1 Yohanes 3

Èngonle, dum kulé kasih si ikarunienen Ama ku kite sehinge kite isebut anak-anak Allah, den memang kite  anak-anak Allah. Kerna oya denie gere mubetihi kite, sebeb denie gere mubetihi Wé.

2 Sudere-suderengku si kukasihi, se ni kite anak-anak Allah,tetapé gere ilen nyata kune jadié kite puren; tetapé kite betih, bahwa ketike Kristus munyatanen diri-É, kite kasé mujadi dis lagu Wé, sebeb kite malé munèngon Wé was keadaan-É si sebenaré.

3 Jep jema simuharapan hal oya ku Wé, munyucinen diri dis lagu Wé si suci.

4 Jep jema si bebuet dosa, wé pé mulanggar hukum Allah, sebeb dosa oyale pelanggaran hukum Allah.

5 Den betih kam, bahwa Wé nge munyatanen diri-É, kati Wé munapus segele dosa, den i was ni Wé gere ara dosa.

6 Kerna oya setiep jema si tetap ara i was Wé, gere né bebuet dosa; setiep jema si tetap bebuet dosa, gere munèngon den gere mubetihi Wé.

7 Anak-anakku, enti daténen sara jema pé munyeruken kam. Barik sahan si bebuet kebenaran oyale benar, dis lagu Kristus benar.

8 Barik sahan si tetap bebuet dosa, asalé ari Belis, sebeb Belis bebuet dosa ari muloé mi. Kin inile Anak Allah munyatanen diri-E, kati Wé mubenasanen pebueten-pebueten

Belis a.

9 Jep jema si lahir ari Allah, gere né bebuet dosa, sebeb inih ilahi tetap ara i was ni wé. Den wé gere nguk tetap bebuet dosa, kerna wé lahir ari Allah.

10 Inile teneé anak-anak ni Allah den anak-anak ni Belis: setiep jema si gere bebuet kebenaran, gere berasal ari Allah, betapé barik sahan si gere mungasihi sudereé.

Kasih kin sudere sebagé tene murip ayu 3:11-18

11 Sebeb inile keber si nge ipengé kam ari muloé, bahwa kite turah saling mungasihi;

12 nume lagu Kain, si asalé ari si jahat den simununuhen engié. Den hana ke sebebpé wé mununuhé? Sebeb segele pebuetené jahat den pebueten engié a benar.

13 Entile kam hèran, sudere-sudere, ike denie begeli até kin kam.

14 Kite betih bahwa kite nge minah ari was maut ku was ni murip, oyale

sebebpé kite mungasihi suderente. Barik sahan si gere mungasihi wé tetap i was ni maut.

15 Jep jema si begeli até kin sudereé, oyale penunuh manusie. Den betih kam, bahwa gere ara sara penunuh si tetap munempui murip si kekal i was dirié.

16 Lagu inile kite betihi kasih Kristus, bahwa Wé nge munyerahen nyawa-É kin kite; jadi kite pé wajib munyerahen nyawante kin sudere suderente.

17 Barik sahan munempui reta deniewi den munèngon sudereé muderite kekurangen tetapé munutup pintu ni atéwé terhedep sudereé a, kune kasih Allah nguk tetap i was dirié a?

18 Anak-anakku, entah mi kite mungasihi nume urum pecerakan atawa urum dèlah tetapé urum pebueten den i was kebenaran.

Keyakinen i hedepen ni Allah 3:19-24

19 Betale kite betihi, bahwa kite asalé ari kebenaran. Den betapé  aténte nguk murasa tenang i hedepen ni Allah,

20 sebeb ike kite ituduhé, Allah oya lebih kul ari aténte den mubetihi segele sesanah.

21 Sudere-sudere si kukasihi, ike aténte gere munuduh kite, kite munempui keberanien percaya kin mudekati Allah,

22 den sana pé si kite tiro, kite munerimeé ari Wé, kerna kite munuruti segele perintah-É den mubueten sana si ikenaki-É.

23 Den inile perintah-É a: kati kite percaya wan geral Anak-É, Yesus Kristus, den kati kite saling mungasihi sesué urum perintah si iosahen Kristus kin kite.

24 Barik sahan munuruti segele perintah-É, wé taring i was ni Allah den Allah i was ni wé. Den lagu oyale kite betihi, bahwa Allah ara i was kite, oyale Roh si nge ikarunienen Allah kin kite.