Matius 1

Silsilah ni Yesus Kristus 1: 1-17

(Luk. 3:23-38)

Inile silsilah ni Yesus Kristus, anak ni Daud, anak ni Abraham.

2 Abraham ama ni Isak, Isak ama ni Yakup, Yakup ama ni Yehuda urum serinen-serinené,

3 Yehuda ama ni Peres urum Zerah ari Tamar, Peres ama ni Hesron, Hesron ama ni Aram,

4 Aram ama ni Aminadap, Aminadap ama ni Nahason, Nahason ama ni Salmon,

5 Salmon ama ni Boas ari Rahap, Boas ama ni Obet ari Rut, Obet ama ni Isai,

6 Isai ama ni reje Daud. Daud ama ni Salomo ari banan ni Uria,

7 Salomo ama ni Rehabeam, Rehabeam ama ni Abia, Abia ama ni Asa,

8 Asa ama ni Yosapat, Yosapat ama ni Usia,

9 Usia ama ni Yotam, Yotam ama ni Ahas, Ahas ama ni Hiskia,

10 Hiskia ama ni Manase, Manase ama ni Amon, Amon ama ni Yosia,

11 Yosia ama ni Yekonia urum serinen-serinené i waktu penekaran ku Babel.

12 Nge mari penekaran ku Babel, lahirle Sealtiel anak ni Yekonia, Sealtiel ama ni Serubabil,

13 Serubabil ama ni Abihud, Abihud ama ni Eliakim, Eliakim ama ni Asor,

14. Asor ama ni Sadok, Sadok ama ni Ahim, Ahim ama ni Eliud,

15 Eliud ama ni Eleasar, Eleasar ama ni Mattan, Mattan ama ni Yakup,

16 Yakup ama ni Yusup, rawan ni Maria, si mulahiren Yesus si igerali Kristus.

17 Jadi ari Abraham sawah ku Daud bèwèné ara empat belas keturunen, den ari Daud sawah ku penekaren ku Babel ara empat belas keturunen, den ari penekaren ku babel sawah ku Kristus ara empat belas keturunen.

Kelahiren ni Yesus Kristus 1 : 18-25

(Luk 2:1-7)

18 Arapé kelahiren ni Yesus Kristus lagu ini : Ketike Maria, ine ni Yesus bebiak urum Yusup, sebelem pakea mujadi rawan banan, Maria nge benemah ari Roh Kudus.

19 Yusup rawané, jema si jeroh den gere mera mupekemélen Maria, sehinge wé mumutusen kin munyerénené urum ongot-ongot.

20 Tetapé ketike wé mupetimangen hal oya, ièngoné sara malèkat ni Tuhen wan nipié nye mumerin : “Yusup, anak ni Daud, enti ko terih munuet Maria kin bananmu; sebeb anak si ara i was kanungené a berasal ari Roh Kudus.

21 Wé malé mulahiren sara anak rawan den ko malé mugerali-É Yesus, sebeb Wéle si malé munyelamaten umat-É ari dosa-dosa ni pakea.”

22 Bèwèné ni terjadi kati genaple sana si nge iperinen Tuhen mulalui nabi si mumerinen :

23 “Èngonle, anak beru oya malé munganung nye malé mulahiren sara anak rawan, den pakea malé mugerali Wé Imanuel, artié : Allah urum kite.”

24 Mari Yusup uet ari noméwé, ipebuetné lagu si nge iperinen malèkat

ni Tuhen a, den munuet Maria kin banané;

25 tetapé wé gere bersetubuh urum Maria sawah Maria mulahiren sara anak rawan, den Yusup mugerali Wé Yesus.