Wé Maté Ganti Ku

Wé Maté Ganti Ku

Kapten kapal si gere beTuhen begulang i was ni kamaré i atas kapal si tengah belayar i lelah ni lut. Ajalé male sawah. Wé gentar muhedepi Penciptaé den atéé iengkipi perasaen terih, kerna wé munyederi, bahwa jiweé sesat kin selememé. Kapten Coutts munalu temuluké: “Williams, bedoàle kin aku. Sekune ibetihi ko, aku ni jema si olok jahat den seni aku malé beluh Den gere né ulak.”

“Aku gere lepas bedoà, kapten. Segerpé atéku denem kin bedoà, tapé aku gere lepas.” “Uetenle Alkitab Den bacale firman Tuhen oya kin aku kerna aku malé tir beluh kin selamaé.” “Aku gere munempui Alkitab, kapten. Sekune kapten betihi, aku pé nume jema si beTuhen.” “Cube talu Tomas deh, mungkin betihé caraé muniken doà .”

Tir-tir Tomas mayo ku was kamar kapten si tengah bejuang mulewen maut oya. Kapten Coutts mumerin: “Tomas, macik atéku bahwa seni aku malé munempuh perjelenen ku ton si baka. Bedoàle kin aku den tironen ku Tuhen, kin mungasihi jiwengku si celaka ni.” “Sesunguhé aku malé bedoà kin kapten ike aku lepas. Waktu aku muniken doà si pemarin, aku kekanak ilen.” “Arake ko munempui Alkitab, kati ko lepas mubacanen pepien ayat kin aku?” Sayang pedéh gere ara Alkitab ku.”

Beta ngerié kin sara jema bedosa si muhedepi maut. Beta sedihé keadaen jema si i ambang masa kekekalen tanpa Kristus. Pakea muloi mungenal jema i antara awak kapal a si lepas bedoà kin nakhoda wa. I samping oya pakea berusaha mudemunen Alkitab i bèwèné bagien kapal a. Tetapé usaha ni pakea sie-sie pelin. Akhiré sara awak kapal mumerin ku nakhoda wa bahwa wé pernah munèngon Alkitab wan pumu ni temuluk tukang jerang, sara anak rawan si begeral Willy Patt. “Tir renye talu anak oya, kini imamié Alkitab é.” Kene kapten Coutts.

Awak kapal a tir-tir mudemunen anak rawan a den mumerin: “Anak manis, arake Alkitab i ko?” “Ara pak. Tetapé aku mubacaé i waktu rengang pelin we.” Jeroh pedéh nak. Maile Alkitab mua ku was kamar ni kapten. Wé tengah wan keadaen sakiten si olok parah den wé mungenaki Alkitab sebelem wé benasa.” Beluhle Willy Patt ku kamar nakhoda.

“Arake ko munempui Alkitab nak?”

“O kapten, aku munempuié.”

“Kunulle den kenalen sara bagien wan firman Tuhen si lepas munulung aku , kerna macik atéku bahwa aku malé benasa. Kenalle bagien tentang kemurahen Tuhen kin sara jema bedosa lagu aku ni den bacanenle firman Tuhen oya kin aku.”

Gere ibetih anak kucak a hana si turah ibacaé, tapé muninget le wé kin peristiwe, waktu we muniro ku ineé kin belayar i atas kapal oya. I kesempatan oya ineé mubacanen pepien ayat ari kiteb nabi Yesaya 53:5. Willy munuke Alkitab é i pasal si agung oya, simucerminen kasih den rahmat Tuhen Yesus Kristus si semperneé, sementara Wé munosah murip-É ganti ni jema-jema bedosa si celaka lagu kapten John Coutts oya.

Waktu Willy mubaca ayat 5 si isié lagu ini: “Tetapé wé itikem ari kerna pemberontaken te wé iremuken kerna kejahaten te; ganjaren simunegehen keselamatan kin kite itimpenen ku wé den ari kerna luke-lukeé kite mujadi jeger.”

Kapten oya muperhatinen firman Tuhen oya demi keselamatan jiweé. Wé mumengé firman Tuhen a engkip perhatien, kerna ibetihé bahwa inile kesempatené si pemarin kin munerime keselamatan, becerakle wé: “Genap nak, oyale si kuperlunen, bacale seger mi.”

Seger mi Willy mubacanen firman Tuhen oya.

“Betul nak, oyale si kuperlunen. Jeroh, oyale Sabda Tuhen kin keselamatan jiweku, pasti.”

