Matius 20

Perumpamaen tentang jema-jema ongkosen i empus anggur 20: 1-16

“Sebeb Kerejeen Serge dis lagu sara penempu ni umah, waktu soboh renam wé tangkuh mungenal jema-jema ongkosen kin bebuet i empus angguré.

2 Nge pakat wé urum jema-jema ongkosen a kin ongkosé serlo sara dinar, ikinié pakea ku empusé.

3 Kire-kire jem sembilen soboh wé tangkuh nye ièngoné jema-jema lèn sesuk i kedé gere bebuet,

4 nye iperiné ku pakea : Kam pé beluh renyel ku empus anggurku, den sana si patuté kasé kuosanen ku kam. Renyel pakea pé beluh.

5 Den kire-kire jem due belas urum jem tige iyo wé tangkuh mien den mubueten dis lagu sine.

6 Renyel kire-kire jem lime iyo wé tangkuh den mudepeti jema-jema lèn tengah sesuk, nye iperiné ku pakea : Hana kati kam sesuk i sien gere bebuet suntuk serlo?

7 Iperin pakea ku wé : Entap gere ara jema si munosah buet ku kami. Iperiné ku pakea : Kam pé beluh renyel ku empus anggurku.

8 Ketike malé kelem, penempu ni umah a becerak ku manuré : Talunen renyel jema-jema ongkosen a nye biren ongkos ni pakea, muloi ari si pemarin mayo sawah ku si pemulo.

9 Den gèhle pakea si muloi bebuet kire-kire jem lime iyo den masing-masing pakea munerime sara dinar.

10 Renyel pakea si bebuet tar pemulo pé gèh, nalam ni pakea bahwa kasé lebih delé pakea munerime; den pakea pé masing-masing munerime sara dinar.

11 Den waktu pakea munerimeé, pakea cembebék ku penempu empus a,

12 kené : Pakea si pemarin ni bebuet sara jem we, den ko mudisen pakea urum kami si bebuet suntuk serlo den munangung porak ni matanlo.

13 Jeweb penempu ni empus a ku sara ari pakea : Serinen, aku gere muruginen ko; gere ke ko urum aku nge sepakat sara dinar?

14 Ueten renyel ongkosmu a nye beluhle; aku malé munosanen ku jema si pemarin ni dis lagu ku ko.

15 Gere ienguken ke aku mubueten hana si kukenaki kin sana si kuempui? Atawa iri até ke ko entap ni aku bekemurahen?

16 Betale jema si pemarin malé mujadi si pemulo den si pemulo malé mujadi si pemarin.”

Penyederen ketige tentang kematénen urum kebangkiten

ni Yesus 20: 17-19

(Mrk. 10:32-34; Luk. 18:31-34)

17 Ketike Yesus malé beluh ku Yerusalem, Wé mumai murid-murid-É pelin, nye wan pejelenen iperin-É ku pakea :

18 “Èngon, besilo kite beluh ku Yerusalem, den Anak ni Manusie malé iserahen ku imem-imem kepala urum ahli-ahli Taurat, den pakea malé munetuhen hukumen maté kin Wé,

19 den pakea malé munyerahen Wé ku bengsa-bengsa si gere mubetihi Allah kin iololi, icamuk, isaliben, den i lo ketulué Wé malé ibangkiten.”

Tenironen ine ni Yakobus urum Yohanes 20: 20-28

(Mrk. 10:35-45)

20 Renyel gèhle ine kekanak ni Zebedeus urum anak-anaké ku Yesus, nye sujut i arap-É kin muniro sesanah ku Wé.

21 Yesus mungune ku wé : “Sana si ikenaki ko?” iperiné : “Osanle perintah kati roané anak-anakku ni nguk kunul kasé i wan Kerejeen-Mu, sara i semelah kuen-Mu nye sara i semelah kiri-Mu.”

22 Jeweb Yesus, ken-É : “Gere ibetihi ko sana si itiro ko a. Sangup ke kam muminum cawan si turah Kuminum?” Iperin pakea ku Wé : “Kami sangup.”

23 Iperin Yesus ku pakea : “Betul cerakmu a, kam turah muminum cawan si Kuminum, tetapé hal kunul i semelah kuen-Ku den i semelah kiri-Ku nume hak-Ku munosanené, hal oya malé iosanen kin sahan oya nge isedienen Amang-Ku.”

24 Mumengé hal oya bengisle kesepuluh murid si lèn ku si roa beserinen a.

25 Tetapé Yesus munalu pakea, nye iperin-É : “Ibetihi kam bahwa pemerintah bengsa-bengsa mumerintah rayaté urum pumu besi den pemimpin-pemimpiné mumaké kuasaé kune kenaké ku jema bawahené.

26 Tetapé gere lagu noya i antara ni kam; barik sahan ménét mujadi kul i antara ni kam, kenakné wé mujadi pelayan ni kam,

27 den barik sahan ménét mujadi si pemulo i antara ni kam, kenakné wé mujadi temuluk ari bèwèné;

28 sebeb Anak ni Manusie gèh nume kin ilayani, tetapé kin mulayani den kin munosanen nyawa-É mujadi tebusen kin delé jema.”

Yesus mujegeren roa jema mbota 20: 29-34

(Mrk. 10:46-52; Luk. 18:35-43)

29 Ketike Yesus urum murid-murid-É tangkuh ari Yerikho, delé pedéh jema mununungi Wé.

30 Den èngon, ara roa jema mbota si kunul i geniring ni dené mumengé bahwa Yesus liwet, den pakea metuk : “Tuhen, Anak ni Daud, kasihile kami!”

31 Tetapé jema delé a munegor pakea kati pakea ongot; tapé pakea makin olok metuk : “Tuhen, Anak ni Daud, kasihile kami!”

32 Renyel Yesus teduh, italu-É pakea nye ken-É : “Sana si ikenaki kam kati Kubueten kin kam?”

33 Iperin pakea ku Wé : “ Tuhen, gelah mata ni kami iukenen.”

34 Mugerakle até ni Yesus entap ni kasih, renyel iamat-É mata ni pakea, den seketike oya pé pakea munèngon mien nye mununungi Wé.