1 Timotius 2

Tentang doa jemaat 2:1-7

Pemulo aku munasèhati kati teniron, doà syafaat den ucepen sukur kin bèwèné jema isawahen,

2 kin reje-reje den kin bèwèné jema penting, kati kite nguk murip tenang den tenteram i was segele kesalehen den kehormaten.

3 Oyale si jeroh den si bekenak ku Allah, Juruselamatte,

4 si mungenaken kati bèwèné jema iselamaten den mudepet pemetihen kin kebenaran.

5 Kerna Allah oya esa den si mujadi pengantara antara Allah den manusie pé esa, oyale manusie Kristus Yesus,

6 si nge munyerahen diri-É sebagé tebusen bagi bèwèné manusie : oyale sara kesaksien i masa si nge itentunen.

7 Kin kesaksien oyale aku nge itetapen sebagé si munyawahen keber jeroh den rasul, si kucerakan ini benar, aku gere mumerinen cogah den sebagé penejer jema si nume Yahudi i was imen den kebenaran.

Tentang jema rawan urum banan i was  ibadah jemaat 2:8-15

8 Kerna oya inile kenakku, kati isihen pé jema rawan bedoà urum munatangen pumu si suci gere bengis den gere ara peselisihen.

9 Kenaké jema banan pé lagu oya. Jerohé wé besolek urum pantas, sopan den sederhana, wuké enti olok  tu berempil-empil enti mumaké emas atawa mutiara atawa pé pekayan si mal;

10  melènen urum pebueten jeroh, lagu si patut bagi banan si beribedet.

11 Jema banan kenaké belejer urum tenang den taat.

12 Aku gere munijinen jema banan munejer den mumerintah jema rawan; kenaké wé ongot urum tenang.

13 Kerna Adamle si pemulo ijadinen, renye barole Hawa.

14 Den nume Adam si iileti Belis, melènen banan oyale si tegoda den metuh ku wan dosa.

15 Tetapé jema banan malé iselamaten urum mulahiren anak. Pakea  iselamaten ike pakea tetap i wan imen, kasih, kekudusen den murip wan penguasaen diri.