Matius 23

Yesus mungecam ahli-ahli Taurat urum urang Parisi 23: 1-36

(Mrk. 12:38-40; Luk. 11:37-54; 20:45-47)

Renyel Yesus mumerin ku jema delé urum ku murid-murid-É,

2 ken-É : “Ahli-ahli Taurat urum urang Parisi nge kunul i atan kersi ni Musa.

3 Entap ni oya bueten den turutile segele sesanah si iejeren ni pakea ku kam, tapé enti tunungi perbueten-pebueten ni pakea; sebeb pakea munejerené tapé gere mubuetené.

4 Pakea munikot beben si beret den si nyanya kin iarang, nye mumarinené i atan kerlang ni jema, tapé pakea ken diri gere mera muminahené urum jejarié.

5 Bèwèné pebueten si ibueten pakea kati ièngon jema pelin we. Èngonle kata ni Allah si ara i seliben urum i pergelangen pumu ni pakea den reramu ni jubahé si naru.

6 Kenak naté ni pakea kunul i ton si mulie wan kenduri nye tar arap i umah ibedet,

7 den ihormati i kede-kede nye italu jema Rabi.

8 Tetapé kam, entile italu Rabi; sebeb sara we guru ni kam, den kam bèwèné ni besudere.

9 Den entile italu kam sara jema pé ama i denie ni, sebeb sara we Ama ni kam, si i serge.

10 Betapé entile kam italu pemimpin, sebeb sara we pemimpin ni kam, oyale Kristus.

11 Si paling kul i antara ni kam, kenakné wé mujadi pelayan ni kam.

12 Barik sahan si munatasen dirié, wé malé irenahen, den barik sahan si murenahen dirié, wé malé iatasen.

13 Tetapé celakale kam, ahli-ahli Taurat urum urang Parisi, woi kam jema munapèk, entap kam munutup Kerejeen Serge i arap ni jema; sebeb kam kendiri gere mayo den kam gere munijinen pakea si berusaha kin mayo.

14 [Celakale kam, ahli-ahli Taurat urum urang Parisi, woi kam jema munapèk, sebeb kam munileti jema banan balu kin murebut umahé, den mungelabui mata ni jema urum doà si naru-naru. Entap ni oya kasé puren kam munerime hukumen si lebih beret.]

15 Celakale kam, ahli-ahli Taurat urum urang Parisi, woi kam jema munapèk, entap ni kam muringkeli lut urum dereten kin mujadinen sara jema penganut agama ni kam, den ketike wé nge mujadi penganut agama ni kam, kam mujadinen wé anak ni neraka si muroanen lebih jahat ari kam kendiri.

16 Celakale kam, pemimpin-pemimpin si mbota si mumerin : Barik sahan si besumpah demi Bait ni Allah, oya gere bearti sanah pé; tetapé barik sahan si besumpah demi emas Bait ni Allah, wé muikot urum sumpahé.

17 Woi jema ogoh urum mbota, sihen ke si lebih penting, emas atawa Bait ni Allah si mungudusen emas a?

18 Iperin kam mien : Barik sahan si besumpah demi ton ni kerben, oya gere bearti sanah pé; tetapé barik sahan si besumpah demi pesemahen si i atas ton ni kerben a, wé muikot urum sumpahé.

19 Woi jema mbota, sihen ke si paling penting, pesemahen atawa ton ni kerben si mungudusen pesemahen a?

20 Entap ni oya, sahan si besumpah demi ton ni kerben, wé besumpah demi ton ni kerben urum demi segele sesanah si i atasé;

21 den sahan si besumpah demi Bait ni Allah, wé besumpah demi Bait ni Allah urum demi Wé si taring i oné;

22 den sahan si besumpah demi serge, wé besumpah demi takhta ni Allah urum demi Wé si kunul i atané.

23 Celakale kam, ahli-ahli Taurat urum urang Parisi, woi kam jema munapèk, sebeb kam munebir pesepuluhen ari selasih, adas manis urum jire, tapé munaringen hal-hal si paling penting wan hukum Taurat : Keadilen, belas kasih, kesetieen;

pedahal hal-hal ni turah ibueten den si lèn a enti itaringen.

24 Woi pemimpin si mbota, lemis isaring kam, tapé unte idolot kam.

25 Celakale kam, ahli-ahli Taurat urum urang Parisi, woi jema munapèk, sebeb kam mubersihen deret ni cawan urum pingen, tapé i wasé engkip rampasen urum keserakahen.

26 Woi urang Parisi si mbota, bersihen mulo si i was ni cawan a, kati semelah dereté pé mujadi bersih.

27 Celakale kam, ahli-ahli Taurat urum urang Parisi, woi jema munapèk, sebeb kam dis lagu kuburen si icet putih, asa ari deret teridah mampat, tapé iwasé engkip tulen ni jema benasa urum bèwèné si kotek.

28 Betapé kam, ari deret teridah benar i mata ni jema, tapé i was ni kam engkip kemunapèken urum kejahaten.

29 Celakale kam, ahli-ahli Taurat urum urang Parisi, woi jema munapèk, sebeb kam mubangun kuburen ni nabi-nabi nye muhiesi tugu ni jema-jema benar,

30 nye mumerin : Ike kami murip i jemen muyang datu ni kami, tentu kami gere murum urum pakea wan penunuhen nabi-nabi oya.

31 Jadi kam besaksi ku diri ni kam kendiri bahwa kam anak-anak ni penunuh ni nabi-nabi a.

32 Den kam, engkipile ukuren ni muyang datumu!

33 Woi lipé, woi keturunen ni lipé! Kune kam lepas muluahen diri ari hukumen ni neraka?

34 Entap ni oya, èngonle, Aku munutus ku kam nabi-nabi, jema-jema bijaksana urum ahli-ahli Taurat; tèba ari pakea kasé iunuh urum isaliben kam, den tèba mi kasé icamuk kam i wan umah ibedet ni kam den isikse kam ari kute ku kute;

35 kati kam munangung hukumen entap ni penunuhen jema si benar si munajur rayohé i atan ni bumi muloi ari rayoh ni Habel, jema benar oya sawah ku rayoh ni Zakaria anak ni Barakia, si iunuh kam i antara ton kudus urum ton ni kerben.

36 Sesunguhé Kuperinen ku kam, bèwèné hal ni kasé itangung angkatan ni.”

Belas kasih ni Yesus kin Yerusalem 23: 37-39

(Luk. 13:34-35)

37 “Yerusalem, Yerusalem, kute si mununuh nabi-nabi den si mugeralungi urum atu jema si iutus ku ko, nge mupepienen kenak-Ku mungamulen anak-anakmu, lagu ine ni kurik mungamulen anak-anaké i tuyuh ni kepéké, den kam gere mera.

38 Èngonle, umahmu kasé itaringen den mujadi sengap.

39 Sebeb Kuperinen ku kam, muloi ari besilo ni mi kam gere ne malé munèngon Aku sawah iperin kam : Iberkatile Wé si gèh wan geral ni Tuhen!”