Matius 18

Sahan si paling kul wan Kerejeen Serge 18: 1-5

(Mrk. 9:33-37; Luk. 9:46-48)

I waktu oya gèhle murid-murid a ku Yesus nye mungune : “Sahan ke si paling kul wan Kerejeen Serge?”

2 Renyel italu-É sara kekanak den munobonené i lelah ni pakea

3 nye iperin-É : “Sesunguhé Kuperinen ku kam, ike kam gere betobat den mujadi lagu kekanak, kam gere lepas mayo ku wan Kerejeen Serge.

4 Barik sahan si murenahen dirié lagu kekanak ni, wéle si paling kul i wan Kerejeen Serge.

5 Den barik sahan si munerime sara anak lagu ni wan geral-Ku, wé munerime Aku.”

Yesus muperingeten tentang neraka 18: 6-9

(Mrk. 9:42-48; Luk. 17:1-2)

6 “Barik sahan si munos bedosa sara ari kekanak si percaya ku Aku ni, jerohen igenengen ku rongoké atu penggilingen si kul nye wé itekaren ku wan lut.

7 Celakale denie entap munos jema bedosa; asa penyesaten turah ara, tetapé celakale jema si mubueté.

8 Den ike pumumu atawa kidingmu munos ko bedosa, keratenle den tekarenle oya; sebeb jerohen ko mayo ku wan murip urum pumu semelah atawa mudèngkoh bidak urum roa pumu atawa roa kidingmu itekaren ku wan rara si kekal.

9 Den ike matamu munos ko bedosa, congkelenle den tekarenle oya; sebeb jerohen ko mayo ku wan murip urum mata semelah bidak urum roa matamu itekaren ku wan rara ni neraka.”

Perumpamaen tentang bebiri si mosop 18: 10-14

(Luk. 15:3-7)

10 “Ingetle, enti kam mumanang renah sara ari kekanak kucak ni; sebeb Kuperinen ku kam bahwa malèkat-malèkat ni pakea i serge sabé mumanang salak ni Amang-Ku si i serge.

11 [Kerna Anak ni Manusie gèh kin munyelamaten si mosop.]

12 Kune munurutmu? Ike sara jema munempui seratus bebiri den sara ari bebiri a museruk, gere ke wé munaringen si sembilen puluh sembilen a i atan ni bur nye beluh mungenal si museruk a?

13 Den ike wé nge mudemunené, sesunguhé Kuperinen ku kam, lebih kul galak ni atéwé entap si sara wa bidak galak ni atéwé entap si sembilen puluh sembilen si gere museruk a.

14 Betapé Amamu si i serge gere mungenaki sara pé ari kekanak ni benasa.”

Tentang munasehati sesabé serinen 18: 15-20

15 “Ike serinenmu bedosa kin ko, beluhle nye nasèhati wé antara reroan kam padéh. Ike wé mumengénené, ko nge mudepeten mien serinenmu a.

16 Tetapé ike wé gere mumengénené, maile urum ko sara atawa roa mi serinenmu, kati urum keterangen roa atawa tulu saksi jep perkara gere isangsinen.

17 Ike wé gere mumengénen pakea, sederenle hal oya ku jemaat; den ike wé pé gere mumengénen jemaat a, panangle wé sebagé jema si gere mubetihi Allah den jema penagih pajak.

18 Sesunguhé Kuperinen ku kam, sanah pé si iikot ko i denie malé muikot i serge, den sanah pé si iluahen ko i denie malé muluah i serge.

19 Kuperinen ku kam mien bahwa ike roa jema ari kam sepakat i atan denie ni muniro sanah pé, teniron ni pakea malé iosanen Amang-Ku si i serge.

20 Sebeb i sihen roa atawa tulu jema mukamul wan geral-Ku, i oné Aku ara i lelah ni pakea.”

Perumpamaen tentang pengampunen 18: 21-35

21 Mari oya gèhle Petrus mumerin ku Yesus : “Tuhen sawah mupienen ke serinenku bedosa kin aku, den aku turah munampuni wé? Sawah mupitunen ke?”

22 Iperin Yesus ku wé : “Kuperinen ku ko, nume sawah mupitunen, tapé sawah mutujuhpuluhen kali pitu.

23 Sebeb Kerejeen Serge iumpamanen urum sara reje si malé munyelesénen peritungen urum temuluk-temuluké.

24 Ketike wé muloi munaranen peritungen a, imai jemale ku wé sara jema si mutang sepuluh ribu talenta.

25 Den entap ni jema wa gere lepas munebir utangé a, reje a mumerintahen kati wé ijuel urum banané, anak-anaké den segele sesanah si iempuié kin munebiri utangé a.

26 Entap ni oya sujutle temuluk a  munyemah reje a, kené : Seber mile kin aku, bèwèné utangku a kasé kulunesi ku reje.

27 Mugerakle até ni reje a entap ni kasihé kin temuluk a, sehinge wé mubebasené den munosopen utangé a.

28 Tetapé ketike temuluk a tangkuh, wé mudemu urum sara ari pongé sesabé temuluk si mutang seratus dinar ku wé. Itengkamné nye icekekné pongé a, kené : Biren utangmu! 

29 Renyel sujutle pongé a nye muniro ku wé, kené : Seber mile kin aku, kasé kubiren ku ko.

30 Tetapé wé gere mera, sebaliké wé beluh munyerahen pongé a ku wan penjere sawah ilunasié utangé a.

31 Waktu ièngon pong-pongé sesabé temuluk sana si nge terjadi, pakea olok sedih, nye beluh munyederen ku reje ni pakea segele hal si nge terjadi.

32 Renyel italu reje a temulak a nye iperiné ku wé : Woi temuluk si jahat, bèwèné utangmu nge kuosopen kerna itiro ko ku aku.

33 Gere ke ko pé turah mungasihi pongmu sesabé temuluk lagu aku nge mungasihi ko?

34 Oya kati bengisle rejeé a nye munyerahen wé ku algojo-algojo sawah wé mulunesi bèwèné utangé.

35 Betapé Amang-Ku si i serge malé mubueten ku kam, ike masing-masing kam gere munampuni serinenmu urum segenap atému.”