Matius 14

Yohanes Pembaptis iunuh 14: 1-12

(Mrk. 6:14-29; Luk. 9:7-9)

 I waktu oya Herodes, reje i daerah Galilea mumengé keber tentang Yesus;

2 renyel iperiné ku pegawé-pegawéé : “Inile Yohanes Pembaptis; wé nge uet ari antara jema benasa, oya kati kuasa-kuasa wa bebuet i was ni Wé.”

3 Sebeb Herodes nge munengkam Yohanes, mugarié nye munayoné ku wan penjere entap ni Herodias, banan ni Pilipus, serinené.

4 Kerna Yohanes pernah mumerin ku Herodes : “Gere ienguken ko munuet wé kin bananmu!”

5 Herodes malé mununuhé, tapé wé terih ku jema delé kerna pakea percaya bahwa Yohanes a nabi.

6 Tetapé i lo ulang tahun ni Herodes, betarile anak beru ni Herodias i lelah ni pakea den itosé até ni Herodes gegalaken,

7 sehinge Herodes besumpah ku ipak a malé munosanen sanah pé si itiroé.

8 Nge mari ikini ineé, iperiné : “Osanen reje pé ku aku i sien ulu ni Yohanes i wan sara talam.”

9 Renyel uesle até ni reje, tapé entap ni sumpahé urum entap ni jamu-jamué si kunul mangan urum wé, iperintahené kati iosanen,

10 nye ikinié mungerat ulu ni Yohanes i wan penjere.

11 Den ulu ni Yohanes a pé imai i wan sara talam, nye iosanen ku ipak a den wé mumaié ku ineé.

12 Renyel gèhle murid-murid ni Yohanes munuet mèté den munguburené, nge mari oya pakea beluh munyederené ku Yesus.

Yesus munosah mangan lime ribu jema 14: 13-21

(Mrk. 6:30-44; Luk. 9:10-17; Yoh. 6:1-15)

13 Mari ipengé Yesus keber a, berangkatle seseréng-É ari oné nik perau ku sara ton si sengap; tetapé jema delé mumengéé, den pakea mununungi Wé tar jelen deret ari kute-kute ni pakea.

14 Waktu Yesus turun ari perau, ièngon-É delé pedéh jema, den mugerakle até-Wé entap ni kasih ku pakea nye Wé mujegeren pakea si sakiten.

15 Ketike lo nge malé kelem, murid-murid-É gèh ku Wé nye mumerin : “Ton ni sengap den lo pé nge muloi gelep; kinile jema delé a beluh ku kampung-kampung kati pakea lepas mubeli pemanganen kin pakea.

16 Tetapé iperin Yesus ku pakea : “Gere daléh pakea beluh, kamle si munosah pakea mangan.”

17 Iperin pakea ku Wé : “I sien kami munempui lime ruti urum gulè roa we.”

18 Renyel iperin Yesus : “Mai ku ini ruti urum gulè a ku Aku.”

19 Den ikini-É jema delé a kunul i atan ni kerpé, mari iuet ni Yesus lime ruti urum roa gulè a, Wé munangak ku langit den mungucep sukur, renyel mumecah-mecahen ruti a nye munosanené ku murid-murid-É, den murid-murid-É mubaginené ku jema delé a.

20 Den pakea bèwèné mangan sawah korong den pues; mari oya ikamulen pakea kekerus-kekerus ni ruti a, engkip due belas keranyang.

21 Pakea si mangan kire-kire lime ribu jema rawan, gere temasuk jema banan urum kekanak.

Yesus remalan i atan ni wih 14: 22-33

(Mrk 6:45-52; Yoh. 6:16-21)

22 Nge mari oya langsung ikini Yesus murid-murid-É nik ku wan perau nye mulonen berangkat ku serap o, den Wé mungini jema delé a ulak.

23 Den mari ikini Yesus jema delé a ulak, Wé nik ku bur seseréng-É kin bedoà. Ketike lo nge kelem, Yesus seseréng-É i oné.

24 Perau ni murid-murid-É nge gip ari dereten, den isesempak gelumang entap ni kuyu sunsang.

25 Kire-kire jem tige soboh gèhle Yesus ku arah pakea remalan i atan ni wih.

26 Ketike ièngon murid-murid a Wé remalan i atan ni wih, pakea gerle nye metuk : “Oya hantu!” Renyel pakea musesarik entap ni keterihen.

27 Tetapé seketike oya pé iperin Yesus ku pakea, ken-É : “Tenangle! Aku ini, enti terih!”

28 Renyel jeweb Petrus ku Wé, kené : “Tuhen, ike sunguh oya Tuhen, kinile aku gèh ku Tuhen remalan i atan ni wih.”

29 Iperin Yesus : “Gèh renyel!” Renyel Petrus turun ari perau nye remalan i atan ni wih mudepeten Yesus.

30 Tetapé sentan irasaié iupen ni kuyu, terihle wé den muloi mutelnom, wé musarik : “Tuhen, selamatenle aku!”

31 Langsung ijurahen Yesus pumu-É munamat wé, nye ken-É : “O jema si kurang percaya, hana kati ko bimang?”

32 Ketike Yesus urum Petrus nik ku wan perau, redele kuyu a.

33 Den jema-jema si ara i perau a munyemah Wé, kené : “Sunguhle Guru Anak ni Allah.”

Yesus mujegeren jema sakiten i Genesaret 14: 34-36

(Mrk. 6:53-56)

34 Renyel pakea munyeberang nye sawah i tanoh Genesaret.

35 Ketike jema-jema i ton oya munenei Yesus, pakea munyederené ku seluruh daerah a, renyel imaile bèwèné jema sakiten ku Wé.

36 Urum sunguh pakea muniro ku Yesus kati pakea lepas mujontok reramu ni jubah-É we; den bèwèné jema si mujontoké mujadi jeger.