2 Korintus 2

Aku nge munuet keputusen i wan aténgku, bahwa aku gere malé gèh  mien ku kam wan kesedihen.

2 Sebeb ike aku munos atému sedih, sahan mi si nguk munos aku begalak até, besilo mungkin jema si nge kutosen sedih atéwé?

3 Den justru oyale  meksud suretku ini, kati ike aku gèh, enti aku besedih entap pakea si turah munos aku begalak ate. Sebeb aku yakin tentang kam bèwèné  bahwa sukaciteku oya pé sukacité ni kam.

4 Aku munulis ku kam urum até si olok macik  den sesak den urum munetesen dele luh mata, nume kati kam besedih até tapé kati betihi kam kune kulle  kasihku ku kam bèwèné.

Jema si besalah turah iampuni

2:5-11

5 Tetapé ike ara jema si munimulen  kesedihen, nume aténgku si isedihené melènen até ni kam bèwèné, atawa sekurang-kurangé - kati enti aku mulebih-lebihen -  até pepien jema i antara ni kam.

6 Bagi jema si lagu noya genaple tegoren ni tèba ari kam,

7 sehinge sebaliké kam turah munampunié den muhibur wé, kati enti wé benasa entap kesedihen si olok beret.

8 Sebeb oya aku munasèhati kam, kati kam besunguh mungasihi wé.

9 Sebeb justru oyale meksudku  munulis suret ku kam, kin munuji kam,  taat ke kam wan segele sesanah.

10 Sebeb sahan pé si iampuni kam salahé, aku pé munampunié.Sebeb ike aku munampuni - sekireé ara si turah kuampuni-, hal oya kupebuet kerna kam i arap ni Kristus.

11 Kati Belis enti mudepet keuntungen ari atas kite, sebeb kite betih hana meksudé.

Pekekit ni até den kelegaen ni Paulus i Troas den i Makedonia

2:12-17

12 Ketike aku sawah i Troas kin mungeberen Injil Kristus, kudepeti bahwa Tuhen nge munuke jelen kin bebuet i oné.

13 Tetapé atéku gere murasa tenang, kerna aku gere mudemu urum sudereku Titus i oné. Sebeb oya aku muniro ijin ku pakea den berangkat ku Makedonia.

14 Tetapé sukur kin Allah, si wan Kristus dor munemah kami i jelen kemenangen-É, den urum perantaraen kami Wé munyebaren bau wangi ari pemetihen tentang Kristus i sihen pé.

15 Sebeb bagi Allah kamile bau si harum ari Kristus i lelah ni pakea si iselamaten den i antara ni pakea si benasa.

16 Bagi si terakhir kamile bau kebenasanen si mumaténen den bagi si pemulo bau murip si munuripen. Tetapé sahan ke si sangup mubueten buet si lagu noya?

17 Sebeb kami gere dis urum jema delé lèn si mungenal keuntungen ari firman Allah. Sebaliké wan Kristus kami becerak sekune turahé urum meksud murni atas perintah ni Allah den i arap-É.