Matius 11

Yesus urum Yohanes Pembaptis. 11: 1-19

(Luk. 7:18-35)

Nge mari Yesus bemanat ku kedue belas murid-É, berangkatle Wé ari oné kin munejer den mungeberen Keber Jeroh i wan kute-kute ni pakea.

2 Ketike Yohanes Pembaptis i wan penjere mumengé pebueten-pebueten ni Kristus,

3 ikinié murid-muridé mungune ku Yesus : “Guru ke si malé gèh oya atawa turah ke kami munantinen jema si lèn?”

4 Jeweb Yesus ku pakea : “Beluhle nye perinenle ku Yohanes sana si ipengé urum si ièngon kam:

5 jema mbota munèngon, jema mudèngkoh lepas remalan, jema mubuduk mujadi bersih, jema mutuli mumengé, jema benasa ibangkiten den kin jema miskin ikeberen Injil.

6 Mubahgie mi jema si gere muragunen Aku.”

7 Mari murid-murid ni Yohanes beluh, muloile Yesus becerak ku jema delé a tentang Yohanes : “Kin munèngon hana ke kam beluh ku padang gurun? Sara batang uluh si iiup kuyu ke?

8 Atawa kin munèngon hana ke kam beluh? Jema si bepekayan alus ke? Èngonle, jema si munyeluk pekayan alus a ara i was istana ni reje.

9 Jadi hana kati kam beluh? Munèngon nabi ke? Betul, Kuperinen ku kam, bahkan lebih ari nabi.

10 Sebeb, tentang Yohanes Pembaptis ara tertulis : Èngonle, Aku mungini utusen-Ku munuloi Ko, wé malé munyiepen jelen-Mu i arap-Mu.

11 Sesunguhé Kuperinen ku kam, i antara bèwèné jema si ilahiren jema banan gere pernah uet jema si lebih kul ari Yohanes Pembaptis, tetapé si paling kucak i wan Kerejeen Serge lebih kul ari wé.

12 Ari masa ni Yohanes Pembaptis sawah besilo, Kerejeen Serge olok ilewen den jema si mulewen a berusaha munguasaié.

13 Sebeb bèwèné nabi urum kiteb Taurat benubuat sawah ku masa ni Yohanes;

14 den ike kam mera munerimeé, wéle Elia si malé gèh oya.

15 Sahan si munempui kemiring, kenaké wé mumengé!

16 Urum hana ke Kuumpamanen angkatan besilo ni? Pakea seumpama kekanak si tengah kunul i kedé si mumerin ku pong-pongé :

17 Kami nge muniup suling kin kam, tapé kam gere betari; kami nge besebuku, tapé kam gere mongot.

18 Sebeb waktu Yohanes gèh, wé gere mangan urum minum, den iperin pakea : Wé kerasuken setan.

19 Den waktu Anak ni Manusie gèh, Wé mangan urum minum, den iperin pakea : Èngonle, Wé jema perengapen den peminum anggur, pong ni penagih pajak urum jema bedosa. Tetapé, hikmat ni Allah ibenaran mulalui bèwèné pebueten-É.”

Yesus munyela kute- kute si gere betobat 11: 20-24

(Luk. 10:13-15)

20 Renyel Yesus muloi munyela kute-kute si i oné Wé mubueten olok delé tene mukjizet, sebeb pakea gere betobat, ken-É :

21 “Celakale ko Korazin! Celakale ko Betsaida! Kerna ike i Tirus urum i Sidon terjadi tene mukjizet si nge terjadi i lelah ni kam, nge lemem pakea betobat berupuh guni nye munobonen dul i atan ni ulué.

22 Entap ni oya Kuperinen ku kam : I wan lo penghakimen, ukumen kin Tirus urum Sidon lebih ringen ari ukumen kin kam.

23 Den ko Kapernaum, ko malé iniken sawah ku langit ke? Ko malé ituhen sawah ku neraka! Kerna ike i Sodom terjadi tene mukjizet si nge terjadi i lelahmu, tentu kute a ara ilen sawah besilo ni.

24 Entap ni oya Kuperinen ku kam : I wan lo penghakimen, ukumen kin tanoh Sodom lebih ringen ari ukumen kin kam.”

Undangen ni Yesus 11: 25-30

(Luk. 10:21-22)

25 I waktu oya iperin Yesus : “Aku besukur ku Ko Ama, Tuhen si bekuasa i serge urum i denie, entap hal-hal ni ituninen Ama ari jema bijaksana urum jema pané, den nge inyatanen Ama ku kekanak kucak.

26 O, Ama, sebeb oyale si ikenaki até ni Ama.

27 Segele sesanah nge iserahen Amang-Ku ku Aku, den gere sara jema pé mubetihi Anak oya kecuali Ama, den gere sara jema pé mubetihi Ama kecuali Anak urum jema si kin wé Anak oya munyatanené.

28 Gèh renyel ku Aku, bèwèné kam si nge hèk den si mubeben beret, Aku malé munosanen ketenangen ku kam.

29 Arangle igung-Ku nye belejerle ari Aku, entap Aku lemah lemut urum renah até, den jiwemu malé mudemunen ketenangen.

30 Sebeb igung-Ku a temas den beben-Ku pé ringen.”