Matius 12

Pengunenen tentang lo Sabat 12: 1-8

(Mrk. 2:23-28; Luk. 6:1-5)

I waktu oya, tar lo Sabat, Yesus remalan muliweti empus gandum; murid-murid-É mulapé, renyel pakea muloi mumelték uah ni gandum nye mumangané.

2 Ketike urang Parisi munèngoné, iperin pakea ku Yesus : “Èngonle, murid-murid-Mu bebuet sana si gere ienguken ibueten tar lo Sabat.”

3 Tetapé iperin Yesus ku pakea : “Gere ke ibaca kam sana si ibueten Daud ketike wé urum pong-pongé mulapé,

4 kune wé mayo ku was Umah ni Allah, renyel mumangan ruti si i pesemahen ku Allah, si gere nguk ipangan Daud atawa pé pong-pongé si ara urum wé, kecuali imem-imem we?

5 Atawa gere ke ibaca kam wan kiteb Taurat bahwa tar lo Sabat imem-imem mulanggar hukum lo Sabat i wan Umah ni Allah, tapé gere besalah?

6 Kuperinen ku kam : Si lebih kul ari Umah ni Allah ara i sien.

7 Tetapé ike kam nge mubetihi arti pecerakan ni : Si Kukenaki oyale belas kasihen den nume pesemahen, tentu kam gere munukum jema si gere besalah.

8 Sebeb Anak ni Manusie, Tuhen atas lo Sabat.”

Yesus mujegeren jema si maté semelah pumué tar lo Sabat 12: 9-15a

(Mrk. 3:1-6; Luk. 6:6-11)

9 Renyel Yesus berangkat ari oné, nye mayo ku umah ibedet ni pakea.

10 I oné ara sara jema si maté semelah pumué; kati pakea lepas munyalahen Yesus mungune pakea ku Wé : “Ienguken ke mujegeren jema tar lo Sabat?“

11 Tetapé iperin Yesus ku pakea : “Ike ara ari antara ni kam si munempui sara bebiri, den bebiri a metuh ku wan luang si relem tar lo Sabat, gere ke malé itengkamé nye itangkuhené bebirié a?

12 Manusie lebih murege ari bebiri! Jadi iengukken bebuet jeroh tar lo Sabat.”

13 Renyel iperin Yesus ku jema wa : “Lurusen pumumu!” Den wé mulurusené, nye jegerle pumué a, mujadi sehat lagu pumué si semelah a mien.

14 Renyel tangkuhle urang Parisi den beruning mulewen Yesus kin mununuh Wé.

15a Tetapé Yesus mubetihi hal oya, den beluh ari oné.

Utusen si ipilih Allah 12: 15b-21

15b Delé jema mununungi Yesus, nye Wé mujegeren bèwèné pakea,

16 den Yesus muperingeten pakea kati enti isederen pakea sahan Wé.

17 kati genaple sana si nge iperinen nabi Yesaya, kené :

18 “Èngonle, Utusen-Ku si nge Kupilih, si Kukasihi, si kin Wé Aku bekenak; Aku malé munobonen Roh-Ku ku atan ni Wé, den Wé malé munyederen hukum ku bengsa-bengsa.

19 Wé gere mubantah atawa pé metuk, den gere sara jema pé mumengé ling-É i jelen-jelen.

20 Uluh si mugeldéh gere malé ipoloken-É den des si nge reduk gere malé iempoten-É, sawah Wé mujadinen hukum oya menang.

21 Den i wan geral-É bengsa-bengsa malé beharap.”

Yesus den Beelzebul 12: 22-32

(Mrk. 3:20-30; Luk. 11:14-23, 6:43-45)

22 Renyel imaile ku Yesus sara jema si kerasuken setan, jema wa mbota urum bisu; Yesus mujegerené sehinge jema si bisu a ne becerak urum munèngon.

23 Takjuble bèwèné jema delé a, kené : “Gere ke Wé ni Anak ni Daud?”

24 Tetapé ketike urang Parisi mumengéé, iperin pakea : “Urum Beelzebul reje ni setan Wé munusir setan-setan.”

25 Ibetih Yesus pikiren ni pakea nye iperin-É ku pakea : “Setiep kerejeen si mupecah-pecah, mulewen dirié kendiri tentué hancur; den setiep kute atawa umah tenge si mupecah-pecah, mulewen dirié kendiri gere lepas betehen.

26 Den ike Belis munusir Belis, wé pé mupecah-pecah mulewen dirié ken diri; ike beta kune kerejeené lepas betehen?

27 Den ike Aku munusir setan-setan urum kuasa Beelzebul, urum kuasa sahan ke anak-anakmu munusiré? Entap ni oya pakeale si malé mujadi hakim ni kam.

