Matius 15

Perintah ni Allah urum edet istiedet ni urang Yahudi 15: 1-20

(Mrk 7:1-23)

Renyel pepien ni urang Parisi urum ahli Taurat ari Yerusalem gèh ku Yesus nye mumerin :

2 “Hana kati murid-murid-Mu mulanggar edet istiedet ni muyang datunte? Sebeb pakea gere mubasuh pumu sebelem mangan.”

3 Jeweb Yesus ku pakea : “Hana kati kam pé mulanggar perintah ni Allah entap ni kam malé mununungi edet istiedet ni muyang datumu?

4 Sebeb nge iperin Allah : Hormatile amamu urum inemu, den sahan si muhine amaé urum ineé turah maté iunuh.

5 Tapé iperin kam : Barik sahan mumerin ku amaé atawa ku ineé, sana si turah kuosanen kin keperlun ni ama urum ine nge kupesemahen ku Allah,

6 jema wa, iijinen kam gere muhormati amaé atawa ineé; urum lagu noya kata ni Allah inyatanen kam gere berlaku entap ni edet istiedetmu.

7 O jema munapèk! Betulle nubuet ni nabi Yesaya tentang kam :

8 Bengsa ni muhormati Aku urum bibiré, tetapé atéwé gip ari Aku;

9 gere ara guneé pakea munyemah Aku, ejeren si iejeren pakea oyale perintah ni manusie.”

10 Renyel italu Yesus jema delé a nye iperin-É ku pakea : “Pengén kam den pehemile!

11 Nume si mayo ku was ni awah si munajisen jema, tetapé si tangkuh ari awah, inile si munajisen jema.”

12 Renyel gèhle murid-murid-É nye mungune Wé : “Ibetihi Guru ke bahwa urang Parisi tesingung waktu mumengé pecerakan ni Guru a?”

13 Jeweb Yesus : “Setiep senuenen si gere i suen Amang-Ku si i serge malé ijergut.

14 Daténenle pakea. Pakea pemimpin-pemimpin si mbota; ike jema mbota munamik jema mbota tentu reroané metuh ku wan rerak.”

15 Renyel Petrus mumerin ku Yesus : “Jelasen pé perumpamaen a ku kami.”

16 Den iperin Yesus : “Kam pé gere lepas ilen mumehemié?

17 Gere ke ibetihi kam bahwa bèwèné si mayo ku wan ni awah  turun ku wan tuke nye itekaren ku wan begen?

18 Tetapé sana si tangkuh ari awah, gèhé ari wan até, den oyale si munajisen jema.

19 Sebeb ari wan ni até timul pikiren si jahat, penunuhen, pejinehen, pencabulen, perusuhen, besaksi cogah, hujet.

20 Hal-hal inile si munajisen jema; tetapé mangan urum pumu gere ibasuh gere munajisen jema.”

Imen ni jema banan urang Kanaan 15: 21-28

(Mrk. 7:24-30)

21 Renyel Yesus tangkuh ari oné nye berangkat ku daerah Tirus urum Sidon.

22 Den èngon, sara jema banan urang Kanaan ari daerah oya gèh nye metuk, kené : “Kasihanile aku, o Tuhen, Anak ni Daud; anak berungku kerasuken setan den olok muderite.”

23 Tetapé gere ijeweb Yesus sara cerak pé ku wé. Renyel murid-murid-É gèh nye muniro ku Yesus, kené : “Kinile wé beluh, entap wé petuk-tuk i kudukte.”

24 Jeweb Yesus : “Aku iutus ku bebiri si mosop ari urang Israel we.”

25 Tetapé jema banan a gèh nye munyemah Wé, kené : “Tuhen, tulungle aku.”

26 Tetapé ijeweb Yesus, ken-É : “Gere patut munuet ruti ni kekanak nye munekarné ku asu.”

27 Iperin jema banan a : “Betul Tuhen, tapé asu-asu mangan tora-tora si metuh ari meja si nempué.”

28 Renyel Yesus mujeweb nye iperin-É ku wé : “O jema banan, kul imenmu; jadile ku ko lagu si ikenaki ko.” Den i waktu oya pé jegerle anak berué.

Yesus mujegeren delé jema sakiten 15: 29-31

29 Mari oya Yesus beluh ari oné nye remalan i geniring ni danau Galilea, renyel Wé nik ku bur den kunul i oné.

30 Den delé pedéh jema gèh ku Wé mumai jema lumpuh, mudèngkoh, mbota, bisu den delé mi si lèn, nye mumarinen pakea i kiding ni Yesus; den Wé mujegeren pakea.

31 Jadi takjuble jema delé a munèngon jema bisu becerak, jema mudèngkoh jeger, jema lumpuh remalan, jema mbota munèngon; den pakea mumulienen Allah ni urang Israel.

Yesus munosah mangan empat ribu jema 15: 32-39

(Mrk. 8:1-10)

32 Renyel Yesus munalu murid-murid-É, nye iperin-É : “Ateng-Ku mugerak entap ni kasih ku jema delé a, sebeb nge tulu lo pakea murum urum Aku den besilo pakea gere munempui sanah pé kin ipangan; den Aku gere mera mungini pakea ulak urum mulapé, kasé pakea murebah i dené.”

33 Iperin murid-murid-É ku Wé : “I ton si sengap ni, i sihen kite mudepet ruti kin munosah mangan jema si olok delé jemlahé?”

34 Den iperin Yesus ku pakea : “Sidah ruti si ara i kam?” Iperin pakea : “Pitu, den pepien ni gulè.”

35 Renyel ikini Yesus jema delé a kunul i tanoh;

36 mari oya iuet-É ruti si pitu urum gulè a den mungucep sukur, Wé mumecah-mecahené nye munosahé ku murid-murid, renyel murid-murid munosanené ku jema delé a.

37 Den pakea bèwèné mangan sawah korong den pues. Renyel pakea mungamulen kekerus-kekerus ni ruti a, engkip pitu keranyang.

38 Jema si mangan ruti a empat ribu jema rawan, gere temasuk jema banan urum kekanak.

39 Nge mari ikini Yesus jema delé a ulak, Wé nik ku wan perau, den beluh ku daerah Magadan.