Matius 17

Yesus ipermulien i atan ni bur 17: 1-13

(Mrk. 9:2-13; Luk. 9:28-36)

Onom lo mari oya Yesus munajak Petrus, Yakobus urum Yohanes serinené, nye mumai pakea ku sara bur si atas. I oné pakea seseréngé we.

2 Renyel Yesus berubah rupe i arap ni pakea, salak-É mucaya lagu matanlo den pekayan-É mujadi putih lagu caya.

3 Den ièngon pakea Musa urum Elia tengah becerak urum Yesus.

4 Iperin Petrus ku Yesus : “Tuhen, jeroh kin kite ara i sien; ike Tuhen mera, aku malé munos tènda i sien, sara kin Tuhen, sara kin Musa, den sara kin Elia.

5 Waktu Petrus becerak ilen, gèhle emun si mucaya mulongohi pakea nye tenengé sara ling ari was ni emun a si mumerinen : “Inile Anak-Ku si Kukasihi, ku Wéle Aku bekenak; pengén kamle Wé.”

6 Mumengé oya mudongkorle murid-murid den pakea olok keterihen.

7 Renyel Yesus mudekati den munamat pakea, nye ken-É : “Uet renyel, enti terih!”

8 Ketike munatangen mataé, pakea gere munèngon sara jema pé selèn Yesus sesereng-É we.

9 Den waktu pakea turun ari bur a, Yesus bemanat ku pakea : “Enti isederen kam penèngonen oya sebelem Anak ni Manusie ibangkiten ari antara jema benasa.”

10 Renyel murid-murid a mungune ku Wé : “Ike beta hana kati ahli-ahli Taurat mumerinen bahwa Elia turah gèh tar pemulo?”

11 Jeweb Yesus : “Asa Elia malé gèh den malé munetahi segele sesanahé;

12 tetapé Kuperinen ku kam bahwa Elia nge gèh, den pakea gere munene wé nye muperlakunené munurut kune kenak ni pakea. Betapé Anak ni Manusie malé muderite i wan pumu ni pakea.”

13 Barole murid-murid a mungerti bahwa Yesus becerak tentang Yohanes Pembaptis.

Yesus mujegeren sara anak rawan si sakit pungur babin 17: 14-21

(Mrk. 9:14-29; Luk. 9:37-43a)

14 Ketike Yesus urum murid-murid-É sawah ku jema delé, gèhle sara jema rawan nye sujut i arap ni Yesus,

15 kené : “Tuhen, kasihile anakku, entap wé sakit pungur babin den olok muderite; gati wé metuh ku wan rara den ku wan wih.

16 Nge ku mai wé ku murid-murid ni Guru, den pakea gere sangup mujegerené.”

17 Jeweb Yesus, ken-É : “Woi kam angkatan si gere percaya den si sesat, sidah lemem mi Aku urum kam? Sidah lemem mi Aku turah seber kin kam? Maile anak a ku ini!”

18 Renyel Yesus mumerintahen setan a tangkuh, nye tangkuhle setan a ari wé, den anak a jeger seketike oya pé.

19 Nge mari oya murid-murid gèh ku Yesus, den waktu seserèng ni pakea, mungunele pakea : “Hana kati kami gere lepas munusir setan a?”

20 Jeweb Yesus ku pakea : “Entap ni kurang imenmu; sesunguhé Kuperinen ku kam, sekireé kam munempui imen lagu sara inih ni sesawi, kam lepas mumerinen ku bur ni : Minah ari sien ku so, bur a pé minah, den gere ara si mustahil kin kam.

21 [Jenis ni gere lepas iusir kecuali urum bedoà den bepasa.]”

Penyederen kedue tentang kematénen urum kebangkiten ni Yesus 17: 22-23

(Mrk. 9:30-32; Luk. 43b-45)

22 Waktu Yesus urum murid-murid-É mukamul i Galilea, iperin Yesus ku

pakea : “Anak ni Manusie malé iserahen ku wan pumu ni manusie,

23 den pakea malé mununuh Wé, nye i lo ketige Wé malé ibangkiten.” Den pakea olok sedih.

Yesus munebir pajak kin Bait ni Allah 17: 24-27

24 Ketike pakea sawah i Kapernaum, gèhle penagih pajak roa dirham ku Petrus, nye mumerin : “Gere ke Gurumu munebir pajak si roa dirham a?”

25 Iperin Petrus : “Munebir.” Waktu Petrus mayo ku was ni umah, Yesus munuloi becerak ku wé : “Sana pendepetmu, Simon? Ari sahan ke reje-reje denie ni munagih bea atawa pajak? Ari rayaté atawa ari jema asing?”

26 Jeweb Petrus : “Ari jema asing.” Renyel iperin Yesus ku wé : “Ike beta bebasle rayaté.

27 Tetapé kati kite enti bebuet kesalahen ku pakea, beluh renyel munekik ku danau den ueten renyel gulè si pemulo timul, waktu iukenen ko awahé, ko malé mudemunen sèn opat dirham; ueten renyel sèn a, nye osanen ku pakea kin Aku urum kin ni ko.”