Matius 2

Urang Majus ari Timur  2: 1-12

Ketike Yesus ilahiren i Betlehem i tanoh Yudea i waktu pemerintahen ni reje Herodes, èngonle, pepien urang majus ari timur gèh ku Yerusalem,

2 nye mungune : “I sihen ke Wé, reje ni urang Yahudi si nge ilahiren oya? Sebeb kami nge munèngon bintang-É i Timur den kami gèh kin munyemah Wé.”

3 Waktu ipengé reje Herodes hal oya, gerle pedéhle wé urum bèwèné penduduk ni Yerusalem;

4 renyel ikamulené bèwèné imem kepala urum ahli Taurat ni bengsa Yahudi, nye mungune ku pakea, i sihen Kristus ilahiren.

5 Iperin pakea ku wé : “I Betlehem i tanoh Yudea, sebeb betale nge itulisen nabi :

6 Den ko Betlehem, tanoh Yehuda, ko nume si paling kucak i antara pakea si mumerintah Yehuda; sebeb ari kole malé tangkuh sara pemimpin, si malé mumeralai umat-Ku Israel.”

7 Renyel urum temuni Herodes munalu urang majus a den urum teliti ikuneié pakea selohen bintang oya muloi teridah.

8 Den ikinié pakea ku Betlehen, kené : “Beluh renyel den selidikile urum teliti tentang Anak oya; den ike kam nge mudemunen Wé, keberen renyel ku aku, kati aku pé lepas gèh munyemah Wé.”

9 Mari mumengé reje a, berangkatle urang majus oya. Den èngonle, bintang si nge ièngon pakea i timur a begerak munuloi pakea hinge sawah den teduh pas i atas ton ni Anak oya.

10 Ketike ièngon pakea bintang oya, olok besukecitele pakea.

11 Renyel pakea mayo ku was ni umah a den munèngon Anak a urum Maria, ine-É, nye pakea sujut munyemah Wé. Mari oya pakea munuke ton reta beneé nye mupesemahen ku Wé pesemahen : emas, kemenyen urum mur.

12 Entap ni iperingeten wan nipi kati enti ulak ku Herodes, pakea ulak ku negerié tar jelen si lèn.

Mungungsi ku Mesir  2:13-15

13 Mari urang majus a ulak, èngonle, sara malèkat ni Tuhen munuruhen diri ku Yusup wan nipi, nye kené : “Uet renyel, mai Anak a urum ine-É mungungsi ku Mesir, den taringle i oné sawah ku sederen mien ku ko; sebeb Herodes mungenal Anak oya kin mununuh Wé.”

14 Oya kati Yusup pé uet, den kelem oya pé imaié Anak a urum ine-É nye berangkat ku Mesir,

15 den pakea taring i oné sawah Herodes benasa; kati genaple sana si iperinen Tuhen mulalui nabi : “Ari Mesir Kutalu Anak-Ku.”

Anak-anak iunuh i Betlehem 2: 16-18

16 Ketike ibetih Herodes bahwa wé nge iileti urang majus a, bengis pedéh wé; renyel ikinié kin mununuh bèwèné

anak rawan si ara i Betlehem urum sekiteré, si berumur roa tun ku tuyuh, sesué urum waktu si iselidikié ari urang majus a.

17 Urum lagu noya genaple sana si iperin nabi Yeremia si mumerinen :

18 “Tenengéle ling i Rama, mongot urum sebuku; Rahel mumongoti anak-anaké, den wé gere mera ihibur, entap pakea gere ara ne.”

Ari Mesir ulak ku Nazaret  2: 19-23

19 Mari Herodes benasa, èngonle, sara malèkat ni Tuhen munuruhen diri ku Yusup wan nipi i Mesir, kené :

20 “Uet renyel, mai Anak a urum ine-É nye beluhle ku tanoh Israel, sebeb pakea si malé mununuh Anak a nge benasa.”

21 Renyel Yusup pé mumai Anak a urum ine-É nye ulak ku tanoh Israel.

22 Tetapé mari ipengéé bahwa Arkelaus mujadi reje i Yudea mugantinen Herodes, amaé, wé terih beluh ku oné. Den entap ni iperingeten wan nipi, Yusup beluh ku daerah Galilea,

23 den ketike sawah i oné, wé pé taring i sara kute si begeral Nazaret; kati genaple sana si nge iperinen nabi-nabi, bahwa Wé malé iperin : Urang Nazaret.