Matius 21

Yesus isurak-surak urum meriah i Yerusalem 21: 1-11

(Mrk. 11:1-11; Luk. 19:28-40; Yoh. 12:12-19)

Ketike Yesus urum murid-murid-É nge rap ku Yerusalem, pakea sawah i Betpage, i bur Zaitun, renyel ikini Yesus roa murid-É

2 nye iperin-É ku pakea : “Beluh renyel ku kampung si i arap ni kam a, den kam kasé mudemunen sara keledé mude tengah itemet urum anaké; luahen nye maile roané ku Aku.

3 Den ike ara jema mumerin sesanah ku kam, perinenle : Tuhen mumerlunené; den tir malé iulaken-É.”

4 Hal ni terjadi kati genaple sana si nge iperinen mulalui nabi, si mumerinen :

5 “Perinenle ku beberu Sion : Èngon, Rejemu gèh ku kam, renah até den muniki keledé, sara keledé beben si mude.”

6 Renyel beluhle murid-murid a nye mubueten lagu si iperinen Yesus ku pakea.

7 Pakea mumai keledé a urum anaké nye mulapikié urum pekayan ni pakea, renyel Yesus nik i atasé.

8 Delé jema mudenangen pekayané i dené, den si lèn mungerat ranting-ranting ari batang kayu nye munyempaké i dené.

9 Den jema delé si remalan i arap ni Yesus urum si mununungi-É ari kuduk metuk, kené :

“Hosana kin Anak ni Daud,

iberkatile Wé si gèh

wan geral ni Tuhen,

hosana i ton

si paling atas!”

10 Ketike Yesus mayo ku Yerusalem, gemparle seluruh kute a, kené : “Sahan ke Jema ni?”

11 Den jema delé a mesut : “Inile nabi Yesus ari Nazaret i Galilea.”

Yesus munyucinen Bait ni Allah 21: 12-17

(Mrk. 11:15-19; Luk. 19:45-48; Yoh. 2:13-16)

12 Renyel Yesus mayo ku was Bait ni Allah nye munusir bèwèné penjuel urum pembeli i alam-alamen Bait ni Allah, den meja-meja ni penuker sèn urum kersi-kersi ni penjuel manuk birahpati i balik-É,

13 nye iperin-É ku pakea : “Ara tertulis : Umah-Ku malé igerali umah doà, tapé kam mujadinené umah ni perusuh.”

14 Den gèhle jema-jema mbota urum mudèngkoh ku Yesus wan Bait ni Allah a, nye Wé mujegeren pakea.

15 Tetapé ketike imem-imem kepala urum ahli-ahli Taurat munèngon tene mukjizet si ibueten-É a den kekanak si metuk i wan Bait ni Allah : “Hosana kin Anak ni Daud!” bengisle pakea,

16 renyel iperin pakea ku Yesus : “Ipengé Ko ke sana si iperinen kekanak ni?” Iperin Yesus ku pakea : “Kupengé; gere ilen pernah ke ibaca kam, bahwa ari awah ni kekanak kucak urum bayi-bayi si munusu, Ko nge munyedienen puji-pujien?”

17 Renyel Wé munaringen pakea nye tangkuh ari kute a den beluh ku Betania, nye beringi i oné.

Yesus mungelsih batang ara. 21: 18-22

(Mrk. 11:12-14, 20-24)

18 Soboh-soboh lang loé, wan pejelenen ulak ku kute, Yesus mulapé.

19 Wé munèngon sara batang ara i geniring ni dené den Wé beluh ku oné tapé gere mudemunen sanah pé kecuali ulungé pelin we. Renyel iperin-É ku batang ara wa : “Dak selohen pé gere pernah ne ko muuah!” Seketike oya pé keringle batang ara wa.

20 Munèngon kejadien a olok hèran murid-murid-É, nye kené : “Kune batang ara wa minter nguk mujadi kering?”

21 Jeweb Yesus, iperin-É ku pakea : “Sesunguhé Kuperinen ku kam, ike kam percaya den gere bimang, kam gere mubueten sana si nge ibueten ku batang ara wa pelin we, tapé ike kam pé mumerin ku bur ni : Mutatangle nye mutekarle ku wan lut! Hal oya malé terjadi.

22 Den sanah pé si itiro kam wan doàmu, ike kam percaya, tentu kam munerimeé.”

Pengunenen tentang kuasa ni Yesus 21: 23-27

(Mrk. 11:27-33; Luk. 20:1-8)

23 Renyel Yesus mayo ku wan Bait ni Allah, den ketike Wé tengah munejer, gèhle imem-imem kepala urum petue-petue ni urang Yahudi ku Wé, nye mungune : “Urum kuasa hana Ko mubueten hal-hal ni? Den sahan si munosah kuasa ni ku Ko?”

