2 Korintus 12

Paulus munerime penèngonen den penyataen 2:1-10

Aku turah bemegah, seger pé memang hal oya gere ara paedahé, bier pé beta aku malé mungeberen penèngonen-penèngonen den penyataen-penyataen si kuterime ari Tuhen.

2 Kubetih sara jema si i was Kristus; empat belas tun si lepas, wé mutatang ku serge tingket ketulu, - entah i was tubuh entah i deret tubuh gere kubetih, Allah si mubetihié. -

3 Den kubetih jema oya, - entah i was tubuh entah i deret tubuh, gere kubetih, Allah simubetihié,

4 tibe-tibe wé mutatang ku Firdaus den wé mumengé cerak si gere nguk icerakan, si gere nguk iucepen manusie.

5 Atas jema oya aku malé bemegah,tetapé atas diriku kendiri aku gere malé bemegah, selèn atas kelemahenku.

6 Sebeb sekireé aku pé malé bemegah, aku nume né jema ogoh, kerna aku mumerinen kebenaran,tetapé aku munehen diriku, kati enti ara jema si munitungen ku aku lebih ari sana si pakea ièngon pakea atawa si ipengé pakea ari aku.

7 Den kati aku enti munatasen diri kerna penyataen si luer biese oya, aku iosah sara rui i wan tubuhku, oyale sara utusen Belis kin munyakiti  aku kati aku enti muatasen diri.

8 Tentang hal oya aku nge mutulun muniro ku Tuhen, kati utusen Belis oya surut ari aku.

9 Tetapé jeweb Tuhen ku aku: “Genaple kasih karunie-Ku kin ko, sebeb justru wan kelemahen kuasa-Ku mujadi semperne.” Sebeb oya lebih galak aténgku bemegah atas kelemahenku, kati kuasa Kristus turun ku atasku.

10 Kerna oya aku senang den rela i wan kelemahen, i wan sikseen, i wan

kenyanyan, i wan penganiayaen den kesesaken kerna Kristus. Sebeb ike aku lemah, waktu oyale aku kuet.

Macik até ni Paulus 12:11-21

11 Sunguh aku nge mujadi ogoh, tetapé kam si mumaksa aku. Sebenaré aku turah ipuji kam. Kerna bier pé aku tikik pé gere berani, tapé i wan segele hal aku gere kalah tehedep rasul-rasul si luer biese oya.

12 Segele sesanah si mubuktinen, bahwa aku inile rasul  i lelah ni kam urum segele keseberen mulalui tene-tene, mukjizet, den kuasa si nge itelasen.

13 Sebeb wan hal sihen ke kam kurang kuperatinen ibaning jemaat lèn, selèn ari wan hal ni, oyale bahwa aku kendiri gere mujadi sara beben ku kam.

Maapenle kegereadilen ini.

14 Se ni aku siep kin munentongi kam kin ketige kalié, den aku gere malé munyanyanen kam urum muniro bantuen. Sebeb nume retamu si kukenal melènen kam kendiri, kerna nume kekanak si turah mungamulen reta kin jema tueé melènen jema tuele si mungamulen reta kin kekanaké.

15 Kerna oya aku begalak até munosahen sanah pé empuku, bahkan mungorbanen diriku kin kam. Jadi ike aku olok mungasihi kam, masaken aku makin kurang ikasihi?

16 Aku kendiri gere mujadi beben kin kam, -tapi iceraken kam - wan kelicikenku aku nge munileti kam kin mudepet keuntungen.

17 Jadi pernah ke aku munuet untung ari kam mulalui sara ari si kuutus ku kam?

18 Memang aku nge muniro Titus kin beluh den murum urum wé aku munutus sudere si len. Ara ke Titus munuet untung ari kam? Gere ke roan kami murip munurut roh si dis den gere ke kami bebuet munurut cara si dis?

19 Mungkin nalammu bahwa kami malé mubela diri i arap ni kam. I arap ni Allah den demi Kristus kami mumerin: Bèwèné ini, sudere-sudere si kukasihi, terjadi kin mubangun imenmu.

20 Sebeb atengku macik, bahwa ike aku gèh aku mudepeti kam gere lagu si ku kenaki den ko mudepeti aku gere lagu si ikenaki kam. Macik aténgku bahwa aku malé mudepeti peselisihen, iri até, bengis, kepentingen diri kendiri, fitnah, sisu, kesomongen, den kerusuhen.

21 Macik aténgku, bahwa ike aku gèh mien, Allahku malé murenahen aku i arapmu, den bahwa aku malé berues até kerna jema delé si tengaha nge bebuet dosa den gere ilen betobat ari kekotèken, jine den pencabulen si ibueten pakea.