1 Tesalonika 5

Bejege-jegele 5:1-11

Tetapé tentang jemen den masa oya, sudere-sudere, gere perlu itulisen kin kam,

2 kerna kam kendiri sunguh mubetihi, bahwa lo Tuhen gèh lagu perusuh gèh i waktu kekelem.

3 Waktu jema mumerin: Bèwèné damé den aman, minter pakea itimpe kebenasanen, lagu sara jema banan si tengah benemah itimpe bise malé besalin pakea pasti gere lepas muluahen diri.

4 Tetapé kam sudere-sudere gere murip wan kegelepen, sehinge lo oya munimpe kam lagu sara perusuh.

5 Kerna kam bèwèné anak-anak terang den anak-anak porak lo. Kite numele jema-jema kelem atawa jema-jema kegelepen.

6 Sebeb oya, enti kite nomé lagu jema-jema lèn, tetapé bejege-jegele den seder.

7 Sebeb jema si nomé, nomé waktu kekelem, den jema si mabuk, mabuk  waktu kekelem.

8 Tetapé kite, jema porak lo, jerohé kite bejege-jege den mumaké baju zirah imen urum kasih den mumaké ketopong pengharapen keselamaten.

9 Kerna Allah gere munetapen kite kin itimpe murke tetapé kin munerime keselamaten entap Yesus Tuhente,

10 si nge benasa kin kite, entah kite bejege-jege, entah kite nomé,kite murip murum urum Wè.

11 Kerna oya nasèhatile sara urum si lèn den saling mubangunle kam lagu si kam bueten se ni.

Nasèhat-nasèhat 5:12-22

12 Kami muniro ku kam, sudere-sudere, kati kam muhormati pakea si bebuet keras i antara kam, si mumimpin den munasèhati kam i was Tuhen,

13 den kati kam sunguh muhormati pakea urum kasih kerna buet ni pakea. Muriple sabé i was damé sara urum si lèn.

14 Kami pé munasèhati kam, sudere-sudere, tegorle pakea si murip gere tertib, osanle semangat ku pakea si terih , bèlale pakea si lemah, seberle terhedep bèwèné jema.

15 Peratinenle, kati enti ara jema si mubeles jahat urum jahat tapé usahanenle mubueten si jeroh sara urum si lèn den tehedep bèwèné jema.

16 Besukacitele kam sabé.

17Tetaple bedoà.

18 Ucepenle sukur i was segele sesanah, sebeb inile kenak ni Allah i was Kristus Yesus bagi kam.

19 Enti iempoten kam Roh oya; 

20 den enti anggap renah nubuat-nubuat.

21 Ujile segele sesanah den amatle si jeroh.

22 Gipenle dirimu ari segele jenis kejahaten.

Salam 5:23-28

23 Kireé Allah, asal ni damé sejahtera, mungudusen kam urum semperne; den buge roh, jiwe den tubuhmu ijegei urum gere becacat  i waktu gèh ni Tuhente Yesus Kristus.

24 Wé si munalu kam setie, Wé pé malé munyempernené.

25 Sudere-sudere, doànenle kami.

26 Sawahenle salam kami ku bèwėné sudere urum cum si kudus.

27 Demi geral ni Tuhen kutiro ku kam urum sunguh kati suret ni ibacanen ku bèwèné sudere.

28 Kasih karunie Yesus Kristus, Tuhen te, munyertai kam.