1 Timotius 4

Buet Timotius was muhedepi penejer sesat 4:1-16

Tetapé Roh urum tegas munyederen bahwa i akhir jemen pepien jema malé murtad nye mununungi roh-roh penyesat den ejeren setan-setan

2 ari kerna tukang cogah si até nuranié mumaké cap ni pakea.

3 Pakea mungoai jema kerje, mungoai jema mangan si iciptanen Allah, pedahal Allahle si mujadinen segele pemanganan kati inikmati jema si percaya den si mubetihi kebenaran  urum ucepen sukur.

4 Kerna bèwèné si iciptanen Allah oya jeroh den sara pé gere ara haram, ike iterime urum ucepen sukur.

5 Sebeb bèwèné oya ikudusen firman Allah den doà.

6 Urum dor muningeten hal oya ku sudere-suderente, ko malé mujadi sara pelayan Kristus Yesus si jeroh, terdidik i was dasar ejeren sehat si nge itunungi ko selama ni.

7 Tetape gipile tahyul urum dongeng anan tue, latihle dirimu beribadah.

8 Latihen bedeni tebatas guneé, tetapé ibadah oya begune i was segele hal kerna mujanyinen manfaat kin murip besilo ni betapé murip si malé gèh.

9 Peceraken ini benar den patut iterime seengkipé.

10 Oyale sebebpé kite bekejang payah urum bejuang kerna kite sunguh beharap ku Allah si murip, Juruselamat bèwèné manusie, khususé  pakea si percaya.

11 Keberan den ejerenle bèwèné ini.

12 Enti sara jema pé muanggap ko renah kerna ko mude. Jadile teleden bagi jema-jema percaya, i was pecerakanmu, i was tingkah lakumu, i was kasihmu, i was kesetieenmu, den i was kesucienmu.

13 Sawah aku gèh betekunle mubaca Kiteb Suci, i was mubangun den i was munejer.

14 Entile lalé i was mugunenen karunie si ara i ko, si nge iosahen ku ko mulalui nubuat den mulalui penetue si munobonen pumué ku atas mu. 

15 Peratinenle bèwèné oya, muriple i wasé, kati kemajuenmu nyata ku bèwèné jema.

16 Jegele dirimu kendiri den jegele ejerenmu. Betekunle i was bèwèné oya, kerna urum bebuet lagu oya ko malé munyelamaten dirimu den bèwèné jema si mumengé ko.