1 Timotius 6

Bèwèné jema si munangung beben pehambaen kenaké muanggap reje ni pakea layak munerime segele kehormatan, kati geral ni Allah urum ejerente enti ihujet jema.

2a Ike reje ni pakea jema percaya, entile we kurang isegani  kerna besudere  i was Kristus, melènen kenaké wé ilayani pakea lebih jeroh, sebeb reje si munerime pelayanen ni pakea oyale sudere si percaya den si ikasihi Allah.

Penejeren si gere benar den tentang sén 6:2b-10

2b Ejeren den nasèhatile bèwèné ni.

3 Ike sara jema munejeren ejeren lèn den gere munurut pecerakan si benar

oyale peceraken Tuhen kite Yesus Kristus den gere munurut ejeren si sesué urum ibadah te,

4 jema oya belagak betih pedahal sanah pé gere ibetihé. Penyakité oyale mera bedebat urum bedewe sehinge munimulen iri até, perpecahen, fitnah, curige,

5 den peselisihen. Pikiren ni pakea gere benar, pakea mungire bahwa ari ibedet pakea nguk mudepet untung den mujadi kaya.

6 Memang ibedet oya ike iurumi rasa pues munosah keuntungen kul.

7 Sebeb kite gere munemah sanah pé ku wan denie ni, den kite pé gere nguk munemah sanah pé kuderet.

8 Ike ara pemanganan urum pekayan, genaple.

9 Tetapé pakea si ménét mujadi kaya metuh ku wan penyubeen ku was jaro  den ku was bebagé nepsu si soh si munyelomen manusie ku wan keruntuhen den kebenasanen.

10 Kerna uyet ni segele kejahaten oyale kenak até kin sèn, sebeb entap mudedik sènle pepien jema nge museruk ari imen den munyikse dirié urum dele penderiteen.

Manat penutup 6:11-21

11 Tetapé ko hamba Allah, gipile bèwèné oya, dedikle keadilen, ibedet, imen, kasih, keseberen den kelemuten.

12 Belombale i was petandingen imen sibenar kin mudepet murip si kekal, sebeb kin oyale ko nge italu Allah den ko nge mungakui imenmu i arap ni jema delé.

13 I arap ni Allah si munosah murip ku bèwèné den i arap Kristus Yesus si nge munyawahen pengakuen si benar i arap Pontius Pilatus aku bemanat ku ko:

14 Turutile perintah ni urum gere becacat den becela sawah ku waktu Tuhen kite Yesus munyatanen diri-É,

15 oyale sara waktu si malé itentunen Penguasa si sara-saraé den si iberkati, reje atas bèwèné reje den penguasa atas bèwèné si bekuasa.

16 Oyale sara-saraé si gere takluk ku maut, si taring was terang si gere nguk kite rapi, si gere pernah ièngon jema den memang manusie gere nguk munèngon Wé. Bagi Wé le hormat urum kemulieen si kekal. Amin.

17 Peringetenle jema-jema kaya i denie ni kati pakea enti somong, den enti beharap ku kekayaen si gere tetap, melènen ku Allah si mungarunienen kin kite segele sesanah kin inikmati.

18 Peringetenle kati pake oya bebuet jeroh, mujadi kaya was kesalehen, mera munosah den bebagi.

19 Urum lagu noya pakea mungamulen reta sebagé dasar si jeroh kin dirié i waktu si malé gèh kin mudepet murip si sebenaré.

20 Timotius! Jegele hana si nge ipercayanen ku ko. Enti ko ikut was peceraken si gere begune den si gere suci den pedebaten tentang hal si sesat si isebut “Pemetihen” ,

21 kerna ara pepien jema si munejerené den urum lagu oya pakea nge museruk ari imen. Kasih karunie munyertai kam.