1 Timotius 3

Sarat-sarat kin penilik jemaat 3:1-7

Betulle pecerakan ini: “Jema si ménét jebeten penilik jemaat mungenaki buet si jeroh.

2 Kerna oya penilik jemaat turahle jema si gere becacat, wé turah munempui sara banan we, lepas munguasai diri den bijaksana. Wé turah ihormati jema lèn, mera munulung jema urum munosah tumpangen, wé turah pané munejer, 

3 gere peminum, gere pebengis melènen peramah, pedamé, gere mata duiten.

4 Sara kepala  keluarga si jeroh, isegani den ihormati anak-anaké.

5 Ike jema gere sangup mumimpin keluargaé kendiri, kune wé lepas munurus Jemaat Allah?

6 Entile wé jema si ben betobat, kati enti wé mujadi somong den kona ukumen Belis.

7 Kenaké wé pé munempui geral jeroh i deret jemaat, kati enti wé iprotes jema den metuh ku was  jaring ni Belis.

Sarat-sarat kin diaken 3:8-13

8 Betapé diaken turahle jema tehormat, enti becabang dèlah, enti pemabuk, enti serakah,

9 melènen jema si mujege resie imen i was até nurani si suci.

10 Pakea pé turah iuji mulo, mari pakea ternyata gere becacat, barole itetapen was pelayanen oya.

11 Betapé urum banan, pakea pé turah jema tehormat, enti si mera mufitnah, kenaké lepas munguasai diri den nguk ipercayai i was segele hal.

12 Diaken turahle aman ari sara inen we. Pakea turah lepas munurus anak-anaké den keluargaé urum jeroh.

13 Kerna jema si mulayani urum jeroh munerime ton si hormat sehinge pakea lepas besaksi i was imen kin Yesus Kristus urum bebas.

Resie si kul 3:14-16

14 Bèwèné ni  kutulisen ku ko, den aku beharap malé munentongi ko.

15 Jadi ike aku telat nge betih ko kune jema turah murip sebagé keluarga Allah, oyale jemaat Allah si murip tiang penupang den dasar kebenaran.

16 Den sesunguhé agungle resie ibedette :

“Wé si nge munyatanen

diri-É wan rupe manusie,

ibenaran wan Roh;

si munuruhen diri-É

ku malèkat-malèkat,

ikeberan i antara ni bengsa-bengsa si gere mubetihi Allah;

si ipercayai i wan denie,

itatang wan kemulieen.”