2 Petrus 2

Nabi- nabi den guru-guru pelsu 2:1-22

Sekune nabi-nabi pelsu tengaha telas i lelah umet ni Allah, betapé i antara ni kam malé ara guru-guru pelsu. Pakea malé munosanen penejeren sesat si mubenasanen, bahkan pakea malé munyangkal Penguasa si nge munebus pakea den kerna hal oya tir munegèhen kebenasanen atas diri ni pakea.

2 Delé jema malé mununungi cara murip ni pakea si ikuasai hewe nepsu, den kerna pakea jelen kebenaran malé ihujat.

3 Den kerna serakahé guru-guru pelsu oya malé berusaha mungenal untung ari kam urum cerite-cerite isepen jempol ni pakea tetapé kin pebueten ni pakea ukumen nge lemem isedienen den kebenasanen gere malé itanguhen.

4 Sebeb ike Allah gere munyayangen malèkat si bebuet dosa tetapé munekaren pakea ku wan neraka den urum lagu noya munyerahené ku wan gue -gue si gelep kin mununin pakea sawah lo penghakimen,

5 den ike Allah gere munyayangen denie purba, tetapé munyelamatan Nuh pelin, si mungeberen kebenaran oya, urum pitu jema lèn, ketike Wé munegèhen banjir kul atas denie jema-jema si pasek;

6 den ike Allah mubenasanen kute Sodom den Gomora urum rara, den urum lagu noya murèmokené  den mujadinen sara peringeten kin pakea si murip pasek i waktu si malé gèh,

7 tetapé Wé munyelamatan Lot, jema si benar, si dor muderite entap cara murip jema si gere mubetihi ukum den si mununungi hewe nepsu ni pakea pelin we.

8 Sebeb jema benar ini taring i lelah ni pakea den jep lo munèngon den mumengé pebueten pakea si jahat, sehinge jiweé si benar oya tesikse.

9 Jadi nge nyata Tuhen betih munyelamaten jema-jema saléh ari penyubeen den betih mungemas jema-jema jahat kin isikse i lo penghakimen,

10 khususé  pakea si munuruti hewe nepsué kerna ménét mungoteken diri den si muhine pemerintahen ni Allah. Pakea olok berani den somong, sehinge gere segen-segen muhujat kemulieen.

11 Pedahal malèkat-malèkat kendiri si bier pé lebih kuet den lebih bekuasa ari pakea gere mugunenen  cerak hujat , ike malèkat mununtut hukumen atas pakea i arap ni Allah.

12 Tetapé paké oya dis urum benatang si gere berakal, dis lagu benatang si ilahiren kin itengkam den ibenasanen pelin. Pakea muhujat hana si gere ibetihi pakea, sehinge ari pebueten ni pakea si jahat pakea kendiri malé benasa lagu benatang juah,

13 den malé mungalami nasib si kotèk sebagé upah kejahaten ni pakea. Befoya-foya i ruhul lo, ianggap pakea kenikmaten. Paké oya  kotèk den noda si mabuk wan hewe nepsu ni pakea ike pakea kunul mangan minum murum urum kam.

14 Mata ni pakea engkip nepsu jine den pakea gere pernah bosan bebuet dosa. Pakea mugoda jema-jema si lemah. Até ni pakea nge terlatih wan keserakahen. Pakea oyale jema-jema si terkutuk!

15 Pakea nge munaringen jelen si benar, entap oya sesatle pakea, nye mununungi jelen Bileam, anak Beor, si begalak munerime upah kin pebueten-pebueten si jahat.

16 Tetapé Bileam mudepet peringeten keras kin kejahatené, sebeb keledé beben si bisu becerak urum ling manusie kati enti ilanyuten nabi a pebuetené si udel oya.

17 Guru-guru pelsu oya lagu ulu ni  wih si kering, lagu emun si iiupen badé, bagi pakea nge tesedie ton wan kegelepen si paling dahsyat.

18 Sebeb pakea mungucepen cerak si sie-sie den mugunen hewe nepsu cabul kin mugoda jema-jema si ben muluahen diri ari pakea si murip wan kesesaten.

19 Pakea mujanyinen kemerdèkaen ku jema lèn, pedahal pakea kendiri hamba-hamba kebenasanen, kerna sahan si ikalahen jema, wéle hamba ni jema oya.

20 Sebeb entap pemetihen pakea tentang Tuhen den Juruselamatte, Yesus Kristus, pakea nge muluahen diri ari kotèk ni denie ini, tetapé musangkut mien i wasé sehinge keadaen ni pakea lebih buruk ari muloé.

21 Kerna oya bagi pakea jerohen ike pakea gere pernah mubetihi Jelen Kebenaran bidak mubetihié, tetapé mubalik mien ari perintah kudus si isawahen ku pakea.

22 Bagi pakea pas pedéh hana si icerakan pribahasa si benar ini:

“Asu ulak mien

ku loahé,

den babi si niri ulak mien

ku tunahené.”