3 Yohanes 1

Salam den doà 1-4

Ari aku sara penetue ku Gayus si kukasihi wan kebenaran.

2 Suderengku si kukasihi, aku bedoà buge ko jeroh den sehat wan segele sesanah, dis lagu jiwemu pé jeroh.

3 Sebeb aku olok besukacité, waktu pepien sudere gèh den munosah kesaksien tentang muripmu wan kebenaran, sebeb memang kam murip wan kebenaran.

4 Bagiku gere ara sukacite si lebih kul ari mumengé bahwa kekanakku murip wan kebenaran.

Saling munulung den perlewenen 5-12

5 Suderengku si kukasihi, kam bebuat sebagé jema percaya, kune kam bebuat sesanah kin sudere-sudere bier pé pakea jema asing.

6 Pakea nge munosanen kesaksien i arap ni jemaat tentang kasihmu. Jeroh pedéh pebuetenmu a, ko munulung pakea wan pejelenen ni pakea urum cara si bekenak ku Allah.

7 Sebeb entap geral-É pakea nge berangkat urum gere munerime sanah pé ari jema si gere mubetihi Allah.

8 Kite wajib munerime jema si lagu noya, kati kite nguk munuet bagien wan buet ni pakea kin kebenaran.

9 Aku nge munulis pepien hal ku jemaat, tetapé Diotrepes si ménét mujadi jema penting i antara pakea gere mera munerime kami.

10 Kerna oya ike aku gèh, aku muningeten segele pebueten si nge ibueté kune wé bebuet jahat den becerak cogah tentang kami; den gere ilen pues urum oya, wé kendiri pé gere mera munerime sudere-sudere si gèh, tetapé mungoai jema-jema si mera munerime pakea, den mungini pakea tangkuh ari jemaat.

11 Suderengku si kukasihi, entile mununungi sana si jahat, melènen si jeroh. Barik sahan bebuet jeroh wé asalé  ari Allah, tetapé barik sahan bebuat jahat wé gere pernah munèngon Allah.

12 Tentang Demetrius bèwènè jema munosah kesaksien si jeroh, bahkan Allah pé mumuji wé. Den kami pé munosah kesaksien si jeroh tentang wé, den betih ko bahwa kesaksien kami betul.                                                                          

Penutup 13-15

13 Delé hal si turah kutulisen ku ko, tetapé aku gere mera munulisené urum tinta den pena .

14 Kuharap tir mudemu urum ko den becerak mudemu arap .

15 Damé sejahtera munyertai ko! Salam ari sebet-sebet mu. Sawahenle salamku ku sebet-sebet sara sara.