2 Timotius 4

Keberenle firman 4:1-8

I arap ni Allah den Kristus Yesus si malé muhakimi jema si murip urum si benasa, aku bemanat urum sunguh ku ko demi penyataen-É den demi kerajaen-É:

2 Keberenle Firman oya, siep sediele jeroh atawa gere jeroh waktué, sederenle hana si salah, koai den naséhatile urum segele keseberen den penejeren.

3 Kerna malé gèh waktué, jema gere né nguk munerime ejeren sehat, tetapé pakea mungamulen guru-guru munurut kenaké kin mumuesen kenak ni kemiringé.

4 Pakea malé munutup kemiringé terhedep kebenaran den munukeé bagi dongeng.

5 Tetapé kuasaile dirimu was segele hal, seberle muderite, buatenle buet pengeberen Injil den selesénenle tuges pelayanenmu.

6 Tentang diriku, rayohku nge muloi ituangen sebagé pesemahen den saat kematénenku nge rap.

7 Aku nge muakhiri petandingen si jeroh, aku nge sawah ku garis akhir den aku nge mujege imen.

8 Besilo ni nge tersedie bagiku mahkota kebenaran si malé ikaruniei kin aku ari Tuhen, Hakim si adil, i lo-É ; den nume kin aku pelin melènen ku bèwèné jema si munantinen Wé gèh urum denem.

Manat terakhir 4:9-18

9 Berusahale kati tir renyel gèh ku aku.

10 Kerna Demas nge mungenaki denie ni den munaringen aku. Wé nge berangkat ku Tesalonika. Kreskes nge beluh ku Galatia den Titus ku Dalmatia.

11 Lukas pelin si taring urum aku. Raile Markus den maile wé kini, kerna pelayanené penting kin aku.

12 Tikhikus nge ku utus ku Efesus.

13 Ike ko ku ini mai pé jubah si kutaringen i Troas i umah Karpus den kiteb-kitebku khususé  perkamen oya.

14 Aleksander, tukang tembege oya nge delé bebuet kejahatan tehedep aku. Tuhen malé mubelesé munurut pebuetené.

15 Kenaké ko jege-jege tehedep wé, kerna wé olok munentang ejerente.

16 I waktu pembelaenku si pemulen gere sara jema pé si munulung aku, bèwèné munaringen aku - kireé hal oya enti itangungen ku pakea-,

17 tetapé Tuhen nge murum urum aku den mungueten aku, kati mulalui aku Injil ikeberen seengkipé den bèwèné jema si nume Yahudi mumengenené. Urum lagu oya aku luah ari awah singa.

18 Den Tuhen malé muluahen aku ari bèwèné usaha si jahat. Wé malé munyelamaten aku, sehinge aku mayo ku wan kerejeen-É i serge. Bagi Wé le kemulieen sawah selama-lamaé! Amin.

Salam 4:19-22

19 Salam ku Priska urum Akwila den ku keluarga Onesiforus.

20 Erastus taring i Korintus den Trofimus kutaringen was keedeen gere sehat i Miletus.

 21 Berusahale ku ini sebelem musim bengi. Salam ari Ebulus den Pudes urum Linus den Klaudia den ari bèwèné sudere.

22 Tuhen munyertai rohmu. Kasih karunie-É munyertai ko.