1 Yohanes 4

Roh Allah dan roh antikristus 4:1-6

Sudere-sudere si kukasihi entile percaya kin setiep roh, tetapé ujile roh-roh oya ari Allah ke asal ni pakea sebeb delé nabi-nabi pelsu si nge gèh nye beluh ku seluruh denie.

2 Betale kite mubetihi Roh Allah: setiep roh si mungaku, bahwa Yesus Kristus nge gèh sebagé manusie, asalé ari Allah,

3 den setiep roh si gere mungaku Yesus, gere berasal ari Allah. Roh a oyale roh antikristus den tentang wé nge ipengé kam, bahwa wé malé gèh  den nge gèh den se ni wé nge ara i wan denie.

4 Kam berasal ari Allah, anak-anakku, den kam nge mungalahen nabi-nabi pelsu oya; sebeb Roh si ara i was ni kam lebih kul bidak roh si ara i wan denie.

5 Pakea berasal ari denie; kerna oya pakea becerak tentang hal-hal  deniewi den denie mumengén pakea.

6 Kami berasal ari Allah: barik sahan mubetihi Allah, wé mumengènen kami; barik sahan gere berasal ari Allah wé gere mumengénen kami. Oyale teneé Roh kebenaran den roh si munyesaten.

Allah oyale kasih 4:7-20

7 Sudere-sudere si kukasihi, entah mi kite saling mungasihi, sebeb kasih oya asalé ari Allah; den setiep jema si mungasihi, lahir ari Allah den mubetihi Allah.

8 Barik sahan si gere mungasihi, wé gere mubetihi Allah, sebeb Allah oya kasih.

9 I was hal inile kasih ni Allah inyatanen i lelah ni kite,  bahwa Allah nge munutus Anak-É si tungel ku wan denie kati kite murip entap ni Wé.

10 Inile kasih oya: Nume kite si nge mungasihi Allah, tetapé Allah si nge mungasihi kite den si nge munutus Anak-É sebagé pedamé  kin dosa-dosante.

11 Sudere-sudere si kukasihi, ike Allah lagu noya mungasihi kite, kite pé turah saling mungasihi.

12 Gere ara sara jema pé si pernah munèngon Allah. Ike kite saling mungasihi, Allah tetap i was kite den kasih-É semperne i was ni kite.

13 Lagu inile kite betih, bahwa kite tetap ara i was Allah den Wé i was ni kite: kerna Wé nge munosanen Roh-É ku kite.

14 Den kami nge munèngon den besaksi, bahwa Ama nge munutus Anak-É mujadi Juruselamat denie.

15 Barik sahan mungaku, bahwa Yesus oyale Anak Allah, Allah tetap taring i was wé den wé i was ni Allah.

16 Kite nge mubetihi den nge percaya kasih ni Allah kin kite. Allah oyale kasih den barik sahan tetap taring i was kasih, wé tetap taring i was Allah den Allah i was wé.

17 Wan hal inile kasih Allah semperne i was kite, ike kite munempui keberanien percaya i lo penghakimen, kerna dis lagu Wé, kite pé ara i wan denie ni.

18 I was kasih gere ara keterihen: kasih si semperne munosopen keterihen; sebeb wan keterihen ara hukumen den barik sahan terih wé gere semperne i was kasih.

19 Kite mungasihi kerna Allah lebih mulo mungasihi kite.

20 Ike sara jema mumerin: “Aku mungasihi Allah,” den wé begeli ate ku sudereé, wé pecogah, kerna barik sahan gere mungasihi sudereé si ièngoné, gere mungkin mungasihi Allah, si gere ièngoné.

21 Den perintah ni kite terime ari Wé: Barik sahan mungasihi Allah, wé pé turah mungasihi sudereé.