Matius 19

Pecerénen 19: 1-12

(Mrk. 10:1-12)

Ketike Yesus nge munyelesénen pecerakan oya, berangkatle Wé ari Galilea nye sawah i daerah Yudea, i serap ni wih Yordan.

2 Den delé jema mukerumung mununungi Yesus den Wé mujegeren pakea i oné.

3 Renyel gehle urang Parisi ku Wé kin munyubei-É, kené : “Ienguken ke jema munyerénen banané urum alasan sanah pé?”

4 Jeweb Yesus, ken-É : “Gere ke ibaca kam, bahwa Wé munyiptanen manusie ari mulo mi mujadinen pakea jema rawan urum jema banan?

5 Den Wé mumerin : Entap ni oya, sara jema rawan munaringen amaé urum ineé nye musara urum banané, den reroané mujadi sara usi; 

6 sehinge pakea gere ne roa tapé sara usi. Oya kati sana si nge isaranen Allah gere nguk icerénen manusie.”

7 Iperin pakea ku Wé : “Ike beta, hana kati Musa mumerintahen kin munosanen suret ceré nye munyerénené?”

8 Iperin Yesus ku pakea : “Entap ukang naté ni kamle Musa munijinen kam munyerénen bananmu; tapé ari mulo mi gere lagu noya.

9 Den Aku mumerin ku kam : Barik sahan munyerénen banané, kecuali entap ni jine, nye kerje urum jema banan si lèn, wé bebuet jine.”

10 Iperin murid-murid a ku Wé : “Ike lagu noya hubungen ni jema rawan urum banané, jerohen gere betempat.”

11 Den iperin Yesus ku pakea : “Gere bèwèné jema lepas mumehemi pecerakan ni, tapé kin pakea si nge ikaruniei we.

12 Sebeb ara jema gere betempat entap wé lahir lagu noya ari rahim ni ineé, den ara jema gere betempat entap jema lèn si mujadinené lagu noya, den ara jema si munos dirié gere betempat entap ni Kerejeen Serge. Sahan si sangup mumehemié, kenakné wé mumehemié.”

Yesus muberkati kekanak 19: 13-15

(Mrk. 10:13-16; Luk. 18:15-17)

13 Renyel pakea mumai kekanak ku Yesus kati Wé mumarinen pumu-É ku atan ni kekanak a nye mudoànené; tapé murid-murid-É mubengisi pakea.

14 Tetapé iperin Yesus : “Daténen kekanak a den enti muhalang-halangi pakea gèh ku Aku; sebeb jema si lagu noyale si nempu Kerejeen Serge.”

15 Renyel Yesus mumarinen pumu-É ku atan ni pakea, mari oya berangkatle Wé ari oné.

Bebujang si kaya 19: 16-26

(Mrk. 10:17-27; Luk. 18:18-27)

16 Den èngonle, sara jema gèh ku Yesus, nye mumerin : “Guru, pebueten si jeroh sana ke si turah kubueten kati aku mudepet murip si kekal?”

17 Jeweb Yesus ku wé : “Hana kati ikunei ko ku Aku tentang sana si jeroh? Sara we si jeroh; tetapé ike ko ménét mayo ku wan murip, turutile perintah-perintah ni Allah.”

18 Ikunei jema wa ku Yesus : “Perintah si sihen ke?” Jeweb Yesus : “Enti ko mununuh, enti ko bejine, enti ko munusuh, enti ko besaksi cogah,

19 hormatile amamu urum inemu, den kasihile sesabé ni kam lagu dirimu ken diri.”

20 Iperin jema bujang a ku Yesus : “Bèwèné ni nge kuturuti; hana ilen kekurangenku?”

21 Iperin Yesus ku wé : “Ike ko ménét mujadi semperne, beluhle, juel renyel sana si iempui ko nye osanen ku jema miskin, kasé ko malé munempui reta i serge, mari oya gèhle nye tunung mile Aku.”

22 Ketike ipengé jema bujang a pecerakan oya, beluhle wé urum ues ni atéwé; sebeb delé retaé.

23 Renyel iperin Yesus ku murid-murid-É : “Sesunguhé Kuperinen ku kam, bahwa nyanya pedéh kin jema kaya mayo ku wan Kerejeen Serge.

24 Seger mi Kuperinen ku kam, murahen sara unte liwet tar luang ni jarum bidak sara jema kaya mayo ku wan Kerejeen ni Allah.”

25 Ketike murid-murid a mumengéé, pakea olok hèran nye mumerin : “Ike beta sahan ke si lepas iselamaten?”

26 Yesus mumanang pakea, nye iperin-É : “Kin manusie hal oya mustahil, tetapé kin Allah gere ara hal si mustahil.”

Upah mununung Yesus 19: 27-30

(Mrk. 10:28-31; Luk. 18:28-30)

27 Renyel isuti Petrus, iperiné ku Yesus : “Èngon, kami ni nge munaringen segeleé nye mununungi Guru; jadi kasé hana si malé kami depeten?”

28 Iperin Yesus ku pakea : “Sesunguhé Kuperinen ku kam, i wan denie si ayu kasé puren, ketike Anak ni Manusie kunul i atan ni takhta kemulien-É, kam si nge mununung Aku, kam pé kasé kunul i atan ni due belas takhta kin muhakimi kedue belas suku Israel.

29 Den jep jema si nge munaringen umahé, atawa serinené, atawa dengané, atawa amaé, atawa ineé, atawa anak-anaké, atawa empusé entap ni geral-Ku, kasé puren wé munerime mulipet ganda den muwarisi murip si kekal.

30 Tetapé delé jema si pemulo malé mujadi si pemarin den si pemarin malé mujadi si pemulo.”