Matius 10

Yesus munalu kedue belas rasul 10: 1-4

(Mrk. 3:13-19; Luk. 6:12-16)

Yesus munalu kedue belas murid-É den munosah ku pakea kuasa kin munusir roh-roh jahat den mujegeren segele penyakit urum segele kelemahen.

2 Den inile geral ni kedue belas rasul a : Pemulo, Simon si italu Petrus urum Andreas serinené, den Yakobus anak ni Zebedeus urum Yohanes serinené,

3 Pilipus urum Bartolomeus, Tomas urum Matius penagih pajak, Yakobus anak ni Alpeus urum Tadius,

4 Simon urang Zelot urum Yudas Iskariot si muhianati Yesus.

Yesus munutus kedue belas rasul 10: 5-15

(Mrk. 6:7-13; Luk. 9:1-6)

5 Kedue belas murid ni iutus Yesus den Wé bemanat ku pakea, ken-É: “Enti kam beluh ku daerah si nume urang Yahudi atawa mayo ku wan kute ni urang Samaria;

6 melènen beluhle ku bebiri-bebiri si mosop ari umet Israel. 

7 Beluhle nye keberenle : Kerejeen Serge nge rap.

8 Jegerenle jema si sakiten, bangkitenle jema si benasa, bersihenle jema mubuduk, den usirle setan-setan; kam nge munerime urum cume-cume, entap ni oya osanenle urum cume-cume.

9 Enti munemah emas, pirak atawa tembege wan genit ni kam,

10 wan pejelenen ni kam enti munemah selpah, roa baju, selop, atawa tikon; sebeb jema si bebuet patut mudepet upahé.

11 Den ike kam mayo ku kute atawa kampung, perikse mulo sahan si layak i oné; den taringle urum wé sawah kam beluh ari ton a.

12 Waktu kam mayo ku umah ni jema, ucepenle salam ku pakea.

13 Ike penempu ni umah a layak munerime kam, damé sejahteramu turun ku atasé; tetapé ike gere, damé sejahteramu a ulak ku kam.

14 Den barik sahan si gere munerime kam atawa gere munerime pecerakan ni kam, taringen renyel umah atawa kute a, den kepurenle dulé ari kiding ni kam.

15 Sesunguhé Kuperinen ku kam : I lo penghakimen, tanoh Sodom urum Gumora lebih ringen hukumené bidak kute a.”

Penganiayaen si malé gèh 10: 16-25

(Mrk. 13:9-13; Luk. 12:2-7, 21:12-17)

16 “Ingetle, Aku munutus kam lagu bebiri ku lelah ni serigala; oya kati kam turah cerdik lagu lipé den tulus até lagu manuk birahpati.

17 Inget-inget kin jema-jema; sebeb pakea malé munyerahen kam ku pengadilen agama den pakea malé munyikse kam i umah ibedet ni pakea.

18 Den kam malé imai ku hedepen ni jema si bekuasa urum reje-reje entap ni Aku, sebagé kesaksien ku pakea den ku jema si nume urang Yahudi.

19 Waktu kam iserahen pakea, enti macik até ni kam kune atawa hana si malé iperinen kam, kerna sana si turah iperinen kam malé iosanen i waktu oya pé;

20 sebeb nume kam si becerak, melènen Roh ni Amamu si i was ni kam si becerak.

21 Jema malé munyerahen serinené kin iunuh, betapé ama malé munyerahen nyawa anaké, den kekanak malé mulewen jema tueé nye malé mununuh pakea.

22 Bèwèné jema malé begeli até ku kam entap ni geral-Ku; tetapé jema si bertehen sawah ku pemariné malé iselamaten.

23 Ike pakea munganiaya kam i wan sara kute, musangka renyel ku kute si lèn; sebeb sesunguhé Kuperinen ku kam, sebelem kam selesé munentongi kute-kute ni Israel, Anak ni manusie nge gèh.

24 Murid gere mulebihi gurué, atawa temuluk gere mulebihi rejeé.

25 Genaple kin murid ike wé mujadi dis lagu gurué, betapé kin temuluk ike wé mujadi dis lagu rejeé. Ike penempu ni umah italu Beelzebul, lebih-lebih mien seisi umahé.”

Terihle ku Tuhen 10: 26-31

(Luk. 12:2-7)

26 “Kerna oya enti kam terih kin pakea, sebeb gere ara sanah pé si mututup kasé gere iukenen, den gere ara sanah pé si mutuni kasé gere ituruhen.

27 Sana si Kuperinen ku kam i wan gelep, perinenle oya i wan terang; den sana si isisunen ku kemiringmu, umumenle oya ari atas ni umah.

28 Den enti kam terih ku pakea si lepas mununuh tubuh, tetapé gere bekuasa mununuh jiwe; sebaliké terihle kam ku Wé si bekuasa mubenasanen tubuh urum jiwe i wan neraka.

29 Gere ke roa manuk tumpit ijuel jema seringit? Den gere sara pé ari manuk a metuh ku tanoh ike gere ibetihi Amamu.

30 Tetapé kam, wuk ulu ni kam pé bekire bèwèné.

31 Entap ni oya enti kam terih, sebeb kam lebih murege ari delé manuk tumpit a.”

Tentang pengakuen urum penyangkalen kin Yesus 10: 32-33

(Luk. 12:8-9)

32 “Jadi jep jema si mungakui Aku i arap ni manusie, Aku pé kasé mungakui wé i arap ni Amang-Ku si i serge.

33 Tetapé barik sahan si munyangkal Aku i arap ni manusie, Aku pé kasé munyangkal wé i arap ni Amang-Ku si i serge.”

Yesus gèh nume munemah damé tapé mumisahen 10: 34-39

(Luk. 12:51-53; 14:26-27)

34 “Enti kam mungire bahwa Aku gèh ku denie kin munemah damé; Aku gèh nume kin munemah damé tetapé pedang.

35 Sebeb Aku gèh kin munos pemusuhen jema rawan urum amaé, anak banan urum ineé, pemén urum inen tueé,

36 den lewen ni jema oyale jema-jema si ara i umahé.

37 Sahan si mungasihi amaé atawa ineé lebih ari Aku, wé gere layak kin Aku; den sahan si mungasihi anak rawané atawa anak berué lebih ari Aku, wé gere layak kin Aku.

38 Barik sahan si gere munarang salibé urum mununung Aku, wé gere layak kin Aku.

39 Jema si mupertehenen nyawaé, wé malé kebenénen nyawaé, den sahan si kebenénen nyawaé entap ni Aku, wé malé mudepetené.”

Tentang upah 10: 40-42

(Mrk. 9:41)

40 “Sahan si munyamut kam, wé munyamut Aku, den sahan si munyamut Aku, wé munyamut Wé si munutus Aku. 

41 Sahan si munyamut sara nabi sebagé nabi, kasé wé munerime upah ni nabi, den sahan si munyamut sara jema si benar sebagé jema si benar, kasé wé munerime upah ni jema si benar.

42 Den barik sahan si munosah minum, bierpé sara cangkir wih bengi we ku sara ari si kucak ni kerna wé murid-Ku, sesunguhé Kuperinen ku kam, upahé gere mungkin mosop.”