Keber jeroh si imah Timotius 3:1-13

Gere terten kami né, kerna oya kami munuet keputusen kati taring seseréngé i Atena.

2 Renye kami munutus Timotius sudere si bebuet urum kami kin Allah was pengeberen Injil Kristus kin mungueten atému  den munasèhati kam tentang imenmu,

3 kati enti ara jema si munur imené entap ni bèwèné penderiteen ni. Kam kendiri betih bahwa kite itentunen kin oya.

4 Sebeb waktu kami murum urum kam pé, nge kami sederen ku kam, bahwa kite malé mungalami kenyanyanen. Den hal oya lagu si nge betih kam nge terjadi.

5 Oyale sebebpé, kerna gere terten aku ne, aku nge munutus Timotius, kati kubetih tentang imenmu, kerna gunah aténgku entah kam nge iuji si penggoda den ike usaha kami nge mujadi sie-sie.

6 Tetapé se ni nge mari Timotius ulak ari kam den munemah keber si munyenangen tentang imenmu den kasihmu, den bahwa kam dor muninget kami urum kenangen si jeroh den ménét mudemu urum kami, lagu kami pé ménét mudemu urum kam.

7 Oya kati kami pé , sudere-sudere, wan segele kesesaken den kenyanyanen kami mujadi tehibur kerna kam den kerna imenmu.

8 Se ni kami murip mien, ike kam teguh sesuk i was Tuhen.

9 Sebeb ucepen sukur hana ke si lepas kami pesemahen ku Allah atas segele sukacite, si kami depet kerna kam i arap ni Allahte?

10 Porak lo kelem kami bedoà besunguh, kati kite mudemu rupe urum rupe den munamahen ku imenmu hana si kurang ilen.

11 Kireé  Allah, Amante, den Yesus, Tuhen te, munukenen kami jelen ku kam.

12 Den buge Tuhen mujadinen kam mutamah-tamah den mukelimpahen was kasih sara terhedep silèn den terhedep bèwèné jema, dis urum kami pé mungasihi kam.

13 Kireé Wé mungueten atému, kati gere becacat den kudus, i hedepen Allah den Amante, i waktu gèh ni Yesus, Tuhente, urum bewene jema kudus-É.