1 Yohanes 5

Imen mungalahen denie 5:1-5

Jep jema si percaya, bahwa Yesus oyale Kristus, lahir ari Allah; den jep jema si mungasihi Ama, wé pé mungasihi jema si lahir ari Wé.

2 Inile teneé bahwa kite mungasihi anak-anak ni Allah, oyale ike kite mungasihi Allah den mubueten perintah-perintah-É.

3 Sebeb inile kasih kin Allah, oyale, bahwa kite munuruti perintah-perintah-É. Perintah-perintah-É a gere beret,

4 sebeb bèwèné si lahir ari Allah, mungalahen denie. Den inile kemenangan si mungalahen denie: imente.

5 Sahan ke si mungalahen denie, selèn ari wé si percaya bahwa Yesus oyale Anak Allah?

Kesaksien tentang Anak Allah 5:6-12

6 Inile Wé si nge gèh urum wih den rayoh, oyale Yesus Kristus, nume urum wih pelin, tetapé wih den rayoh. Den Rohle si munosanen kesaksien, kerna Roh oyale kebenaran.

7 Sebeb ara tulu si munosanen kesaksien i wan serge : Ama, Firman, den Roh Kudus; den ketuluné oyale sara.

8 Den ara tulu si munosanen kesaksien i bumi : Roh, wih den rayoh den ketuluné oyale sara.

9 Kite munerime kesaksien manusie, tetapé kesaksien ni Allah lebih kuet. Sebeb betale kesaksien si iosanen Allah tentang Anak-É.

10 Barik sahan si percaya ku Anak Allah, wé munempui kesaksien oya i was dirié; barik sahan si gere percaya ku Allah, wé munos Allah mujadi pecogah, kerna wé gere percaya kin kesaksien si iosanen Allah tentang Anak-É.

11 Den inile kesaksien oya: Allah nge mungarunienen murip si kekal kin kite den murip oya ara i was Anak-É.

12 Barik sahan munempui Anak, wé munempui murip; barik sahan si gere munempui Anak, wé gere munempui murip.

Pemetihen tentang murip si kekal 5:13-21

13 Bèwèné ni kutulisen kin kam, kati kam si percaya ku geral Anak ni Allah, mubetihi, bahwa kam munempui murip kekal.

14 Den inile keberanien percaya kite kin Wé, oyale bahwa Wé mungabulen doànte, ike kite muniro sesanah ku Wé munurut kenak-É.

15 Den ike kite betih, bahwa Wé mungabulen sanah pé si kite tiro, kite pé betih, bahwa kite nge munerime segele sesanah si nge kite tiro ku Wé.

16 Ike ara jema munèngon sudereé bebuet dosa, oyale dosa si gere mugèhen maut, kenaké wé bedoà  ku Allah den Wé malé munosahen murip-ku  pakea, oyale si bebuet dosa si gere mugèhen maut. Ara dosa si mugèhen maut: tentang oya gere kuperinen bahwa wé turah bedoà.

17 Bèwèné kejahatan oyale dosa, tetapé ara dosa si gere  mugèhen maut.

18 Kite betih, bahwa jep jema si lahir ari Allah, gere bebuet dosa; tetapé Wé si lahir ari Allah mulinungié, den si jahat gere lepas munamaté.

19 Kite betih, bahwa kite asalé  ari Allah den seluruh denie ara i tuyuh kuasa ni si jahat.

20 Tetapé kite betih, bahwa Anak Allah nge gèh den nge mungarunienen pengertien kin kite, kati kite mubetihi Si Benar; den kite ara i was Si Benar, i was Anak-É Yesus Kristus. Wé le Allah si benar den murip si kekal.

21 Anak-anakku, jege-jegele terhedep segele berhala.