2 Timotius 1

Salam 1:1-2

Ari Paulus, rasul Kristus Yesus urum kenak ni Allah kin mungeberen janyi tentang murip si ara i was Kristus Yesus,

2 ku Timotius, anakku si kukasihi: kasih karunie, rahmat den damé sejahtera ari Allah Ama den Kristus Yesus Tuhente, munyertai ko.

Ucepen sukur den nasèhat kin betekun 1:3-18

3 Aku mungucep sukur ku Allah, si kulayani urum até nurani si murni lagu si ibueten muyang datungku. Aku dor muninget ko i was doàku, porak lo mera pé kekelem.

4 Den waktu aku muninget luh matamu, aku olok mera kin mudemu  mien  urum ko kati engkiple kenak aténgku.

5 Sebeb aku teringet imenmu si tulus ikhlas, oyale imen si pemulen murip i was ananmu Lois den i was inemu Eunike den si kuyakini murip pé i was dirimu.

6 Kerna oyale kuperingeti ko kin munuripen karunie Allah si ara i ko mulalui pumuku si kuobonen ku atasmu.

7 Sebeb Allah munosanen ku kite nume roh keterihen, melènen roh si mubangkiten kekueten, kasih den ketertiben.

8 Jadi entile kemél besaksi tentang Tuhen te den entile kemél kerna aku sara jema ukumen entap Wé, melènen turutle muderite bagi Injil-É urum kekueten Allah.

9 Wé le si munyelamaten kite den munalu kite urum penalun si kudus, nume bedasaran pebueten kite, melènen bedasaran meksud den kasih karunie-É kendiri, si nge ikarunienen kin kite was Kristus Yesus sebelem jemen ijadinen

10 den si besilo ni nge nyata urum gèh ni Juruselamat te Yesus Kristus, si mulalui Injil nge mumoloken kuasa maut den mugèhen murip si gere nguk benasa.

11 Kin Injil inile aku nge itetapen mujadi si munyawahen keber jeroh den rasul urum guru.

12 Oyale sebebpé aku muderite bèwèné ni, tetapé aku gere kemél; kerna kubetih ku sahan aku percaya den aku yakin bahwa Wé bekuasa mujege hana si nge ipercayanen-É ku aku sawah i lo Tuhen.

13 Amatle bèwèné sesanah si nge ipengé ko ari aku sebagé conto ejeren si sehat den buetenle oya wan imen den kasih was Kristus Yesus.

14 Jegele reta si murege singe ipercayanen-É ku kite, urum Roh Kudus si  taring i was kite.

15 Betih ko bahwa bèwèné pakea si i daerah Asia Kucak nge munaringen aku; termasuk Pigelus den Hermogenes.

16 Tuhen kireé mungarunienen rahmat-É ku keluarga Onesiforus si nge mupepienen munyegaren atéku, wé gere kemél mudemui aku i wan penjere.

17 Waktu i Roma, wé berusaha mungenal aku den nge mudemui aku.

18 Kireé Tuhen munuruhen rahmat-É ku wé i lo ni Tuhen. Betale deléé pelayanan si ibuetené i Efesus, ko lebih mubetihié ari aku.