1 Yohanes 1

Tentang Firman murip 1:1-4

Hana si nge ara ari muloé , si nge kami pengé, si nge kami èngon urum mata kami, si nge kami saksinen den si nge kami amat urum pumu kami tentang Firman murip - oyale si kami tulisen ku kam.

2 Murip oya nge inyatanen den kami nge munèngoné den se ni kami besaksi den mungeberen ku kam tentang murip kekal, si ara murum urum Ama den si nge inyatanen kin kami.

3 Hana si nge kami èngon den si nge kami pengé oya, kami keberen ku kam pé kati kam mujadi sara persekutuen urum kami. Den persekutuen  kami oyale persekutuen urum Ama den urum Anak-É, Yesus Kristus.

4 Den bèwèné ni kami tulisen ku kam kati sukecite kami mujadi semperne.

Allah oyale terang 1:5-10

5 Den inile keber, si nge kami pengé ari Wé den si kami sawahen ku kam: Allah oya terang den i was ni Wé tikik pé gere ara kegelepen.

6 Ike kite perinen, bahwa kite munempui persekutuen urum Wé, tapé kite murip wan kegelepen, kite becerak cogah den kite gere mubueten kebenaran.

7 Tetapé ike kite murip i was ni terang dis urum Wé ara i was ni terang, kite munempui persekutuen sara urum si lèn, den rayoh Yesus, Anak-É a, munyucinen kite ari segele dosa.

8 Ike kite mumerin,  bahwa kite gere bedosa, kite munileti dirinte kendiri, den kebenaran gere ara i was ni kite.

9 Ike kite mungakui dosante, Wé setie den adil, sehinge Wé munampuni segele dosante den munyucinen kite ari segele kejahatan.

10 Ike kite mumerin, bahwa kite gere ara bebuet dosa, kite munos Wé mujadi pecogah den firman-É gere ara i was ni kite.