2 Petrus 3

Lo ni Tuhen 3:1-16

Sudere-sudere si kukasihi, ini nge suret ke roa, si kutulisen ku kam. I wan keroa suret a aku berusaha mubangkiten pengertien si murni urum muningeten

2 kati kam muninget pecerakan si tengaha nge iucepen nabi-nabi kudus den perintah Tuhen den Juruselamat si nge isawahen mulalui rasul-rasulmu.

3 Si pemulo turah betihi kam oyale, bahwa i lo jemen akhir malé gèh penejek urum ejekené, oyale jema si murip munuruti hewe nepsué.

4 Kené pakea: “Isihen ke janyi tentang gèh-É si ijanyinen-É a? Sebeb ari masa muyang datunte, segele sesanah tetap lagu pemulo, i waktu denie iciptanen.”

5 Pakea sengeje gere mera betih, bahwa langit urum bumi ijadinen mulalui firman Allah den bumi ni ibentuk ari wih, den urum wih,

6 den urum wih pé bumi si ara i masa oya nge imusnahen urum banjir kul.

7 Tetapé ari firman oya pé langit urum bumi si besilo ni ijege den ikemas kin ibenasanen urum rara i lo penghakimen den kebenasanen jema-jema pasek.

8 Tapé sudere-sudere si kukasihi, si sara ni enti ilupen kam, bahwa bagi Tuhen sara lo dis lagu seribu tun den seribu tun dis lagu serlo.

9 Tuhen gere lalé munepati janyi-É, seger pé ara jema si muanggapé sebagé kelalènen, tetapé Wé seber terhedep kam, kerna Wé mungenaki kati enti ara si benasa, melénen kati bèwèné jema mubalik den betobat.

10 Tetapé lo Tuhen malé sawah lagu perusuh. I lo oya langit malé mosop  urum ling ni gegur si dasyat, den bene-bene i langit malé mesing musiut den bumi urum segele si ara i atasé malé mosop benasa.

11 Jadi, ike segele sesanah ni malé cir secara lagu noya, kune suci urum saléhé kam turah murip

12 oyale kam si munantinen den munetiren gèh ni lo Allah. I lo oya langit malé benasa wan rara den kerna poraké  bene-bene i langit malé cir.

13 Tetapé sesué urum janyi-É, kite munantinen langit si ayu den bumi si ayu, i onéle  ara kebenaran.

14 Sebeb oya, sudere-sudere si kukasihi, sire munantinen bèwèné ini, kam turah berusaha, kati kam idepeti gere becacat urum gere benoda i arap-É den wan pendamén urum Wé.

15 Anggaple keseberen Tuhente sebagé kesempaten bagi kam kin mudepet selamat, lagu Paulus pé suderente si kekasih nge munulis ku kam munurut hikmat si ikarunienen ku wé.

16 Hal oya itosé wan bèwèné sureté, waktu wé becerak tentang hal ini. Wan suret-sureté a ara hal-hal si nyanya ipehemi, sehinge jema si gere mumehemié den si gere teguh imené, mumuterbalikené mujadi kebenasanen pakea kendiri, dis lagu si ibueten pakea pé urum tulisen si lèn.

Penutup 3:17-18

17 Tetapé kam sudere-sudere si kukasihi, kam nge mubetihi hal ini sebelemé. Kerna oya jege-jegele, kati kam enti tesesat ku wan kesesataten jema-jema si gere mubetihi hukum den enti mosop amatenmu si teguh.

18 Tetapé muriple wan kasih karunie den wan pemetihen tentang Tuhen den Juruselamatte, Yesus Kristus. Bagi Wé le kemulieen se ni den sawah selama-lamaé.