2 Timotius 3

Keadaen manusie i akhir jemen 3:1-9

Betihile bahwa i lo-lo terakhir malé gèh masa si nyanya.

2 Manusie malé mungenaki dirié kendiri den mujadi hamba sèn. Pakea  kul ceraké, den malé munyombongen diri, mufitnah, gere taat ku jema tue, gere betih berijin den gere peduli kin agama.

3 Gere mungasihi, gere munampuni, mera mungoteken jema, gere munguasai diri, kasar, den gere bekenak ku  si jeroh.

4 Mera muhieneti, gere bepikir naru, sok betih, lebih munuruti hewe nepsu bidak munuruti Allah.

5 Secara lahiriah pakea mubueten ibadah, tetapé makna ibadah oya gere ibuatené. Gipile paké oya!

6 Sebeb i antara pakea ara si mayo ku umah jema lèn kin mujaring jema banan si lemah imené, si beret urum beben dosa den bebagé-bagé nepsu,

7 si bier pé dor mera iejeri, tapé gere pernah lepas mubetihi kebenaran.

8 Dis lagu Yanes urum Yambres munentang Musa, lagu oya pé pakea munentang kebenaran. Akal pakea nge rusak den imen ni pakea gere tehen uji.

9 Tetapé nge pasti pakea gere malé maju, keogohen ni pakea malé telas bagi bèwèné jema lagu Yanes urum Yambres.

Imen murip was penganiayaen den mubaca Kiteb Suci    3:10-17

10 Tetapé ko nge mununungi ejerenku, cara muripku, pendirienku, imenku, keseberenku, kasihku den ketekunenku.

11 Ko nge turut muderite penganiayaen urum kenyanyanen lagu si nge kuderite i Antiokia den i Ikonium urum Listra. Penganiayaen a kuderite den Tuhen nge muluahen aku ari bèwèné oya.

12 Memang jep jema si mera murip beribadah was Kristus Yesus malé muderite aniaya.

13 Tetapé jema jahat den jema pecogah malé mutamah jahat, pakea munyesaten den isesaten.

14 Tetapé kenaké ko tetap beramat ku kebenaran si nge iterime den iyakini

ko urum dor muninget jema si nge munejerené ku ko.

15 Ingetle  bahwa ari kucak mi ko nge mubetihi Kiteb Suci si nguk munosah hikmat ku ko den mumimpin ko ku keselamaten mulalui imen ku Kristus Yesus.

16 Segele tulisen si iilhamen Allah memang mupaedah kin munejer, kin munyatanen kesalahen,  kin minetahi tingkah laku, den kin mudidik jema was kebenaran.

17 Urum lagu noya jep jema empu ni Allah ilengkapi kin setiep pebueten  jeroh.