24 Jeweb Yesus,  ku pakea : “Aku pé malé mungune ku kam sara pengunenen, ike kam munosah jewebpé ku Aku, Aku pé malé mumerinen ku kam urum kuasa sana Aku mubueten hal-hal ni.

25 Ari sihen ke baptisan ni Yohanes a? Ari serge atawa ari manusie?” Den pakea munyerakené sesabé ni pakea, kené : “Ike kite perin : Ari serge, kasé iperin-É ku kite : Ike beta hana kati kam gere percaya ku wé?

26 Tetapé ike kite perin : Ari manusie, kite terih ku jema delé; sebeb bèwèné jema munangap Yohanes a sara nabi.

27 Renyel ijeweb pakea ku Yesus : “Gere kami betih.” Den Yesus pé mumerin ku pakea : “Ike beta, Aku pé gere mumerinen ku kam urum kuasa sana Aku mubueten hal-hal ni.”

Perumpamaen tentang roa anak rawan 21: 28-32

28 “Tetapé hana ke pendepetmu tentang hal ni? Ara sara jema munempui roa anak rawan; wé beluh ku anak si pemulo, nye iperiné : Win, beluh renyel den bebuet serloni ku wan empus anggur.

29 Jeweb anaké a : Boh mi ama, aku beluh, tapé wé gere beluh.

30 Renyel jema wa beluh ku anak si kedue nye mumerin dis lagu sine. Den anak a mujeweb, kené : Gere mera aku, tapé akhiré wé munyesal, nye beluh.

31 Sahan ke ari antara kedue anak a si mubuaten kenak ni amaé?” Iperin pakea : “Si pemarin”. Renyel iperin Yesus ku pakea : “Sesunguhé Kuperinen ku kam, penagih-penagih pajak urum jema banan pelacur munuloi kam mayo ku wan Kerejeen ni Allah.

32 Sebeb Yohanes gèh ku kam munuruhen jelen kebenaran, den kam gere percaya kin wé; tetapé penagih-penagih pajak urum jema banan pelacur  percaya kin wé. Den bierpé kam nge munèngoné, tapé akhiré kam gere munyesal den gere percaya kin wé.”

Perumpamaen tentang penyiwe ni empus anggur 21: 33-46

(Mrk. 12:1-12; Luk. 20:9-19)

33 “Pengénen kamle perumpamaen si lèn. Arale sara penempu ni empus si munyuen anggur i empusé, wé munos peger i seringkelé, nye munguruk luang kin ton muramas anggur, renyel wé munos sara menara jege. Mari oya 

isiwené empus a ku penyiwe-penyiwe, nye beluh ku negeri si lèn.

34 Den ketike malé sawah musim munuling anggur, ikinié temuluké ku penyiwe-penyiwe a kin munerime uah anggur si mujadi bagiené.

35 Tetapé penyiwe-penyiwe a munengkam temuluk-temuluk a, sara idereié, si lèn iunuhé, den si lèn a mien igeralungi urum atu.

36 Renyel ikinié mien temuluk si lèn, si lebih delé ari si pemulo, den penyiwe-penyiwe a mubueten dis lagu oya ku pakea.

37 Akhiré ikinié anak rawané ku pakea, kené : Anakku tentu ihormati pakea.

38 Tetapé ketike penyiwe-penyiwe a munèngon anaké a, pakea becerak sesabé dirié : Inile ahli warisé, entah mi kite unuhen wé, kati kin kite warisené.

39 Pakea munengkamné den munekarné ku deret ni empus anggur a, renyel mununuhé.

40 Entap ni oya ketike penempu ni empus anggur a gèh, sana ke si malé ibuetené ku penyiwe-penyiwe a?”

41 Iperin pakea ku Yesus : “Wé tentu mununuh jema-jema jahat a nye empus angguré a iosanené ku penyiwe-penyiwe si lèn, si munyerahen uahé ku wé waktu musimé.

42 Iperin Yesus ku pakea : “Gere ilen pernah ke ibaca kam wan Kiteb Suci : Atu si itekar tukang-tukang bangunen nge mujadi atu pendasi si utama; ini terjadi ari Allah, den oya pebueten ajaib i matante.

43 Entap ni oya Kuperinen ku kam, Kerejeen Allah malé iueten ari kam den malé iosanen ku sara bengsa si muhasilen uah Kerejeen a.

44 [Den barik sahan metuh ku atan atu ni, tentué cir; barik sahan itinih atu a, tentu wé remuk.]”

45 Ketike imem-imem kepala urum urang Parisi mumengé perumpamaen-perumpamaen ni Yesus a, ibetihi pakea bahwa Wé becerak tentang diri ni pakea.

46 Kerna oya pakea mungenal cara kin munengkam Yesus, tapé pakea terih ku jema delé entap jema delé a munangap Wé sara nabi.