1 Tesalonika 4

Nasèhat kati murip kudus 4:1-12

Akhiré sudere sudere, kami muniro den munasèhati kam i was Tuhen Yesus: Kam nge mumengé ari kami kune kam turah murip kati bekenak ku Allah, hal oya memang nge kam turuti, tetapé jerohé kam mubuetené lebih besunguh mien.

2 Betih kam pé petunjuk-petunjuk si nge kami osanen ku kam atas geral ni Tuhen Yesus.

3 Kerna lagu inile kenak ni Allah: kenaké kam mujadi suci; oya kati kam wajib mugipen dirimu ari jine; 

4 kati kam masing-masing munueten sara jema banan mujadi inenmu  den murip i was pengudusen den  penghormatan,

5 nume i was kenak ni hewe nepsu lagu si ibueten jema-jema si gere mubetihi Allah.

6 Den kati i was hal ni, enti ara jema si bebuet salah terhedep sudereé atawa mupedayanené, sebeb Tuhen kase si mubelesené, lagu si nge kami perinen den tegasen tengaha ku kam.

7 Allah munalu kite nume kin mubueten hana si kotèk melènen hana si kudus.

8 Kerna oya sahan si gere munerime ini numele gere munerime manusie, melènen gere munerime Allah si nge munosahen Roh-É si kudus kin kam.

9 Tentang kasih i antara sudere gere daléh né itulisen ku kam kerna kam kendiri nge belejer ari Allah kin saling mungasihi.

10 Hal oya kam bueten pé tehedep bèwèné sudere i seluruh daerah Makedonia, tetapé kami munasèhati kam sudere-sudere kati kam lebih besunguh mien mubuetené.

11 Den anggaple sebagé sara kehormatan kin murip tenang, kin munurus pesoalen-pesoalen kendiri den bebuet urum pumu, lagu manat kami ku kam,

12 sehinge kam murip sebagé jema si sopan i mata jema deret den gere begantung ku pakea.

Gèh ni Tuhen 4:13-18

13 Selanyuté kami gere mera, sudere-sudere, bahwa kam gere mubetihi tentang pakea si nge benasa, kati kam enti berues até lagu jema-jema lèn si gere munempui pengharapen.

14 Kerna ike kite percaya, bahwa Yesus nge benasa den nge bangkit, kite pé  percaya bahwa pakea si nge benasa i was Yesus malé ikamulen Allah murum urum Wé.

15 Ini kami perinen ku kam urum firman Tuhen: Kite si murip, si taring ilen sawah gèh ni Tuhen, gere malé munuloi pakea si nge benasa.

16 Sebeb waktu tene iosah, waktu penghulu malèkat besurak urum ling ni sangkakala Allah, Tuhen kendiri turun ari serge den pakea si nge benasa i was Kristus malé bangkit lebih mulo;

17 mari oya, kite si murip, si taring ilen, malé itatang ku atas emun murum urum pakea kin mudemu urum Tuhen i angkasa betale kite malé murum urum Tuhen selama-lamaé.

18 Kerna oya hiburenle atému sara ku si lèn urum peceraken ini.