Matius 16

Urang Parisi urum urang Saduki muniro tene 16: 1-4

(Mrk. 8:11-13; Luk. 12:54-56)

Renyel gèhle urang Parisi urum urang Saduki malé munyubei Yesus, itiro pakea kati Wé munuruhen sara tene ari serge ku pakea.

2 Tetapé Yesus mujeweb, iperin-É ku pakea : “Waktu iyo lo iperin kam : Lo jeroh, entap ni langit ilang;

3 den waktu soboh lo iperin kam : Serloni malé ara badé entap ni langit ilang urum reduk. Rupe ni langit ibetihi kam mubedanené, tapé tene-tene ni jemen gere ibetihi kam.

4 Angkatan si jahat urum pejine ni muniro tene, tetapé gere iosah tene ku pakea kecuali tene ni nabi Yunus.” Mari oya Yesus munaringen pakea nye  beluh.

Tentang ragi ni urang Parisi urum urang Saduki 16: 5-12

(Mrk. 8:14-21)

5 Waktu murid-murid ni Yesus sawah i serap ni danau ho, pakea lupe munemah ruti.

6 Iperin Yesus ku pakea : “Inget-inget den bejege-jegele kin ragi ni urang Parisi urum urang Saduki.”

7 Pakea bepikir den becerak sabé dirié : “Oya iperin-É kerna kite gere munemah ruti.”

8 Tetapé Yesus mubetihi sana si iceraken ni pakea, nye iperin-É : “Woi kam jema si kurang percaya, hana kati sesabé kam munyeraken tentang kam gere munempui ruti? 

9 Gere ilen mungerti ke kam, gere inget ke kam tentang lime ruti kin lime ribu jema wa den sidah keranyang kekerus ni ruti ikamulen kam?

10 Atawa pé pitu ruti kin empat ribu jema wa den sidah keranyang kekerus ni ruti ikamulen kam?

11 Kune kam gere mungerti bahwa nume tentang ruti si Kucerakan ku kam? Tetapé bejege-jegele kin ragi ni urang Parisi urum urang Saduki.”

12 Nge mari oya barole pakea mungerti bahwa meksud ni Yesus nume bejege-jege kin ragi ni ruti, melènen kin ejeren ni urang Parisi urum urang Saduki.

Pengakuan ni Petrus tentang Yesus 16: 13-20

(Mrk. 8:27-30; Luk. 9:18-21)

13 Mari Yesus sawah i daerah Kaisarea Pilipi, Wé mungune ku murid-murid-É, ken-É : “Iperin jema, sahan ke Anak   ni Manusie         oya?”

14 Jeweb pakea : “Ara si mumerin : Yohanes Pembaptis, si lèn mumerin : Elia, ara mi si lèn mumerin : Yeremia atawa sara ari nabi-nabi.”

15 Renyel ikunei Yesus pakea : “Tetapé iperin kam, sahan ke Aku ni?”

16 Jeweb Simon Petrus, kené : “Gurule Kristus oya, Anak ni Allah si murip!”

17 Jeweb Yesus, iperiné ku wé : “Mubahgie mi le ko Simon, anak ni Yunus, sebeb nume manusie si munyatanen oya ku ko, melènen Amang-Ku si i serge.

18 Den Aku pé mumerin ku ko : Ko oyale Petrus, den i atan atu ini Aku malé mudirinen jemaat-Ku den alam maut gere munguasaié.

19 Aku malé munosanen kunci ni Kerejeen Serge ku ko; sanah pé si iikot ko i denie ni malé muikot i serge, den sanah pé si iluahen ko i denie ni malé muluah i serge.”

20 Renyel Yesus muperingeten murid-murid-É kati pakea enti munyederen ku sahan pé bahwa Wéle Kristus oya.

Penyederen pemulo tentang kematénen urum kebangkiten ni Yesus 16: 21-28

(Mrk. 8:31-9:1; Luk. 9:22-27)

21 Den ari waktu oya mi Yesus muloi munyatanen ku murid-murid-É bahwa Wé turah beluh ku Yerusalem nye munangung delé penderiteen ari petue-petue, imem-imem kepala urum ahli-ahli Taurat, renyel iunuh den i lo ketige ibangkiten.

22 Petrus munegu Yesus ku semelah ho nye munegor Wé, kené : “Tuhen, kireé Allah munegipen hal oya! Selohen pé hal oya gere munimpe Tuhen.”

23 Tapé Yesus mubalik nye mumerin ku Petrus : “Beluhle ari Aku, Belis! Ko sara penghalang kin Aku, kerna ko gere mumikiren sana si ipikiri Allah tapé si ipikiri manusie.”

24 Renyel Yesus mumerin ku murid-murid-É : “Barik sahan ménét mununung Aku, wé turah munyangkal dirié, munarang salibpé den mununung Aku.

25 Kerna barik sahan munyelamaten nyawaé, wé malé kebenénen nyawaé; tetapé barik sahan si kebenénen nyawaé entap ni Aku, wé malé munyelamatené.

26 Sebeb sana ke untungé kin jema ike wé mudepeten seluruh denie tapé kebenénen nyawaé?

27 Kerna Anak ni Manusie malé gèh wan kemulien ni Ama-É murum urum malèkat-malèkat-É; i waktu oya Wé malé mubeles ku jep jema munurut pebuetené.

28 Sesunguhé Kuperinen ku kam : Ara pepien ni jema si sesuk i sien si gere mungalami kematénen sebelem pakea munèngon Anak ni Manusie gèh i wan kerejeen-É.”