Matius 22

Perumpamaen tentang pesta pengerjen  22: 1-14

(Luk. 14:15-24)

Renyel Yesus becerak mien ku pakea wan perumpamaen, kené :

2 “Kerejeen Serge a iumpamanen lagu sara reje si munaranen pesta pengerjen kin anak rawané,

3 Wé mungini temuluk-temuluké kin munalu jema-jema si nge iangoné ku pesta pengerjen a, tapé pakea gere mera gèh.

4 Ikinié mien temuluk-temuluk si lèn, kené : Perinenle ku jema-jema si nge iangon a : Èngon, batang ni edang nge kusiepen, lemu-lemu rawan urum urip-uripenku si gotol nge igelih, den bèwèné nge isedienen; gèh renyel ku pesta pengerjen ni.

5 Tetapé pakea gere munironen nye beluh; ara si ku empusé, si lèn ku perniegeené;

6 den si lèn a mien munengkam temuluk-temuluké a, muhineé nye mununuhé.

7 Entap ni oya reje mujadi bengis, den ikinié pasukan tentaraé kin mununuh penunuh-penunuh a nye munèlongen kute ni pakea.

8 Renyel iperiné ku temuluk-temuluké : Sesunguhé pesta pengerjen nge siep, tetapé jema-jema si nge iangon a gere layak;

9 oya kati beluhle kam ku simpang-simpang ni jelen, den sidah deléwé si idemui kam, angonenle ku pesta pengerjen a.

10 Renyel beluhle temuluk-temuluké a ku jelen-jelen, nye mungamulen bèwèné jema si idemui pakea, si jahat urum si jeroh; den ruangen pesta pengerjen a iengkipi urum jamu.

11 Tetapé ketike reje mayo kin munèngon jamu-jamué a, ièngoné i oné sara jema si gere munyeluk pekayan pesta.

12 Den iperiné ku wé : Serinen, kune ko mayo ku ini urum gere bepekayan pesta? Den jema wa ongot we.

13 Renyel iperin reje a ku pelayan-pelayan : Ikotle kiding urum pumué nye

tekarenle wé ku deret ku wan kegelepen; i onéle kasé ara sebuku urum kertaken ni ipon.

14 Sebeb delé si italu, tapé tikik si ipilih.”

Pengunenen tentang munebir pajak  22: 15-22

(Mrk. 12:13-17; Luk. 20:20-26)

15 Mari oya urang Parisi beluh nye beruning kune lepas mujebak Yesus wan pecerakan-É.

16 Renyel ikini pakea murid-murid ni pakea urum urang Herodian ku Yesus mumerinen : “Guru, kami betih bahwa Guru jema benar den Guru munejeren jelen ni Allah urum sebenaré, den Guru gere terih kin sahan pé, sebeb Guru gere mumanang rupe.

17 Entap ni oya perinenle ku kami, hana pendepet ni Guru, ienguken ke munebir pajak ku Kaisar atau gere?”

18 Tetapé Yesus mubetihi kejahaten ni pakea, renyel iperin-É : “Woi jema munapèk, hana kati kam munyubei Aku?

19 Turuhen ku Aku sèn kin pajak a.” Den pakea mumai sara dinar ku Wé.

20 Renyel iperin-É ku pakea : “Gamar urum tulisen sahan ke ini?”

21 Iperin pakea : “Kaisar.” Renyel iperin-É ku pakea : “Oya kati osanen ku Kaisar sana si iempui Kaisar den ku Allah sana si iempui Allah.”

22 Mumengé a takjuble pakea, renyel pakea munaringen Yesus nye beluh.

Pengunenen ni urang Saduki tentang kebangkiten 22: 23-33

(Mrk. 12:18-27; Luk. 20:27-40)

23 I lo oya pé gèhle ku Yesus urang Saduki, si mumerinen bahwa gere ara kebangkiten. Pakea mungune ku Wé :

24 “Guru, Musa mumerinen, bahwa ike sara jema rawan benasa den gere munempui anak, serinené turah kerje urum banané a kati mubangkiten keturunen kin serinené a.

25 Pernah ara i antara ni kami pitu beserinen; si pemulo kerje nye benasa, den entap ni gere munempui keturunen, wé munaringen banané a kin serinené.

26 Betapé si kedue urum si ketige, sawah ku si kepitu.

27 Akhiré mari bèwèné a, jema banan a pé benasa.             

28 I lo kebangkiten kase puren,           

ari kepitu ni jema wa, banan ni sahan ke jema banan a? Sebeb bèwèné nge kerje urum wé.”

29 Jeweb Yesus, iperin-É ku pakea : “Kam nge sesat, gere ibetihi kam Kiteb Suci urum kuasa ni Allah.

30 Sebeb i lo kebangkiten kasé puren jema gere kerje den gere ikerjenen, tapé murip lagu malèkat i serge.

31 Den tentang kebangkiten ni jema si nge benasa, gere ke ibaca kam sana si iperinen Allah ku kam, si mumerin :

32 Akule Allah ni Abraham, Allah ni Ishak den Allah ni Yakup? Wé nume Allah ni jema si benasa, tapé Allah ni jema si murip.”

33 Ketike jema delé a mumengéé, takjuble pakea kin penejeren-É.

Hukum si pemulo pedéh 22: 34-40

(Mrk. 12:28-34; Luk. 10:25-28)

34 Tetapé ketike ipengé urang Parisi a bahwa Yesus nge munos urang Saduki a ongot, mukamulle pakea,

35 nye sara ari pakea, ahli Taurat, mungune kin munyubei Yesus :

36 “Guru, hukum si sihen ke si pemulo pedéh wan hukum Taurat?”

37 Jeweb Yesus ku wé : “Kasihile Tuhen Allahmu urum segenap atému den urum segenap jiwemu den urum segenap akal budimu.

38 Inile hukum si paling penting urum si pemulo pedéh.

39 Den hukum si kedue, si dis lagu oya : Kasihile sesabé kam manusie lagu kam mungasihi dirimu kendiri.

40 Wan roa hukum inile tergantung bèwèné hukum Taurat urum kiteb nabi-nabi.”

Hubungen antara Yesus urum Daud 22: 41-46

(Mrk. 12:35-37; Luk. 20:41-44)

41 Ketike urang Parisi tengah mukamul, Yesus mungune ku pakea, ken-É :

42 “Hana ke pendepet ni kam tentang Kristus? Anak ni sahan ke Wé?” Isuti pakea Wé : “Anak ni Daud.”

43 Iperin Yesus ku pakea : “Ike beta, kune Daud urum ikuasai Roh Kudus munalu Wé Tuhen, waktu wé mumerin: 

44 Tuhen nge mumerin ku Tuhenku : Kunulle i semelah kuen-Ku,

sawah Kubobonen lewen-lewen-Mu

i tuyuh ni kiding-Mu.

45 Jadi ike Daud munalu Wé Tuhen, kune Wé pé anaké?”

46 Gere ara sara jema pé si lepas mujeweb sara cerak pé ku Yesus, den ari lo oya mi sara jema pé gere ara si berani mungune mien ku Wé.