1 Timotius 5

Tentang sudere-sudere seimen 5:1-2

Entile ko keras terhedep jema si nge tue, melènén koaile wé sebagé ama. Tegorle jema-jema mude sebage suderemu,

2 banan-banan tue sebagé ine den banan-banan mude sebage engi  urum kemurnien.

Tentang jema banan balu 5:3-16

3 Hormatile jema balu si betul-betul balu.

4 Tetapé ike sara balu munempui anak atawa kumpu, kenaké pakea pemulen belejer bebakti ku keluergeé kendiri den mubeles budi jema tue den anan ni pakea, kerna oyale si bekenak ku Allah.

5 Sara jema balu si betul-betul balu si itaringen seseréngé beharap ku Allah pelin we den betekun i was peniron urum doà porak lo kelem.

6 Tetapé sara jema balu si murip mèwah den belebih-lebihen wé nge maté bier pé tengah murip.

7 Peringetenle hal-hal ni pé ku balu-balu kati pakea murip urum gere becela.

8 Tetapé ike ara jema si gere mumeralai biak  sudereé, hana mien seisi umahé, jema oya murtad den lebih jahat ari jema si gere berimen.

9 Si idaptaren sebagé balu, oyale si gere kurang ari enam puluh tun we, si seger we muaman

10 den terbukti nge mubueten pebueten si jeroh, lagu munuripi anak, munosah tumpangen, mubasuh kiding sudere-sudere seimen, munulung jema si murip i was kesesaken - secara singket oyale pakea si nge mugunen segele kesempaten kin bebuet jeroh.

11 Enti terime pendaptaren balu-balu si lebih mude, kerna ike pakea igoda keberahien si mucerènen pakea ari Kristus, pakea ménét kerje,   

12 den ingkar ari kesetieen ni pakea simuloé ku Kristus, pakea munegèhen ukumen kin dirié.

13 Selèn oya urum gati ku was ku deret umah jema lèn, pakea mubiesenen dirie bemalas-malasen ; nume bemalas-malasen pelin we, tetapé pé mucerakan kekotèken jema lèn den mucampuri urusen jema lèn den mucerakan hal si gere pantas.

14 Kerna oya aku mera kati balu-balu si mude kerje mien, munempui anak, mumimpin umah tengeé, kati enti munosah kesempaten ku lewen kin mungotèk-ngotèken geralte.

15 Kerna pepien balu nge museruk mununung Belis.

16 Ike sara jema rawan atawa banan si percaya munempui anggota keluarga si balu, kenaké wé munulung pakea sehinge pakea enti mujadi beben bagi jemaat. Urum lagu noya jemaat nguk munulung pakea si betul-betul balu.

Pepien petunjuk den nasèhat 5:17-25

17 Penetue-penetue si jeroh kepemimpinené patut ihormati roa kali lipet, khususé pakea si urum kejang payahé mungeberen firman den munejer.

18 Kerna Kiteb Suci mumerin: “Entile ko munutup awah ni lemu si tengah bebuet muluahen gandum ari tangkeé,” den “sara jema si bebuet patut mudepet upahé.”

19 Entile ko munerime tuduhen atas sara penetue kecuali ike idukung roa  atawa tulu jema saksi.

20 Pakea si bebuet dosa kenaké ikoai ko i arap ni bèwèné jema kati si lèn oya pé terih.

21 I arap ni Allah den Kristus Yesus den malèkat-malèkat pilihen-É aku bemanat urum sunguh ku ko: Turutile petunjuk-petunjuk ini urum ikhlas den i was segele sesanah buetenle tanpa mumihak.

22 Entile ko tir tu munobonen pumu i atas sara jema den entile mujoros ku dosa ni jema lèn. Jegele kemurnien dirimu.

23 Enti né minum wih pelin, tapé tamahenle anggur tikik, kerna pencernaanmu gere jeroh den tubuhmu gati lemah.

24 Dosa pepien ni jema olok telas seakan munuloi pakea ku pengadilen. Tetapé dosa jema si lèn mujadi nyata nge mari iadili.

25 Betale pebueten jeroh oya langsung teridah den ike pé gere teridah , pebueten jeroh oya gere nguk selamaé tetuni.