28 Tetapé ike Aku munusir setan urum kuasa Roh ni Allah, sesunguhé Kerejeen ni Allah nge gèh ku kam.

29 Atawa kune jema lepas mayo ku was umah ni jema si kuet den murebut retaé, ike gere iikoté mulo jema kuet oya? Mari iikoté barole wé lepas murebut umahé.

30 Sahan si gere urum Aku, wé mulewen Aku; sahan si gere mungamulen urum Aku, wé munyeré-berénen.

31 Kerna oya Kuperinen ku kam : Segele dosa urum hujet lepas iampuni, tetapé hujet ku Roh Kudus gere iampuni.

32 Den barik sahan si mungucepen pecerakan mulewen Anak ni Manusie, wé malé iampuni; tetapé barik sahan si mungucepen pecerakan mulewen Roh Kudus, wé gere iampuni, i denie ni atawa i denie si malé gèh pé gere iampuni.”

Batang kayu urum uahé 12: 33-37

(Luk. 6:43-45)

33 “Ike batangé jeroh uahé pé jeroh, ike batangé gere jeroh tentu uahé pé gere jeroh; sebeb batang a ibetihi ari uahé.

34 Woi kam keturunen ni lipé, kune kam lepas mumerinen hal-hal si jeroh, pedahal kam jahat? Sebeb sana si iceraken ni awah muluep ari até.

35 Jema si jeroh munangkuhen hal-hal si jeroh ari wan atéwé si jeroh, den jema si jahat munangkuhen hal-hal si jahat ari wan atéwé si jahat.

36 Tetapé Kuperinen ku kam bahwa setiep cerak sie-sie si iperinen jema turah ipetangung-jewebené i lo penghakimen;

37 sebeb munurut pecerakanmu kam malé ibenaran, den munurut pecerakanmu pé kam malé iukum.”

Tene mukjizet Yunus 12: 38-42

(Mrk. 8:11-12; Luk. 11:29-32)

38 Renyel pepien ni ahli Taurat urum urang Parisi mujeweb Yesus, kené : “Guru, kami ménét munèngon sara tene mukjizet ari Guru.”

39 Tetapé jeweb Yesus ku pakea, ken-É : “Kam angkatan si jahat urum si pejine mununtut sara tene mukjizet, tapé tene mukjizet gere malé iosanen ku kam kecuali tene mukjizet ni Nabi Yunus.

40 Sebeb lagu Yunus tulu lo tulu ingi i was tuke ni gulè si kul, betapé kasé Anak ni Manusie tulu lo tulu ingi i was rahim ni bumi.

41 I lo penghakimen, urang Niniwe malé bangkit urum angkatan ni den pakea malé munukumé; sebeb pakea betobat waktu mumengé pecerakan ni Yunus, den èngonle si lebih kul ari Yunus ara i sien.

42 I lo penghakimen, ratu ari selatan malé bangkit urum angkatan ni den wé malé munukumé; sebeb ratu ni gèh ari ujung ni bumi kin mumengé hikmat ni Salomo, den èngonle si lebih kul ari Salomo ara i sien.”

Ulak ni roh jahat 12: 43-45

(Luk. 11:24-26)

43 “Ike roh jahat tangkuh ari sara jema, wé muralani ton-ton si kering 

mungenal ton teduh, den gere mudepetié.

44 Renyel iperiné : Aku malé ulak ku umahku si nge kutaringen a; den waktu wé gèh, idepetié umah a kosong, nge isapu den rapi mususun.

45 Mari oya wé beluh nye imaié pitu roh si lèn si lebih jahat ari wé, den pakea mayo nye taring i oné; den keadaen pemarin ni jema wa lebih olok ari keadaené si pemulo. Betapé malé terjadi ku angkatan si jahat ni.”

Ine urum serinen-serinen ni Yesus 12: 46-50

(Mrk. 3:31-35; Luk. 8:19-21)

46 Waktu Yesus becerak ilen ku jema delé a, ine-É urum serinen-serinen-É sesuk i deret, berusaha becerak urum Wé.

47 Renyel ara si mumerin ku Wé : “Èngonle, ine urum serinen-serinen ni Guru tengah sesuk i deret, berusaha becerak urum Guru.

48 Jeweb Yesus ku jema si mumerinen oya : “Sahan ke ineng-Ku, den sahan ke serinen-serinen-Ku?”

49 Renyel itilok ni Yesus pumu-É ku arah murid-murid-É, iperin-É : “Èngonle, inile ineng-Ku urum serinen-serinen-Ku.

50 Sebeb barik sahan si mubueten kenak ni Amang-Ku si i serge, wéle serinen-Ku, dengan-Ku, den ineng-Ku.”