2 Petrus 1

Salam 1:1-2

Ari Simon Petrus, hamba den rasul Yesus Kristus, ku pakea si murum urum kami munerime imen entap keadilen Allah den Juruselamatte Yesus Kristus.

2 Kasih karunie den damé sejahtera mulimpahi kam kerna pemetihen kin Allah den kin Yesus Tuhente.

Penalun den pilihen Allah 1:3-15

3 Kuasa ilahi-É nge munganugerahen ku kite segele sesanah si mugune kin murip si saléh mulalui pemetihente ku Wé si nge munalu kite kin kuasa-É si mulie den ajaib.

4 Urum oya Wé nge munganugerahen ku kite janyi-janyi si murege den si olok kul, kati mulaluié kam nguk  mudepet bagin wan kodrat ilahi, den luah  ari hewe nepsu deniewi si mubenasanen denie.

5 Justru kerna oya kam turah urum sunguh berusaha kin munamahen ku imenmu kebajiken den ku kebajiken pemetihen;

6 den ku pemetihen penguasaen diri, ku penguasaen diri ketekunen den ku ketekunen kesaléhen;

7 den ku kesaléhen kasih kin sudere-sudere, den ku kasih kin sudere-sudere kasih kin bèwèné jema.

8 Sebeb ike bèwèné oya ara i kam urum mulimpah, kam malé itosé mujadi giet den berhasil wan pemetihen kin Yesus Kristus Tuhente.

9 Tetapé barik sahan gere munempui bèwèné oya, wé mujadi mbota den picik kerna gere ingeté, bahwa dosa-dosaé si tengaha nge iapusen.

10 Kerna oya, sudere-suderengku, besunguhle berusaha, kati penalun urum pilihenmu makin teguh, sebeb ike kam mubuetené kam gere malé museltu.

11 Urum lagu noya ku kam malé ikarunienen hak engkip kin mayo ku wan  kerejeen kekal, oyale kerejeen Tuhen den Juruselamatte, Yesus Kristus.

12 Kerna oya aku bemeksud sabé muningeten kam bèwèné oya, bier pé nge betih kam den nge teguh wan kebenaran si nge iterime kam.

13 Aku muanggap ini sebagé kewajibenku kin tetap muningeten kam tentang bèwèné oya, selama aku gere ilen muluahen kemah bedenku ini.

14 Sebeb kubetih, bahwa aku malé tir muluahen kemah tubuhku ini,lagu si nge jelas isederen Tuhente Yesus Kristus ku aku.

15 Tetapé aku malé berusaha, kati nge mari beluhku pé kam dor muninget bèwèné oya.

Kemulieen Kristus den nubuat 1:16-21

16 Sebeb kami gere mununungi dongeng isepen jempol manusie, ketike kami mungeberen ku kam kuasa den kegèhen ni Tuhente, Yesus Kristus sebagé reje, tetapé kamile saksi mata ari keagungen-É.

17 Kami munyaksinen kune Wé munerime kehormatan den kemulieen ari Allah Ama, ketike gèh ling ari Si Mahamulie ku Wé, si mumerin: “Inile Anak si Kukasihi ku Wéle Aku bekenak.”

18 Ling oya kami pengé gèh ari serge, ketike kami murum urum Wé i atas bur si kudus.

19 Urum lagu noya kami makin iteguhen urum firman si nge isawahen nabi. Jerohé kam muperatinené dis lagu muperatinen lampu si mucaya i ton si gelep sawah porak lo den bintang timur musiner i wan atému.

20 Si pemulo turah betihi kam, oyale bahwa nubuet-nubuet wan Kiteb Suci gere nguk iartinen munurut kenak kendiri.

21 Sebeb gere pernah nubuat ihasilen ari kenak ni manusie, tapé ari kerna igeraken Roh Kudus jema-jema becerak atas geral ni Allah.