1 Timotius 1

Salam 1:1-2

Ari Paulus, rasul Kristus Yesus munurut perintah Allah, Juruselamatte, den Kristus Yesus dasar pengharapente,

2 ku Timotius, anakku si sah i was imen: kasih karunie, rahmat den damé sejahtera ari Allah Ama den Kristus Yesus, Tuhente, munyertaimu.

Tentang ejeren sesat 1:3-11

3 Ketike aku malé mulanyuten pejelenenku ku wilayah Makedonia, aku nge mudesak ko kati ko taring i Efesus den munasèhati jema-jema tertentu kati pakea enti munejeren ejeren lèn

4 atawa pé sibuk urum dongeng den silsilah si gere metus-metus, si muhasilen pesoalen pelin we, den nume tertip murip keselamaten si iosah Allah was imen.

5 Tujun nasèhat a oyale kasih si timul ari até si suci, ari até nurani si murni den ari imen si tulus ikhlas.

6 Tetapé ara jema si gere sawah ku tujuen imen oya den si sesat i was cerak si sie-sie.

7 Pakea mera mujadi penejer hukum Taurat bier pé pakea gere mungerti cerak ni pakea kendiri den dasar si iyakini pakea.

8 Kite betih bahwa hukum Taurat a jeroh ike tepat igunenen ,

9 yakni urum keinsepen bahwa hukum Taurat oya numele bagi jema si benar, melènen bagi jema durhaka den gere mera iperintah, bagi jema fasik, den jema bedosa bagi jema deniewi den si gere beragama, bagi penunuh ama urum ineé, bagi segele penunuh, 

10 bagi jema cabul den jema sibebuet jine, bagi penculik, bagi pecogah den si besumpah cogah den sanah pé si belewenen  urum ejeren si benar

11  bedasaran Injil  si mungeberen kemulieen Allah, lagu si nge ipercayanen ku aku.

Ucepen sukur atas kasih karunie 1:12-17

12 Aku besukur ku Wé si mungueten aku, Kristus Yesus, Tuhente, kerna Wé muanggap aku setie den mupercayanen pelayanen ini ku aku,

13 bier pé aku tengaha sara jema penghujat den penganiaya den jema si ganas ; tetape aku nge ikasihi-É , kerna bèwèné oya nge kubueten tanpa pemetihen, sebelem aku berimen.

14 Tetapé Tuhente mulimpahen kasih karunie-É kin aku, den imen urum kasih i was Kristus Yesus .

15 Pecerakan ni benar den patut iterime sepenuhé: “Kristus Yesus gèh ku denie kin munyelamaten jema bedosa ,” den i antara pakea akule si paling bedosa .

16 Tetapé justru kerna oya aku ikasihi, kati i was diriku sebagé jema si paling bedosa ini, Yesus Kristus munuruhen seluruh keseberen-É, urum oya aku mujadi conto bagi pakea si mari oya percaya ku Wé den mudepet murip si kekal.

17 Hormat den kemulieen sawah selama-lamaé bagi Reje segele jemen, Allah si kekal, si gere teridah, si esa! Amin.

Tuges Timotius 1:18-20

18 Tuges ini kuosahen ku ko, Timotius anakku, sesué urum hana si nge inubuaten nabi tentang dirimu, kati nubuaten oya mungueten ko bejuang urum pejuangen imen den até nurani si murni.

19 Pepien jema nge munulak até nuranié si murni, den kerna oya kandasle imen ni pakea, 

20 i antaraé Himeneus den Aleksander si nge kuserahen ku Belis, kati pakea betobat  ari muhujet