2 Timotius 2

Italu kin turut muderite 2:1-13

Sebeb oya anakku, jadile kuet i was kasih karunie Kristus Yesus.

2 Hana si nge ipengé ko ari aku i arap delé saksi, percayanenle oya ku jema-jema si nguk ipercayai si pané munejer jema lèn pé.

3 Turutle muderite sebagé prajurit si jeroh ari Kristus Yesus.

4 Sara prajurit si tengah bejuang gere  mubebenen dirié urum urusené kendiri, kati urum lagu noya komandané bekenak ku wé.

5 Sara olahragawan nguk mudepet mahkota sebagè juara ike wé betanding munurut peraturen olahragawan pelin.

6 Sara jema si berempus si bebuet keras, turahé wéle si pemulo murasai hasil usahaé.

7 Peratinenle hana si kuceraken ; Tuhen male munosah ku ko pemetihen i was segele sesanah.

8 Ingetle ini: Yesus Kristus  keturunen Daud, si nge bangkit ari antara jema benasa, oyale si kukeberen i wan Injilku.

9 Entap pengeberen Injil inile aku muderite, sawah ipenjerenen lagu penjahat, tetapé firman Allah gere lepas ipenjeren.

10 Kerna oya aku seber munangung bèwèné oya bagi jema-pilihen Allah, kati pakea pé mudepet keselamatan i was Kristus Yesus urum kemulieen si kekal.

11 Betulle peceraken ini:

"Ike kite benasa urum Wé,

kite pé malé murip urum Wé;

12 ike kite ten muderite,

kite pé malé turut

mumerintah urum Wé;

ike kite munyangkal Wé,  

Wé pé malé munyangkal kite;

13 ike kite gere setie,

Wé tetap setie,

kerna Wé gere lepas

munyangkal diri-É.

Nasèhat was muhedepi penejer si sesat 2:14-26

14 Ingeten den nasèhatile bèwèné oya urum sunguh ku pakea i arap ni Allah, kati pakea enti bedewe entap peceraken, kerna hal oya tikik pe gere begune, melènen malé mungaconen jema si mumengéé.

15 Usahanenle kati ko layak i arap ni Allah sebagé sara jema si bebuet si  gere kemél tentang bueté, si terus terang mungeberen firman kebenaran oya.

16 Tetapé entile ko turut was cerak si gere begune si gere suci si munamah kepaséken pelin.

17 Pecerekan paké oya mujorol lagu penyakit kanker, i antara ni pakea termasuk Himeneus den Piletus,

18 si nge munaringen kebenaran den munejeren bahwa kebangkiten kite nge terjadi sehinge pepien jema nge munyimpang ari imené.

19 Tetapé dasar si iobonen Allah oya teguh den meteréé oyale: “Tuhen mubetihi sahan si i empu-É.” den “Jep jema si munalu geral ni Tuhen kenaké munaringen kejahaten,”

20 I was umah si kul idepeti nume perkakas ari emas urum pirak pelin , melènen ari kayu, ari tanoh pé; si pemulo i gunen kin meksud si mulie den si pemarin kin meksud si kurang mulie.

21 Ike sara jema munyucinen dirié ari hal-hal si jahat, wé malé mujadi perkakas umah kin meksud si mulie, wé ikudusen, ipanang layak kin ipaké empué den isedienen kin buet si mulie.

22 Sebeb oya gipile nepsu jema mude, dedikle keadilen, kesetieen, kasih den damé murum urum pakea si muniro ku Tuhen urum até si murni.

23 Gipile debat si sie-sie, sebeb betih ko hal oya munimulen dewe .

24 Pedahal hamba Tuhen gere nguk pelolo, tetapé turah ramah terhedep bèwèné jema. Wé turah pané munejer, seber

25 den urum lemah lemut lepas mumimpin jema si mera mulewen, sebeb kedang Tuhen munosah kesempatan ku pakea kin betobat  sehinge pakea mubetihi kebenaran.

26 Urum lagu oya pakea mujadi seder, den muluah ari jaro ni Belis si nge munikot pakea kin mubueten kenaké.