Cerak ni nakhoda wa mudorong Willy kin mumerin: “Kapten, waktu ayat ini kubaca i umah, ine mungini aku kin munyisipen geralku i antara kalimet-kalimeté. Nguk ke aku mubacaé lagu si iejeren ine ku aku?

“Tentu nak, sisipen geralmu lagu si iejeren ine mu a den bacale ayat oya seger mi.”

“Wé -Yesus- itisok kerna pemberontaken Willy Patt; Wé iremuken kerna kejahaten Willy Patt; ganjaren si munegèhen keselamatan kin Willy Patt itimpenen ku Wé , den ari kerna luke-luke-É Willy Patt mujadi jeger.”

Ketike Willy Patt selesé mubacanené, kapten a uet kin munamat Willy, sire mumerin: “Hei anakku si jeroh, sisipenle geralku i antara kalimet-kalimet a den ulangile mubacaé.”

Seger mi ayat a ibacanen urum arih-arih:

“Wé - Yesus - itisok kerna pemberontaken John Coutts; Wé iremuken kerna kejahaten John Coutts; ganjaren si munegèhen keselamatan kin John Coutts itimpenen ku Wé, den ari kerna luke-luke-É John Coutts mujadi jeger.”

Nge mari Willy meh mubaca, iperin kapten a: “Oyale si kuperlunen, nak, ko nguk ulak ku tonmu.”

Kapten a begulang mien den mupepieni mungulangi kata-kata si ikasihié, si ara wan Yesaya 53: 5 a sire munyisipen geralé i antara kalimet-kalimet a. Waktu wé mubuetené, atéwé iengkipi urum galak até sergewi, ibetihié bahwa jiweé iselamaten.

Yohanes 1:12. “Tetapé bèwèné jema si munerime Wé si percaya wan geral-É, ku pakea iosah-É hak mujadi anak-anak ni Allah.”

Sara jema bedosa nge munerime keselamatan ari kematénen Yesus Kristus. Sebelem Tuhen munalu kapten John Coutts ulak, wé besaksi ku jep jema si belayar urum kapalé, bahwa Kristus si isaliben i bur Golgota itisok ari kerna pemberontaken te, Wé iremuken ari kerna kejahaten te. Hukumen si munegèhen keselamatan kin kite itimpenen ku Wé, den ari luke-luke-É kite mujadi jeger.

Sudere pembaca si budimen,... nge ke sudere itebus urum kematénen ni Kristus i kayu salib? Nge ke sudere seder sebagé jema bedosa si celaka, male iukum i hedepen Allah,nguk beharap ku kematénen Tuhen Yesus pelin kin munampuni dosa-dosa ni sudere?

Wan Yohanes 3:16 kite lepas mubueten hal si dis, “Dum kerna kasih ni Allah kin denie ni, sehinge We nge munosahen Anak-É si tungel, kati jep jema si percaya ku Wé gere benasa tapé mudepet murip si kekal.”

Tentu kasih le si mujadi kebutuhen wan denie ni. Anak gere né murasanen kasih jema tueé, betapé istri gere murasanen kasih ni suamié den si lené. Ike sudere tengah murasanen gere ara jema mungasihi sudere, bacale firman Tuhen ni urum munyisipen geral sudere wan garis si isedienen den nge mari oya bacale selengkapé.

Bukti Kasih Allah

“Dum kerna kasih ni Allah kin _______________________, sehinge Wé nge munosahen Anak-É si tungel, kati _______________________ si percaya ku Wé gere benasa tapé mudepet murip si kekal.”

Langkah-Langkah kin munerime murip si kekal:

1. Sadar kin dosa te den bahwa Yesus maté i kayu salib kin munebir utang dosa-dosa te.

2. Kite mungaku bahwa kite gere lepas munebir dosa te a urum mubueten pebueten jeroh.

3. Mungakui hahwa Yesus oyale si nge itentunen Allah mujadi jelen pendaméen kerna imen (Roma 3:25) Den mungakui gere ara jelen ku serge selén Yesus (Yohanes 14:6).

4. Bedoàle lagu si i tuyuh ni: “Tuhen Yesus, aku mungaku bahwa Ko pelin we sara-saraé jelen ku serge si nge itentunen Allah, kerna Ko nge mate i kayu salib kin munebir utang dosaku den se ni aku gèh ku Ko, terimele aku den ampunile segele dosa-dosaku, Amin.”

5. Wan mungakui dosa te perlu kite mungakuié sara-sara, urum jelas, dosa si pernah kite bueten.

6. Ike ara bene-bene si bekhasiat umpamaé jimet atawa si lén si najis i mata Tuhen turah imusnahen (Kis Rasul 19:19).